ជនសង្ស័យម្នាក់ជិះកង់មកប្លន់យកម៉ូតូពីនារីម្នាក់បានសម្រេច ហើយព្យាយាមជិះគេចខ្លួនតែត្រូវជនរងគ្រោះស្រែកចោរៗផ្អើលដល់ប្រជាពលរដ្ឋជួយដេញចាប់បានព្រួតវាយម្នាក់មួយដៃមួយជើងទើបប្រគល់ឲ្យសមត្ថកិច្ច។

ករណីនេះបានកើតឡើងកាលពីវេលាម៉ោង១០និង២០នាទីយប់ ថ្ងៃច័ន្ទ ទី១៩ ខែធ្នូ ឆ្នាំ២០២២ ស្ថិតនៅតាមបណ្ដោយផ្លូវបេតុងផ្សារដីថ្មី ក្នុងសង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ  ។

តាមសម្ដីនារីរងគ្រោះបានឲ្យដឹងថា មុនពេលកើតហេតុរូបគាត់កំពុងអង្គុយលើម៉ូតូរបស់ខ្លួនម៉ាក ប៊ីត ពណ៌ស លាយក្រហម ពាក់ផ្លាកលេខភ្នំពេញ1JL-3822 ខណ:ពេលនោះស្រាប់តែលេចមុខជនសង្ស័យម្នាក់ជិះកង់មកឈប់ក្បែរម៉ូតូរបស់ខ្លួន រួចធ្វើសកម្មភាពច្រានរូបគាត់ធ្លាក់ពីលើម៉ូតូហើយជនសង្ស័យបានឡើងជិះម៉ូតូគេចខ្លួនតាមបណ្ដាយផ្លូវចោមចៅ ភ្លាមៗនារីរងគ្រោះស្រែកចោរៗភ្ញាក់ផ្អើលប្រជាពលរដ្ឋជួយដេញពីក្រោយរហូតមកដល់ផ្លូវ២១៧ចំណុចមុខការ៉ាសសំាងកាល់តិចទើបចាប់ជនសង្ស័យបាន និងវាយម្នាក់មួយដៃជើងឡើងទ្រមខ្លួនទើបប្រគល់ឲ្យសមត្ថកិច្ច។

ក្រោយកើតហេតុ សមត្ថកិច្ចមូលដ្ឋាបានចុះទៅដល់ និងបាននាំជនសង្ស័យ និងជនរងគ្រោះទៅប៉ុស្ដិ៍នគរបាលរដ្ឋបាលស្ទឹងមានជ័យទី៣ ដើម្បីសួរនាំ និងដាក់ពាក្យបណ្ដឹងដើម្បី កសាងសំណុំរឿងបញ្ជូនខ្លួនទៅសាលាដំបូងរាជធានីភ្នំពេញចាត់តាមច្បាប់៕

អត្ថបទ៖ សុខា