Connect with us

សន្តិសុខសង្គម

ចោរលួច​ផ្ទាំងអំពូលសូឡាតាម​ផ្លូវសាធារណៈ បង្កការភ័យខ្លាច​ដល់អ្នកភូមិ

បានផុស

នៅ

នៅតាមដងផ្លូវសាធារណះតាមភូមិមួយចំនួននៅ​ក្នុងក្រុង​បាត់ដំបង នៅមិនទាន់បានបំពាក់ភ្លើងបំភ្លឺនោះទេដែល​ជាក្តីកង្វល់របស់ប្រជាពលរដ្ឋក្នុងការធ្វើដំណើរ និង​អាចបង្កភាពងាយស្រួល​ដល់ជន​ដែល​ប្រព្រឹត្ត​អំពើចោរកម្មផ្សេងៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហួត ជាពលរដ្ឋរស់នៅភូមិជ្រៃកោង សង្កាត់ស្លាកែត ក្រុងបាត់ដំបង ខេត្តបាត់ដំបង ត្រង់​ចំណុច​ក្រោយ​សណ្ឋាគារខេមរាបាត់ដំបង១ បានឱ្យដឹងថា ដោយសារតែគ្មានភ្លើងបំពាក់តាមដងផ្លូវសម្រាប់អ្នក​ភូមិ​ធ្វើដំណើរ ទើបក្រុមគ្រួសារលោកបានបរិច្ចាកដាក់ផ្ទាំងសូឡា​បំភ្លឺផ្លូវសាធារណៈក្នុងភូមិប៉ែក​ខាងក្នុង​ចំនួន​ពីរដើម។ តែគួរឲ្យសោកស្តាយ ត្រូវបានក្រុមចោរកាច់បំបាក់​បង្គោលរាបដល់ដី រួច​យកសូឡាទៅបាត់កាលពីយប់រំលងអាធ្រាតចូលថ្ងៃទី ២៩ កុម្ភៈ។

ក្រោយមានសកម្មភាពបែបនេះ ប្រជាពលរដ្ឋមួយចំនួនបានសម្តែងក្តីព្រួយបារម្ភ ខណៈ​ដែល​ករណី​ក្រុមចោរដើរកាច់បំបាក់បង្គោលដែកលួចយកសូឡាដែលដាក់បំភ្លឺផ្លូវសាធារណៈនេះ មិនដឹងយកទៅលក់បន្តឬ​មានបំណងអ្វី។

លោក ហួត ក៏ដូចជាអ្នកភូមិដែល​ព្រួយបារម្ភពីសុវត្ថិភាពបានលើកឡើងថា មិនដឹងគោលបំ​ណងក្រុមចោរនេះលួចផ្ទាំងអំពូលសូឡា យកទៅលក់បន្ត ឬមួយមានបំណង​ធ្វើឱ្យផ្លូវចេញ​ចូល​ទៅក្នុងភូមិងងឹងដើម្បី​ងាយស្រួលធ្វើសកម្មភាពបទល្មើស​ផ្សេងៗឬយ៉ាងណា?

លោកនិងអ្នកភូមិស្នើឱ្យសមត្ថកិច្ចក្រុងបាត់ដំបងក៏ដូចជាលោកស្នងការខេត្ត មេត្តា​ជួយបង្រ្កាប​ក្រុមចោរ​ទាំង​នេះផង កុំឲ្យពួកគាត់រស់នៅដោយមានការភ័យខ្លាចនាពេលយប់ ។

បើតាមស្រ្តីម្នាក់ដែលដេកក្នុងបន្ទប់ចម្ងាយប្រហែល ២ ម៉ែត្រពី​ទីតាំង​​កើត​ហេតុ​បានឱ្យដឹងថា នៅយប់​ម៉ោងប្រហែលជាង ១ រំលងអាធ្រាត គាត់ឮសម្លេង​ម៉ូតូសង់ទ្រីម​មកឈប់ក្បែរ​នោះហើយឮសម្លេងមនុស្ស ២ នាក់និយាយគ្នាខ្សិបៗ ដោយគាត់​ផ្ទៀងស្តាប់ពីបន្ទប់ជញ្ជាំងសង្កសីមក ប៉ុន្តែគាត់​មិនចាប់អារម្មណ៍ ស្រាប់តែព្រឹកឡើងក៏ឃើញបង្កោលបំពាក់ផ្ទាំងអំពូល​សូឡាក្បែរនោះ​ត្រូវបានក្រុមចោរ​កាច់បំបាក់ដល់ដី ហើយយកផ្ទាំងអំពូលសូឡាបាត់តែម្តង ទើបមានការភ្ញាក់​ផ្អើល​។

ចំពោះករណីដូចគ្នានេះដែរ កាលពីយប់ថ្ងៃទី ១៦ ខែកុម្ភៈ ក្រុមចោរក៏បានលួចកាច់យកអំពូលសូឡា និង​កាត់បង្គោលបំភ្លឺដងផ្លូវសាធារណៈចំនួន ៥ អំពូលផងដែរ នៅក្នុងភូមិបាឡាត់ សង្កាត់អូរម៉ាល់ ក្រុង​បាត់ដំបង បង្កឱ្យប្រជាពលរដ្ឋមានការព្រួយបារម្ភពីសុវត្ថិភាពនាពេលយប់ ខណៈ​ដែល​ផ្លូវ​ក្នុងភូមិ​ធ្លាប់ភ្លឺបែរទៅជាងងិតឈឹង ដោយសារស្នាដៃចោរ។

រហូតមកដល់ពេលនេះ សមត្ថកិច្ច​នៅមិនទាន់ឃើញមានការបង្រ្កាបបាននៅឡើយ ខណះកាលពីប៉ុន្មានថ្ងៃមុននេះ នៅក្នុង​ភូមិសាលាបាឡាត់ ក្រុងបាត់ដំបង ក្រុមចោរបានគាស់ឃ្លាំងស្ដុកទំនិញ ១ កន្លែង ចូលលួចយកប្រេង​ម៉ាស៊ីនអស់ជាង ១០០ ប៊ីដុង និង​ធ្វើសកម្មភាពគាស់ផ្ទះ​ពលរដ្ឋនៅក្នុង​មូលដ្ឋាននេះផងដែរ៕

អត្ថបទ៖ សៅ សារិទ្ធ

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម