ច្រករបៀង​ភូមិសាស្រ្ត​ស្រុកម៉ាឡៃ ឈ្មួញបន្ត​​លួច​នាំ​ចូល​ទំនិញឆ្លងដែន​ពី​ថៃ ទោះមាន​សារ​ព្រមាន​ពី​ថ្នាក់ដឹកនាំ

ទោះបីជាព្រំដែនគោកកម្ពុជាថៃបានបិទទាំងស្រុង និងមានការបង្រ្កាបជាបន្តបន្ទាប់​លើការនាំចូល​នាំចេញទំនិញឆ្លងព្រំដែនកម្ពុជាថៃយ៉ាងណាក៍ដោយ ក៍ឈ្មួញនៅតែអាចនាំចេញនាំចូលទំនិញរបស់ថៃតាម​ច្រករបៀងនានាក្នុងភូមិសាស្រ្តស្រុកម៉ាឡៃ ខេត្តបន្ទាយមានជ័យ។

ជាក់ស្តែងជាថ្មីម្តងទៀតកាលពីយប់ថ្ងៃទី ៦ ខែកក្កដា ឆ្នាំ​២០២៦ កម្លាំងចម្រុះការពារព្រំដែន ស្រុកម៉ាឡៃ បានធ្វើការស្ទាក់ចាប់ទំនិញនាំចូលមកពីប្រទេសថៃតាមច្រករបៀងក្នុងភូមិសាស្ត្រ ភូមិវត្តចាស់ក្រោយពីការបង្រ្កាប់ការបម្រុងនាំចេញបារីយ៉ាងច្រើនទៅប្រទេសថៃ។

យោងតាមសមត្ថកិច្ច ទំនិញដែលឈ្មួញលួចនាំចូលហើយត្រូវបានសមត្ថកិច្ចបង្រ្កាបបានរួមមាន ៖ ម្សៅទឹកដោះគោម៉ាក Dupro ១៩ កេស . កំប៉ុងជ័រសំរាប់ឆុងទឹកដោះគោ ១ កេស ដែលយុវជនម្នាក់ត្រូវបានឃាត់ខ្លួនដឹកតាមម៉ូតូអូសរ៉ឺម៉កម៉ាក wave ១គ្រឿង ស្ថិតនៅភូមិវត្តចាស់ ឃុំ/ស្រុក ម៉ាឡៃ ខេត្តបន្ទាយមានជ័យ។ ក្រោយការឃាតបង្រ្កាប់ សមត្ថកិច្ចបានប្រគល់​ឲ្យ​កម្លាំងកងអាវុធហត្ថស្រុកម៉ាឡៃបន្តនីតិវិធី។

បើយោងតាមប្រភពនានាពីស្រុកម៉ាឡៃបាន​ឲ្យ​ដឹងថា ឈ្មួញហាក់មិនខ្លាចសំណាញច្បាប់ជាពិសេសបទបញ្ជា​របស់រដ្ឋាភិបាលដែលកំពុងប្រយុទ្ធប្រឆាំងនិងបទល្មើសព្រំដែន និង​ការពហិការរបស់ពលរដ្ឋ​លើទំនិញថៃ។

សកម្មភាពនាំទំនិញឆ្លងដែនពិសេសពីថៃចូលមកកម្ពុជា នៅតែមានជាប្រចាំតាមរយះអតីតឈ្មួញដែលមានលំនៅដ្ឋាន ឬក៍ដីចំការជាប់មាត់អូរព្រំដែនកម្ពុជាថៃសងខាងច្រកតំបន់ម៉ាឡៃ ព្រោះទីតាំងទាំងនោះអំណោយផលក្នុងការប្រព្រឹត្តបទល្មើសឆ្លងដែនពេលយប់ ដែលមិនអាចមើលឃើញ ឬចូលបង្រ្កាបបាន។

ជាមួយ​គ្នា​នេះ​ ក៏​មានលើកឡើងអាចពាក់ព័ន្ធ​សមត្ថកិច្ច​ប្រចាំនៅតំបន់នោះ ដែល​​ឆ្លៀត​រកផលប្រយោជន៍​​ទើបធ្វើ​ឲ្យ​ជំនួញបទល្មើសព្រំដែននៅតែអាចនាំចេញចូលបាន។

ប្រភពបានបន្តថា ទំនិញដែលនាំចូលពីថៃភាគច្រើនជាទំនិញចាប់ហួយនិងប្រហិត សាច់សត្វ សត្វគោ ម៉ូតូ​ជាដើម។ រីឯទំនិញនាំចេញពីកម្ពុជាភាគច្រើនជាបារី និងមនុស្សឆ្លងដែលមានទាំងជនបរទេសនិងពលរដ្ឋខ្មែរ។

អត្ថបទ៖ អពៅ