ចាប់ខ្លួនស្ត្រីជនជាតិវៀតណាម២នាក់ ដើរលក់ឆ្នោតនៅផ្សារបន្លែច្បារអំពៅ

ស្ត្រីជនជាតិវៀតណាមចំនួន២នាក់ត្រូវបានកម្លាំងសន្តិសុខផ្សារបន្លែច្បារអំពៅ ដែលមានទីតាំងស្ថិតនៅភូមិកណ្តាលសង្កាត់ច្បារអំពៅទី២ ខណ្ឌច្បារអំពៅ ធ្វើការឃាត់ខ្លួន ខណៈដែលស្ត្រីទាំង២ដើរលក់ឆ្នោតជាតិវៀតណាមប្រឆាំងនឹងបទល្មើសល្បែងសុីសងគ្រប់ប្រភេទ។

យោងតាមប្រភពពីលោក សាន់ ប៊ុនណា ប្រធានគណកម្មការផ្សារបន្លែច្បារអំពៅ​ បានឲ្យដឹងថា ការឃាត់ខ្លួនស្ត្រីជនជាតិវៀតណាមទាំង២នាក់ខាងលើ ខណៈពេលដែលពួកគាត់កាន់ឆ្នោតជាតិវៀតណាមដើរលក់ក្បែរផ្សារនៅវេលាម៉ោង៩និង៣០នាទីព្រឹកថ្ងៃទី២០ ខែកញ្ញានេះ។

លោកប្រធានគណកម្មការផ្សារបន្លែបានបញ្ជាក់ថា ស្ត្រីជនជាតិវៀតណាមរូបនេះត្រូវបានបញ្ជូនទៅនគរបាលខណ្ឌច្បារអំពៅ ចាត់ការតាមផ្លូវច្បាប់។ ដោយឡែកក្នុងបរិវេណផ្សារបន្លែ គឺពុំមានបងប្អូនអាជីវករណាម្នាក់ហ៊ានលេងល្បែងក្នុងផ្សារឡើយបន្ទាប់ពីប្រមុខរាជរដ្ឋាភិបាលសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាចេញបទបញ្ជារយ៉ាងតឹងរុឹងមិនអនុញាតិឲ្យមានល្បែងសុីសងគ្រប់ប្រភេទជាបន្តទៀតឡើយ៕

អត្ថបទ៖ ឌី រៀ