សន្តិសុខសង្គម

សង្វេគណាស់! ក្មេងប្រុសអាយុ២ខួប ធ្លាក់លូបង្គន់ស្លាប់

បានផុស

២ years មុន

នៅ

ថ្ងៃព្រហស្បតិ៍ ២ មិថុនា ២០២២

ដោយ

តាកែវ ៖ ក្មេងតូចអាយុ២ខួបម្នាក់ បានស្លាប់បាត់បង់ជីវិតក្នុងលូរំដោះទឹកបង្គន់ក្រោយផ្ទះ ក្រោយជីដូនជាប់ដៃធ្វើការងារផ្ទះមិនបានមើលចៅ។

ករណីក្មេងលង់ទឹកលូបង្គន់នេះ កើតឡើងនៅថ្ងៃទី០២ ខែមិថុនា ឆ្នាំ២០២២ វេលាម៉ោង១២និង៣០នាទីថ្ងៃត្រង់ ស្ថិតក្នុងភូមិរវៀង ឃុំ រវៀង ស្រុកសំរោង ខេត្តតាកែវ ដែលក្មេងរងគ្រោះឈ្មោះ ទូច សំណាង អាយុ០២ឆ្នាំ រស់នៅភូមិ ឃុំកើតហេតុខាងលើ។

សមត្ថកិច្ចស្រុកសំរោងបានឲ្យដឹងថា ក្មេងរងគ្រោះនៅជាមួយជីដូន ដោយម្តាយទៅធ្វើការរោងចក្រ ស្របពេលដែលជីដូនកំពុងរវល់ធ្វើការងារផ្ទះ គេក៏បានដើរទៅលេងខាងក្រោយផ្ទះ បណ្តាលឲ្យធ្លាក់ចូលក្នុងលូរំដោះទឹកបង្គន់នៅខាងក្រោយផ្ទះដែលគេមិនបានបិទគម្របលង់ស្លាប់តែម្តង។

សមត្ថកិច្ចបន្តថា ក្រោយកើតហេតុកម្លាំងជំនាញរបស់អធិការដ្ឋាននគរបាលស្រុក សហការជាមួយកម្លាំងប៉ុស្ដិ៍នគរបាលរដ្ឋបាលរវៀង បានចុះទៅកន្លែងកើតហេតុពិនិត្យសពនិងសន្និដ្ឋានថា ក្មេងរងគ្រោះពិតជាបានស្លាប់ដោយលង់ទឹកពិតប្រាកដមែន និងប្រគល់ទៅក្រុមគ្រួសារដើម្បីយកទៅធ្វើបុណ្យតាមប្រពៃណី។

ជាការក្រើនរំឮកផងដែរថា សូមអាណាព្យាបាលដែលមានកូនតូចៗ ត្រូវយកចិត្តទុកដាក់មើលថែពួកគាត់ឲ្យបានដិតដល់កុំធ្វេសប្រហែស១វិនាទីឡើយ ព្រោះថា ជាញឹកញាប់ណាស់ក្នុងពេលកន្លងមកនេះ តែងតែកើតមានករណីក្មេងតូចៗដែលកំពុងពេញស្រឡាញ់ត្រូវបានលង់ទឹកស្លាប់ជាបន្តបន្ទាប់ ព្រោះតែការធ្វេសប្រហែសនៃអាណាព្យាបាល៕

ដោយ ៖ វីរៈ