​កន្លែងកម្សាន្តមាត់ច្រាំងទន្លេ​មុខវត្តព្រែកប្រា​កំពុងរងការបាក់ស្រុត​

នាយករងរដ្ឋបាល​សាលាខណ្ឌច្បារអំពៅ​លោក យី ធីរ៉ាត់បានឲ្យដឹង​នៅរសៀលថ្ងៃទី ៣ ខែវិច្ឆិកានេះថា ​ទីលានកម្សាន្ត​ស្ថិតនៅ​តាមបណ្តោយផ្លូវ៣៦៩ មុខវត្តព្រែកប្រាក្នុងភូមិអូរអណ្តូង​ សង្កាត់ព្រែកប្រា ខណ្ឌច្បារអំពៅ រាជធានីភ្នំពេញកំពុងរងការបាក់ស្រុតជ្រុងខាងជើង និងបន្តបាក់ថែមទៀត។

លោក យី ធីរ៉ាត់ថ្លែងថា «ដូច្នេះហើយទើបតាងនាមជានាយករងរដ្ឋបាលសាលាខណ្ឌសូមធ្វើការផ្សព្វផ្សាយជូនដល់បងប្អូនប្រជាពលរដ្ឋដែលតែងទៅលេងកម្សាន្តសូមមេត្តាប្រុងប្រយ័ត្នព្រោះនាំឲ្យគ្រោះថ្នាក់ដល់អាយុជីវិត»។

លោក យី ធីរ៉ាត់ បានបញ្ជាក់ទៀតថា ដីដែលកំពុងបាក់នេះគឺជា​ច្រាំងទន្លេហើយ​នៅបន្តបាក់ទៀតបើសិន​ជាមានបងប្អូនប្រជាពលរដ្ឋលោកនាំគ្នា​បើករថយន្តទៅឈប់សំចត​លើទីលាននោះ។

ចំពោះសភាពការបាក់ដីច្រាំងខាងលើនេះដែរ សាលាខណ្ឌច្បារអំពៅ​បានធ្វើរបាយ​ការណ៍គោរពជូនទៅសាលារាជធានីភ្នំពេញ​រួចរាល់ហើយដើម្បីឲ្យផ្នែកជំនាញ​មកត្រួតពិនិត្យនឹងមានវិធានការណ៍ចាក់ថ្មរទប់ស្កាត់កុំឲ្យបាក់ដីបន្តទៀត។

គួរបញ្ជាក់ថាទីតាំង​ដីវាលខាងលើនេះត្រូវបានគណកម្មការ​វត្តព្រែកប្រារួមទាំងពុទ្ធបរិស័ទ្ធ​នឹងអាជ្ញាធរធ្វើការសាងសង់ជាទីលានសម្រាប់ឲ្យប្រជាពលរដ្ឋទៅហាត់ប្រាណក៏ស្រាប់តែជួបគ្រោះបាក់ដៃតែម្តងទៅ៕

អត្ថបទ៖ នរា