រថយន្តលុចស៊ីស បុកម៉ូតូវ៉េវបណ្តាលឱ្យស្លាប់ម្នាក់និងរបួសធ្ងន់០២នាក់ នៅស្រុកប្រាសាទបាគង

សៀមរាប៖ រថយន្តម៉ាក​ Luxus RX300 បោះពួយក្នុងល្បឿនលឿនបុកម៉ូតូវ៉េវក្នុងទិសដៅបញ្ច្រាសគ្នាបណ្តាលឱ្យអ្នកបើកបរម៉ូតូ ០១ នាក់ស្លាប់ នៅនឹងកន្លែងកើតហេតុភ្លាមៗ និងរបួសធ្ងន់ចំនួន ០២ នាក់។ ហេតុការណ៍នេះកើតឡើងនៅថ្ងៃទី២៤ ខែមេសា ឆ្នាំ២០២២នេះ ត្រង់ចំណុចភូមិគោកត្នោត ឃុំកណ្ដែក ​ស្រុកប្រាសាទបាគង។

លោកវរសេនីយ៍ឯក លឹម សម្បត្តិ អធិការនគរបាលស្រុកប្រាសាទបាគង បានឱ្យដឹងថា​ មានករណីគ្រោះថ្នាក់ចរាចរណ៍ រវាងរថយន្តម៉ាក Luxus RX300 ពណ៌ស ផ្លាកលេខ សៀមរាប 2C-5517 បុកជាមួយម៉ូតូម៉ាក Wav 100 ពណ៌ខ្មៅ ផ្លាកលេខសៀមរាប 1L-9061 ក្នុងទិសដៅច្រាសគ្នា បណ្តាលឱ្យអ្នកបើកបរម៉ូតូ ០១ នាក់ស្លាប់នៅនឹងកន្លែងកើតហេតុភ្លាមៗនិងរបួសធ្ងន់ចំនួន ០២ នាក់ជនរងគ្រោះ មានឈ្មោះ សួន ផើយ ភេទប្រុស អាយុ៣២ឆ្នាំ រស់នៅភូមិល្វា ឃុំត្រពាំងធំ ស្រុកប្រាសាទបាគង។

លោកអធិការនគរបាលស្រុកបាគង បន្ថែមថា មូលហេតុដែលបង្កឱ្យមានករណីគ្រោះចរាចរណ៍នេះ គឺបណ្តាលមកពីរថយន្តបើកបរក្នុងល្បឿនលឿនមិនប្រកាន់ស្ដាំ។ សរុបការខូចខាត ស្លាប់មនុស្សចំនួន ០១ នាក់ របួសធ្ងន់ចំនួន ០២ នាក់ (ស្រី ១ នាក់ និងក្មេងប្រុស ១ នាក់).ខូចម៉ូតូចំនួន ០១ គ្រឿង ខូចរថយន្តចំនួន ០១ គ្រឿង។

លោកបញ្ជាក់ថា ក្រោយកើតហេតុសមត្ថកិច្ចនគរបាលជំនាញបានឃាត់រថយន្ត និងម្ចាស់រថយន្តយកទៅអធិការដ្ឋាននគរបាលស្រុកដើម្បីកសាងសំណុំរឿងតាមវិធី៕

អត្ថបទ៖ កុសល