បើកការស៊ើបសួរបុរសម្នាក់យកកាំភ្លើងគំរាមជាងកាត់សក់

លោក សេង ម៉េងស្រ៊ន ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញកាលពីថ្ងៃទី ០៥ ខែឧសភា ឆ្នាំ២០២៣ បានបើកការស៊ើបសួរលើបុរសម្នាក់ ដែលបានស្រែកជេរឡូឡា និងយកកាំភ្លើងទៅភ្ជង់គំរាមជាងកាត់សក់​ក្នុង​ហាងយីហោ RHM ស្ថិតនៅតាមបណ្តោយផ្លូវលេខ ៤៣២ សង្កាត់បឹងត្របែក ខណ្ឌចំការមន រាជធានីភ្នំពេញ។

បុរសជនសង្ស័យឈ្មោះ លឹម សុងឆ័យ អាយុ៣៣ ឆ្នាំ មុខរបរ ជាអាជីវករលក់ដូរ រស់ស្នាក់នៅសង្កាត់ទួលទំពូង១ ខណ្ឌចំការមន រាជធានីភ្នំពេញ។

បុរសនោះត្រូវបានសមត្តកិច្ចនគរបាលចាប់បញ្ជូនខ្លួនទៅសាលាដំបូងរាជធានីភ្នំពេញ បន្ទាប់ពីរូបគេធ្វើសកម្មភាពស្រែកជេរឡូឡា និងយកកាំភ្លើងគំរាម ក្នុងហាងកាត់សក់យីហោ RHM ធ្វើឲ្យមានការភ្ញាក់ផ្អើល។

កាលពីថ្ងៃទី ២ ខែឧសភា ឆ្នាំ២០២៣ បុរសនោះបានទៅស្រែកជេរឡូឡា និងយកកាំភ្លើងសគំរាមអ្នកដទៃ ហើយត្រូវបុគ្គលិកនៅក្នុងហាង ហាមឃាត់កុំឲ្យសើចលឺព្រោះរំខានដល់ភ្ញៀវមកកាត់សក់នៅទីនោះដែរ។

តាមរយៈវីដេអូដែលត្រូវបានគេចែកចាយលើបណ្ដាញសង្គមនៅថ្ងៃខែខាងលើបានបង្ហាញថា បុរសម្នាក់នោះស្លៀកខោ​ខូវប៊យ ពាក់អាវយឺតលឿង ជិះរថយន្តទំនើប១គ្រឿងពាក់ស្លាកលេខ ២២២២ បានចូលទៅក្នុងហាងកាត់សក់យីហោ RHM រួចស្រែកជេរគេជេរឯង។

មួយសន្ទុះក្រោយមកបុរសនោះបានដើរចេញទៅក្រៅ ទំនងចូលក្នុងរថយន្តក៏យកគ្រាប់កាំភ្លើងពិតមកបាចនៅក្នុងហាង បង្កឲ្យមានការភ័យខ្លាចដល់ជាងកាត់សក់ និងភ្ញៀវដទៃទៀតដែលកំពុងអង្គុយរង់ចាំកាត់សក់។ បន្ទាប់មកទៀតបុរសនោះបានដើរចេញវិញ និងបានយកកាំភ្លើងខ្លីសៀតចង្កេះ សោយអាវឡើងលើ ដើម្បីគំរាមជាងកាត់សក់ទំនងចង់បញ្ជាក់ថា ខ្លួនមានកាំភ្លើង។

ក្នុងរូបភាពវីដេអូនោះទៀតបានបញ្ជាក់ថា ទាំងជាងកាត់សក់ និងភ្ញៀវនៅក្នុងហាង មានការភ័យខ្លាចយ៉ាងខ្លាំងរហូតអ្នកខ្លះលើកដៃសំពះអង្វរសុំឲ្យបុរសនោះបញ្ឍប់សកម្មភាព ខណៈភ្ញៀវដទៃបានរត់ចេញពីហាងទាំងព្រលឹងចុងសក់។

ទង្វើទាំងអស់នោះហើយដែលធ្វើឲ្យសមត្តកិច្ចឈានដល់ការឃាត់ខ្លួន និងកសាងសំណុំរឿងជនសង្ស័យបញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមផ្លូវច្បាប់៕

អត្ថបទ៖ មករា