កូរ៉េខាងត្បូង នឹងផ្ដល់ជំនួយមនុស្សធម៌ ២០០ លានដុល្លារដល់ អ៊ុយក្រែន ក្នុងឆ្នាំនេះ

ប្រទេសកូរ៉េខាងត្បូងនឹងផ្ដល់ជំនួយមនុស្សធម៌ចំនួន ២០០ លានដុល្លារអាមេរិកដល់អ៊ុយក្រែននៅឆ្នាំនេះ ដែលជាផ្នែកមួយនៃកញ្ចប់ជំនួយដែលបានសន្យាចំនួន ២.៣ ពាន់លានដុល្លារសម្រាប់កិច្ចខិតខំប្រឹងប្រែងស្តារអ៊ុយក្រែនឡើងវិញបន្ទាប់ពីសង្គ្រាមជាមួយប្រទេសរុស្ស៊ី ។ នេះបើយោងតាមការចេញផ្សាយរបស់សារពត៌មាន Yonhap កាលពីទី១៨ ខែ មេសាកន្លងទៅ ។

រដ្ឋមន្ត្រីក្រសួងហិរញ្ញវត្ថុកូរ៉េខាងត្បូងលោក Choi Sang-mok បានបង្ហាញផែនការនេះ ក្នុងអំឡុងកិច្ចប្រជុំតុមូលជាមួយមន្ត្រីអ៊ុយក្រែនដែលធ្វើឡើងនៅទីក្រុងវ៉ាស៊ីនតោន ខណៈដែលលោកប្រធានាធិបតី Yoon Suk Yeol បានសន្យាផ្តល់ជំនួយចំនួន ២.៣ ពាន់លានដុល្លារដល់អ៊ុយក្រែន ក្នុងអំឡុងកិច្ចប្រជុំកំពូលក្រុមប្រទេស G20 នៅទីក្រុង New Delhi កាលពីខែកញ្ញា ឆ្នាំ២០២៣ ។

រដ្ឋាភិបាលទីក្រុងសេអ៊ូលគ្រោងនឹងផ្តល់ជំនួយដំបូងចំនួន ២០០ លានដុល្លារនៅឆ្នាំនេះក្នុងទម្រង់ជាជំនួយមនុស្សធម៌ សម្រាប់ការឆ្លើយតបទៅនឹងតម្រូវការបន្ទាន់ក្នុងប្រទេសអ៊ុយក្រែន ហើយទឹកប្រាក់ចំនួន ២.១ ពាន់លានដុល្លារដែលនៅសេសសល់នឹងត្រូវផ្ដល់ឲ្យជាកម្ចីរយៈពេលវែង ការប្រាក់ទាប តាមរយៈកិច្ចសហប្រតិបត្តិការមូលនិធិ អភិវឌ្ឍន៍សេដ្ឋកិច្ច (EDCF) ដែលនឹងចាប់ផ្តើមនៅឆ្នាំ ២០២៥ ។

គួរបញ្ជាក់ថា ប្រទេសកូរ៉េខាងត្បូងបានចាប់ផ្តើមកម្មវិធី EDCF ក្នុងឆ្នាំ ១៩៨៧ ដោយមានគោលបំណងគាំទ្រដល់គម្រោងហេដ្ឋារចនាសម្ព័ន្ធសេដ្ឋកិច្ច និងសង្គមនៅក្នុងប្រទេសកំពុងអភិវឌ្ឍន៍ ។ ទន្ទឹមនោះប្រទេសកូរ៉េខាងត្បូងក៏នឹងបរិច្ចាគ ៥០ លានដុល្លារដល់ធនាគារពិភពលោក និងធនាគារអឺរ៉ុបមួយចំនួនសម្រាប់ការកសាងឡើងវិញ និងការអភិវឌ្ឍន៍ជួយដល់អ៊ុយក្រែនផងដែរ ៕

អត្ថបទ ៖ ប៊ុន សុភាព