ពលរដ្ឋ៖ ល្បែងស៊ីសងយីហោ V88ឬM9 និង 168 ដំណើរការរលូនក្នុងខណ្ឌឬស្សីកែវ

ភ្នំពេញ ៖  ពលរដ្ឋបានរាយការណ៍ថា មានល្បែងស៊ីសងយីហោ  V88 ឬហៅថា M9  និង 168 ដែលមានទីតាំងនៅជិតផ្សារតូច  សង្កាត់ទួលសង្កែ  ខណ្ឌឬស្សីកែវ  រាជធានីភ្នំពេញ  បើកលេងយ៉ាងរលូនមិនឃើញមានអាជ្ញាធរមានសមត្ថកិច្ចចុះបង្ក្រាបឡើយ ហើយថែមទាំងមានមនុស្សចូលលេងយ៉ាងច្រើនកុះករទៀតផង។

ប្រភពដដែលបានបង្ហើបទៀតថា  ទីតាំងខាងលើបើកទទួលអ្នកញៀនល្បែងចូលលេងជារៀងរាល់ថ្ងៃ  ជាពិសេសថ្ងៃសុក្រ ដល់ថ្ងៃអាទិត្យ ចាប់ពីម៉ោង១២ថ្ងៃត្រង់ រហូតដល់ម៉ោង៥ល្ងាច  មានមនុស្សចូលលេងច្រើន។ លើសពីនេះទៀត អ្នកលេងល្បែងទាំងនោះ បានស្រែកឡូឡា នៅពេលយប់ ក្រោយចេញពីកន្លែងលេង ដែលបង្កការរំខានដល់ប្រជាពលរដ្ឋដែលរស់នៅជិតខាង។

ពាក់ព័ន្ធនឹងបញ្ហានេះ ប្រជាពលរដ្ឋបានស្នើដល់ លោក ឯក  ឃុនដឿន  អភិបាលនៃគណៈអភិបាលខណ្ឌឬស្សីកែវ មេត្តាចុះពិនិត្យមើលទីតាំងល្បែងស៊ីសងខាងលើនេះ  ដើម្បីអនុវត្តតាមគោលនយោបាយភូមិ ឃុំ  មានសុវត្តិភាព៕

សូមបញ្ជាក់ថា  កន្លងមកលោក  ឃួង  ស្រេង  អភិបាលនៃគណៈអភិបាលរាជធានីភ្នំពេញបានបញ្ជាឲ្យអាជ្ញាធរទាំង១៤ខណ្ឌ  បង្ក្រាបឲ្យអស់រាល់ល្បែងស៊ីសងគ្រប់ប្រភេទ។ ពលរដ្ឋលើកឡើងថា បើនៅបន្តឲ្យបើកទីតាំងលេងល្បែងបែបនេះ អាចបង្កឲ្យមានបទល្មើស  លួច  ឆក់  ប្លន់  កើតមានឡើជារៀងរាល់ថ្ងៃ  ធ្វើឲ្យពលរដ្ឋមានការព្រួយបារម្ភ និងភ័យខ្លាច៕