ឆេះផ្ទះលក់រថយន្ដមួយកន្លែង ខូចខាត​រថយន្ដ៣​គ្រឿង​ទាំងព្រឹក

ផ្ទះលក់រថយន្ដមួយកន្លែងត្រូវបានអគ្គិភ័យឆាបឆេះ និងបណ្ដាលខូចខាតរថយន្ដស៊េរីទំនើបចំនួន៣គ្រឿងទាំងស្រុង តែមិនបណ្ដាលឲ្យមានអ្នករងរបួសនោះទេ។

ករណីអគ្គិភ័យនេះបានកើតឡើងកាលពីវេលាម៉ោង៥និង០០នាទី ព្រឹកថ្ងៃទី១០ ខែមករា ឆ្នាំ២០២៣ នៅចំណុចផ្ទះលេខ​២៣២ ផ្លូវ១៨២ ភូមិ០៦ សង្កាត់ ដេប៉ូទី១ ខណ្ឌទួលគោក រាជធានីភ្នំពេញ ។

យោងតាមរបាយការណ៍ពីប៉ុស្តិនរគបាលរដ្ឋបាលផ្សារដេប៉ូទី១ បានបង្ហាញថា ម្ចាស់ផ្ទះមានឈ្មោះ សល់ ម៉េងស៊ឺ ភេទប្រុស អាយុ២០ឆ្នាំ ទំហំឃ្លាំង ( ១២x ៦០ ) ខូចខាតរថយន្ត៣គ្រឿង ម៉ាក លុចស៊ីស LM រថយន្តម៉ាក តូយ៉ូតា ស្វរ៉េនណឺ រថយន្ត ម៉ាកបេលី ( ពណ៌ខ្មៅទាំងបី គ្មានអ្នករងគ្រោះទេ )។

ក្នុងរបាយការណ៍បានបញ្ជាក់ថា អគ្គិភ័យនេះបានរលត់ទៅវិញនៅ៥និង៣០នាទី ប្រើប្រាស់រថយន្ដពន្លត់អគ្គិភ័យរបស់ការិយាល័យនគរបាលបង្ការពន្លត់អគ្គិភ័យនិងសង្គ្រោះ របស់ស្នងការដ្ឋាននគរបាលរាជធានីភ្នំពេញ ចំនួន១៧គ្រឿង ប្រើប្រាស់ទឹកអស់ចំនួន៦៨មែត្រគូប៕