សន្តិសុខសង្គម

ល្បិចធ្វើជាជ្រុះថង់មាស រួចយកទៅចែកមាសគ្នាដើម្បីឆបោក សំណាងជនរងគ្រោះដឹងខ្លួនទាន់ ស្រែកផ្អើលរត់ចោលម៉ូតូ

បានផុស

៣ years មុន

នៅ

ថ្ងៃសុក្រ ១០ កុម្ភៈ ២០២៣

ដោយ

ភ្នំពេញ ៖ ក្រុមទម្លាក់យោងល្បួងនារីកម្មការិនីរោងចក្រម្នាក់ដឹកយកទៅចែកមាសគ្នាតែសំណាងអាក្រក់ជនរងគ្រោះដឹងខ្លួនទាន់ស្រែកផ្អើលអ្នកដំណើរជនសង្ស័យភ័យពេករត់ចោលម៉ូតូមួយគ្រឿងហេតុការណ៍ខាងលើ កើតឡើងកាលពីវេលាម៉ោង៣និង៤៥នាទីរសៀល ថ្ងៃទី១០ ខែកុម្ភៈ ឆ្នាំ២០២៣ នៅផ្លូវបេតុង មាត់ប្រឡាយ ស្ថិតនៅក្នុងភូមិព្រៃសាលា សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ។

តាមប្រភពនៅកន្លែងកើតហេតុ បានឲ្យដឹងថា នារីរងគ្រោះជាកម្មការនីរោងចក្រ ហើយមុនកើតហេតុ គ្រាដែលទើបបើកប្រាក់ខែថ្មីៗ ដើរចេញពីរោងចក្រ ភូមិត្រពាំងជ្រៃ សង្កាត់កាកាបទី២ ខណ្ឌពោធិ៍សែនជ័យ ត្រូវបានក្រុមជនសង្ស័យ ប្រើល្បិចធ្វើជាជ្រុះថង់មាស រួចចាប់ផ្តើមលួងនាំនារីរងគ្រោះ ទៅរកកន្លែងណាស្ងាត់ ដើម្បីចែកគ្នា ល្បួងបានសម្រេច ឌុបតាមម៉ូតូ ហុងដាឌ្រីម ពណ៌ខ្មៅ ស៊េរីឆ្នាំ២០១៤ ចេញទៅដល់ផ្លូវបេតុងមាត់ប្រឡាយ ក្នុងភូមិព្រៃសាលា សង្កាត់កាកាបទី២ ស្រាប់តែនារីរងគ្រោះ ភ្ញាក់ដឹងខ្លួនចាញ់បោកបញ្ឆោតគេហើយ ក៏ស្រែកឲ្យគេឯងជួយ ផ្អើលអ្នកដំណើរតាមផ្លូវ លុះឃើញសភាពមិនស្រួល ជនសង្ស័យប្រុសស្រី២នាក់ ជិះម៉ូតូមួយគ្រឿងចាកចេញគេចទៅបាត់ នៅសល់ជនសង្ស័យប្រុស២នាក់ រត់ចោលម៉ូតូ ហុងដាឌ្រីមមួយគ្រឿង។

ក្រុមជនសង្ស័យឆបោកនេះ ក្រោយពីផែនការសកម្មភាពបរាជ័យហើយ ក៏បានអស់ម៉ូតូមួយគ្រឿងទៀត។ ក្រោយកើតហេតុសមត្ថកិច្ចចុះទៅ យកម៉ូតូទៅរក្សាទុក ដើម្បីស្រាវជ្រាវស្វែងរកម្ចាស់ និងនាំនារីរងគ្រោះ ទៅសាកសួរនៅប៉ុស្តិ៍នគរបាលដើម្បីធ្វើកំណត់ហេតុ៕

ដោយ ៖ សុខា