ទឹកហូរបុក​បាក់ស្ពានឈើ​ឆ្លងទៅភូមិ​កណ្ដាល​ពលរដ្ឋ​ត្រូវឆ្លង​តាមទូកដរវិញ​

ប្រជាពលរដ្ឋ​នៅភូមិកណ្ដាល​បានឲ្យដឹងថា ​ស្ពានឈើស្ថិតនៅចំណុច​ប៉ុស្តិ៍ផ្សារឆ្នាំង ​ក្នុងភូមិកណ្ដាល សង្កាត់ផ្សារឆ្នាំង ក្រុងកំពង់ឆ្នាំង​ ត្រូវកម្លាំងទឹកហូរ​នាំកំប្លោក​ពីទំនប់បារាំងបុកបាក់ខូចខាតប្រមាណ ៥,៦ ម៉ែត្រកាលពីម៉ោង ១២ ថ្ងៃត្រង់ ទី ២៥ ខែកក្កដា ឆ្នាំ ២០២២ ដូច្នេះប្រជាពលរដ្ឋដែលត្រូវធ្វើដំណើរទៅមកឆ្លងកាត់ព្រែកមួយនេះត្រូវតែជិះទូកដរចម្លងវិញ។

ទាក់ទងនឹងករណីនេះលោក ហីង ភ័ពមីនា អភិបាលរងក្រុងកំពង់ឆ្នាំងនៅរសៀលថ្ងៃទី ២៥ នេះ បានឲ្យដឹងថា ការបាក់ស្ពានលោកអភិបាលក្រុងកំពង់ឆ្នាំង បានជ្រាបហើយ ដែលលោក​កំពុង​សុំ​យោបល់ លោកអភិបាលខេត្តដើម្បីជួសជុល​ឡើវិញ។

ព្រោះថា ចំណុចដែលស្ពានបាក់នេះគឺជាចំណុច ចន្លោះស្ពានឈើដែលគេត្រូវលើកចេញពេលទឹកទន្លេឡើងស្មើនឹងស្ពាននេះ សម្រាប់ឱ្យកាណូត​ចេញចូល ហើយកាលពីសប្តាហ៍មុនយើងក៏បានជួស​ជុលអស់ជាងមួយលានរៀលរួច​ទើបបានដំណើរការឆ្លងបានវិញ ដូច្នេះពេលនេះបើយើងមានថវិកានឹងអាចជួសជុលបានវិញ៕

អត្ថបទ៖ ឈៀង ថារិទ្ធ