ព័ត៌មានបន្ទាន់៖ មុខសញ្ញាពិរុទ្ធជន ៣ នាក់ លួចរត់ចេញពីពន្ធនាគារ​ខេត្តក្រចេះ

ស្នងការដ្ឋាននគរបាលខេត្តក្រចេះ នៅថ្ងៃទី១៦ ខែវិច្ឆិកា ឆ្នាំ២០២២នេះ បានប្រកាសតាមចាប់ខ្លួនជនត្រូវចោទ ចំនួន៣នាក់ ដែលកំពុងជាប់ឃុំនៅពន្ធនាគារខេត្តក្រចេះ ក្នុងបន្ទប់ធ្វើចត្តាឡីស័ក ដែលបានលួចរត់គេចខ្លួនចេញពីពន្ធនាគារ។

មន្ត្រីពន្ធនាគារបានបញ្ជាក់ប្រាប់បណ្តាញព័ត៌មានឲ្យដឹងថា នៅយប់ថ្ងៃទី១៥ ខែវិច្ឆិកា ឆ្នាំ២០២២ ចន្លោះម៉ោង ១១ៈ២២​នាទីយប់ ដល់ម៉ោង ១១ៈ៣៧នាទីយប់ មានជនត្រូវចោទចំនួន ០៣ នាក់ ដែលកំពុងជាប់ឃុំនៅពន្ធនាគារខេត្តក្រចេះក្នុងបន្ទប់ធ្វើចត្តាឡីស័ក បានលួចរត់គេចខ្លួនចេញពីពន្ធនាគារបានសម្រេច។

ជនត្រូវចោទទាំង ៣នាក់ មានឈ្មោះដូចខាងក្រោម៖

១៖ ជនត្រូវចោទឈ្មោះ ញិហ៍ តុលា ហៅ អ៊ួច អាយុ ៣២ឆ្នាំ ជនជាតិខ្មែរ មានទីកន្លែងកំណើត នៅភូមិស្វាយ ឃុំឫស្សីកែវ ស្រុកព្រែកប្រសព្វ ខេត្តក្រចេះ ទីលំនៅមុនពេលចាប់ខ្លួន ភូមិស្វាយជ្រុំ ឃុំឫស្សីកែវ ស្រុកព្រែកប្រសព្វ ខេត្តក្រចេះ។

២៖ ជនត្រូវចោទឈ្មោះ ជឿន ស អាយុ ៣៥ឆ្នាំ ជនជាតិខ្មែរ មានទីកន្លែងកំណើត នៅភូមិទី១ ឃុំព្រែកអាជី ស្រុកក្រូចឆ្មា ខេត្តកំពង់ចាម ទីលំនៅមុនពេលចាប់ខ្លួន ភូមិទី១ ឃុំព្រែកអាជី ស្រុកក្រូចឆ្មារ ខេត្តកំពង់ចាម។

៣៖ ជនត្រូវចោទឈ្មោះ ពេជ្រ ប្រិមប្រិយ៍ អាយុ ២៣ឆ្នាំ ជនជាតិខ្មែរ មានទីកន្លែងកំណើត នៅភូមិមានជ័យ ឃុំស្រែចា ស្រុកស្នួល ខេត្តក្រចេះ ទីលំនៅមុនពេលចាប់ខ្លួន ភូមិមានជ័យ ឃុំស្រែចារ ស្រុកស្នួល ខេត្តក្រចេះ។

ស្នងការដ្ឋាននគរបាលខេត្តក្រចេះបានអំពាវនាវ​ដល់ «បងប្អូនប្រជាពលរដ្ឋដែល​បានប្រទះឃើញជនជាប់ឃុំដែលមានភិនភាគដូចក្នុងរូបថតនេះ សូមសហការរាយការណ៍មកអាជ្ញាធរមានសមត្ថកិច្ចដើម្បីធ្វើការចាប់ខ្លួនមកវិញ។

បច្ចុប្បន្ន កម្លាំងនគរបាលនៃស្នងការដ្ឋាននគរបាលខេត្ត បានពង្រាយកម្លាំងតាមស្វែងរកជនត្រូវចោទដែលរត់គេចចេញពីពន្ធនាគារ៕

អត្ថបទ៖ វិធិន