Connect with us

ព័ត៌មានជាតិ

អគ្គនាយកស៊ីម៉ាក់ ថា ការដោះសំណល់យុទ្ធភណ្ឌសង្គ្រាមនៅបាតទន្លេ ធានាសុវត្ថិភាពការដឹកជញ្ជូនតាមផ្លូវទឹក

បានផុស

នៅ

ការបោសសម្អាតសំណល់យុទ្ធភណ្ឌមិនទាន់ផ្ទុះនៅបាតទន្លេ ពិតជាមានសារសំខាន់ណាស់ក្នុងការពង្រឹងសន្តិសុខជាតិ និងសុវត្ថិភាពការដឹកជញ្ជូនតាមផ្លូវទឹក។ នេះជាការលើកឡើងរបស់លោក ហេង រតនា​ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃមជ្ឈមណ្ឌលសកម្មភាពកំចាត់មីនកម្ពុជា (CMAC)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងវេទិកាសាធារណៈស្ដីពីកិច្ចប្រតិបត្តិការបោសសំអាតគ្រាប់យុទ្ធភណ្ឌមិនទាន់ផ្ទុះ និងស្រង់នាវាលិចក្នុងបាតទន្លេ នាថ្ងៃទី២៨ ខែមករា ឆ្នាំ២០២៤​ នៅខេត្តកណ្ដាល លោក ហេង រតនា អគ្គនាយកអង្គភាពស៊ីម៉ាក់ បានថ្លែងដូច្នេះថា៖ «ការបោសសម្អាតសំណល់យុទ្ធភណ្ឌសង្គ្រាម និងនាវាលិចក្នុងបាតទន្លេ មានសារសំខាន់ក្នុងការពង្រឹងសន្តិសុខជាតិ សុខសុវត្ថិភាពការដឹកជញ្ជូនផ្លូវទឹក និងសុខសុវត្ថិភាពប្រជាពលរដ្ឋតាមដងទន្លេ ដែលជាកត្តាចូលរួមដល់ការអភិវឌ្ឍប្រទេសជាតិ»។

លោកអគ្គនាយកស៊ីម៉ាក់ បានគូសបញ្ជាក់ថា ប្រសិនបើមិនមានគ្រាប់យុទ្ធភណ្ឌមិនទាន់ផ្ទុះនៅក្រោមទឹកទេនោះ កម្ពុជា អាចនឹងមាននាវាទេសចរណ៍អន្តរជាតិធំៗចូលមកកាន់ប្រទេសកម្ពុជាតាមដងទន្លេ និងជាភាពងាយស្រួលសម្រាប់ការដឹកជញ្ជូនតាមផ្លូវទឹក ហើយទន្ទឹមនឹងនេះ នៅពេលដែលការបោសសម្អាតសំណល់យុទ្ធភណ្ឌ និងបំណែកនាវាលិចនៅបាតទន្លេរួចរាល់ កម្ពុជា ក៏អាចយកសំណល់យុទ្ធសង្គ្រាម និងបំណែកនាវាទាំងនោះ មកដាក់តាំងបង្ហាញឱ្យសាធារណជន ក៏ដូចជាភ្ញៀវអន្តរជាតិទស្សនាបាន។  

បើតាមរបាយការណ៍របស់លោក ម៉ុង សុគន្ធារ័ត្ន ប្រធាននាយកដ្ឋានកណ្ដាល ទទួលបន្ទុកកងឯកភាពបោសសំអាតមីន ដើម្បីអភិវឌ្ឍន៍ និងអង្គភាពពិសេសប្រតិបត្តិការក្រោមទឹក គឺកម្ពុជា ត្រូវបានរងការវាយប្រហារចំនួន ៣៨៤លើក និងការទម្លាក់គ្រាប់បែកធំៗ ប្រភេទ KM៨៤ ទម្ងន់ ៩២៥គីឡូក្រាម KM៨៣ ទម្ងន់ ៤៥០គីឡូក្រាម KM៨២ ទម្ងន់ ២៣០ គីឡូក្រាម ពីយន្តហោះជាង១ម៉ឺនគ្រាប់នៅតាមដងទន្លេ​ ក្នុងចន្លោះឆ្នាំ១៩៦៩ ដល់ឆ្នាំ១៩៧៣។

មន្ត្រីជំនាញរូបនេះ បានបន្តឱ្យដឹងថា ផ្អែកតាមព័ត៌មានពីប្រជាពលរដ្ឋ ព័ត៌មានស្រាវជ្រាវស៊ើបអង្កេតតាមបច្ចេកទេស និងឯកសារនានា គឺក្នុងអំឡុងសង្គ្រាមឆ្នាំ១៩៧០ ដល់ឆ្នាំ១៩៧៥ សង្គ្រាមមានការបាញ់ប្រហារនាវាដឹកគ្រាប់ជាច្រើននៅតាម ដងទន្លេមេគង្គ ដែលជាក់ស្ដែង នៅភូមិកោះពាមរាំង ឃុំកោះចេក ស្រុកពាមជរ ខេត្តព្រៃវែង គឺអង្គភាពស៊ីម៉ាក់ បានរកឃើញ និងស្រង់គ្រាប់មិនទាន់ផ្ទុះ និងមីន ចេញពីនាវាដែលបានបាញ់លិច បានចំនួនសរុប ២១ ៥៥៦គ្រាប់ និងបំណែកនាវាទម្ងន់ ២២១ ៨០៤គីឡូក្រាម៕

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម