លោក ផែង វណ្ណៈ ប្ដឹងឈ្មោះ​ នី​ ណាក់ ម្ចាស់​គណនី​ហ្វេសប៊ុក​ IMAN-KH ទារសំណង​៥០​លានរៀល

លោក ផែង វណ្ណៈ បានសម្រេចដាក់ពាក្យបណ្ដឹងចូលសាលាដំបូងរាជធានីភ្នំពេញ នៅព្រឹក​ថ្ងៃទី​២៥​ ខែ​មករា​ ឆ្នាំ​២០២៣ នេះ ប្ដឹងលើឈ្មោះ នី​ ណាក់​ ម្ចាស់​គណនី​ហ្វេសប៊ុក​ IMAN-KH ពីបទ​ ជេរប្រមាថ​ជាសាធារណៈ​ និង​បរិហារកេរ្តិ៍​ជាសាធារណៈ​ និងទារសំណងជំងឺចិត្តចំនួន៥០លានរៀល។

ក្នុងពាក្យបណ្ដឹង លោក ផែង វណ្ណៈ ប្តឹងឈ្មោះ នី ណាក់ ភេទប្រុស អាយុ៤៣ឆ្នាំ ជនជាតិខ្មែរ សញ្ជាតិខ្មែរ មានទីលំនៅបច្ចុប្បន្នផ្ទះ គ្មានលេខ ផ្លូវលេខ8BT ក្រុមទី២ ភូមិសន្សំកុសល១ សង្កាត់បឹងទំពុន១ ខណ្ឌមានជ័យ រាជធានីភ្នំពេញ ពីបទបរិហារកេរ្តិ៍ជាសាធារណៈ និងជេរប្រមាថជាសាធារណៈ ប្រព្រឹត្តនៅរាជធានីភ្នំពេញ កាលពីថ្ងៃទី២៣ ខែមករា ឆ្នាំ២០២៣។

បើតាមពាក្យបណ្ដឹងគោរពជូនព្រះរាជអាជ្ញាអយ្យការអមសាលាដំបូងរាជធានីភ្នំពេញ លោក ផែង វណ្ណៈ បានរៀបរាប់ថា កាលពីថ្ងៃទី២៣ ខែមករា ឆ្នាំ២០២៣ ឈ្មោះ នី ណាក់ បានសរសេរសារនៅក្នុងគណនីហ្វេសប៊ុក (facebook) របស់ខ្លួនឈ្មោះ IMan-KH ដែលមានខ្លឹមសារថា «មិនដឹងថាទៅលុតជង្គង់ សំដែងធ្វើជាសែននៅផ្ទះឧកញ៉ាណាម្នាក់ឡើយ ឬគេហៅទៅស៊ីផឹកពេលសែនក៏ថតយកប៉េ ព្រោះចូលចិត្តការពារគ្នាគេ តាមពិតពីមុនមកមិនដែលឃើញសែន ស្អីទេ។ មនុស្សរស់ដោយសារយកមុខ…»

លោក ផែង វណ្ណៈ យល់ថា សំណេររបស់ឈ្មោះ ឌី ណាក់ ដែលបានសរសេរ និងបង្ហោះជាសាធារណៈ គឺជាការបរិហារកេរ្ដិ៍ជាសាធារណៈ ព្រោះខ្លឹមសារដែលឈ្មោះ នី ណាក់ សរសេរជាការអះអាងបំផ្លើស ដោយអសុទ្ធចិត្តធ្វើឱ្យ​សារធាណៈ​ជនមានការយល់ច្រឡំ បណ្តាលឱ្យប៉ះពាល់ដល់កិត្តិយសរបស់លោកយ៉ាងធ្ងន់ធ្ងរ។ ម្យ៉ាងវិញទៀតសំណេរខាងលើនេះ ក៏បានប្រើពាក្យជេរប្រមាថជាសារធារណៈមកលើលោកផងដែរ “គេហៅទៅស៊ីផឹកពេលសែនក៏ថតយកប៉េ”។

លោក ផែង វណ្ណៈ ចាត់ទុកសកម្មភាពរបស់ឈ្មោះ នី ណាក់ ជាបទល្មើសព្រហ្មទណ្ឌដែលមានចែងក្នុងមាត្រា ៣០៧ នៃក្រមព្រហ្មទណ្ឌ។

ជាមួយគ្នានេះ លោក ផែន វណ្ណៈ ក៏សូមឲ្យតុលាការផ្ដន្ទាទោសបុគ្គលឈ្មោះ នី ណាក់ តាមផ្លូវច្បាប់ និងទាសំណងជំងឺចិត្ត និងការខូចខាតចំនួន៥០លានរៀល។

សូមបញ្ជាក់ថា បន្ទាប់ពីបង្ហោះនៅលើបណ្ដាញសង្គមនូវខ្លឹមសារខាងលើ នៅថ្ងៃទី២៤ ខែមករា នេះ លោក នី ណាក់ ក៏បានបង្ហោះសារសុំទោសលោក ផែង វណ្ណៈ ផងដែរ ដែលលោកមិនដឹងថា ផ្ទះដែលលោក ផែង វណ្ណៈ ថតបង្ហោះនោះ ជាផ្ទះរបស់លោក ផែង វណ្ណៈ។

លោក នី ណាក់ បានសរសេរថា «ខ្ញុំបាទម្ចាស់ផេក សូមសុំទោសផងលោក ផែង វណ្ណៈ ខ្ញុំខុសដែលមិនបានដឹងថា លោកថតសែន គឺជាផ្ទះរបស់លោក។ សូមលោកមេត្តាអធ្យាស្រ័យតាមការគួរ សង្ឃឹមថាលោកនឹងអត់ឱនដល់ខ្ញុំបាទដោយសេចក្តីអនុគ្រោះ។ បើជាផ្ទះរបស់លោក ខ្ញុំក៏សូមំដែងនូវការរីករាយ និងសាទរ ហើយសូមជូនពរលោកមានលាភ មានហេងៗតាមការបួងសួងទៅចុះ»៕

អត្ថបទ៖ សុខុម