អភិបាលខេត្តតាកែវ កោតសរសើរដល់សមត្ថកិច្ចដែលបង្ក្រាបបានក្មេងទំនើងនៅមុខផ្សារអង្គតាសោម

តាមគណនយ្យហ្វេសប៊ុកផ្លូវការរបស់លោក អ៊ូច ភា អភិបាលនៃគណៈអភិបាលខេត្តតាកវ ដែលបានបង្ហោះក្នុងនាមលោកជាគណៈបញ្ជាការឯកភាពខេត្ត លើកឡើងថា “លោកសូមកោតសរសើរដល់កម្លាំងសមត្ថកិច្ច មានកងកម្លាំងកងរាជអាវុធហត្ថ និងកងកម្លាំងនគរបាល ដែលបានចេញប្រតិបត្តិការក្តៅភ្លាមៗ តាមស្រាវជ្រាវរុករកក្រុមក្មេងទំនើង ដែលបានបើកម៉ូតូដេញកាប់គ្នាយ៉ាងអណាធិបតេយ្យ កាលពីថ្ងៃទី ២៨ ខែឧសភា ឆ្នាំ២០២៤ វេលាម៉ោង១៥និង៤៥ នៅតាមបណ្តោយផ្លូវជាតិលេខ៣ មុខផ្សារអង្គតាសោម រហូតឈានដល់ការឃាត់ខ្លួនបានចំនួនពីរនាក់។ ជាងនេះ លោកអភិបាលខេត្តសូមឲ្យកម្លាំងសមត្ថកិច្ច បន្តស្រាវជ្រាវមុខសញ្ញានៅសេសសល់ ដើម្បីឃាត់ខ្លួនយកមកអនុវត្តច្បាប់បន្តទៀត ។

លោកអភិបាលខេត្តក៏អំពាវនាវដល់ប្អូនៗ យុវជន សូមមេត្តាខិតខំរៀនសូត្រ ស្តាប់ដំបូន្មានលោកឪពុក អ្នកម្តាយ លោកគ្រូ អ្នកគ្រូ កុំឲ្យក្លាយខ្លួនជាក្មេងទំនើងនាំឲ្យខូចអនាគតរបស់ខ្លួន និងប៉ះពាល់ដល់កិត្តិយសក្រុមគ្រួសារ”។

សូមបញ្ជាក់ថា នៅរសៀលថ្ងៃពុធ ទី២៩ ខែឧសភា ឆ្នាំ២០២៤ លោកឧត្តមសេនីយ៍ត្រី សេង មហា មេបញ្ជាការកងរាជអាវុធហត្ថខេត្តតាកែវ បានដឹកនាំកម្លាំងចុះធ្វើការស្រាវជ្រាវ ឈានទៅដល់ការឃាត់ខ្លួនជនសង្ស័យម្នាក់ នៅក្នុងចំណោមបក្ខពួកមួយចំនួន ដែលបានធ្វើសកម្មភាពជិះម៉ូតូប្រដាប់ដោយកាំបិត ពូថៅ ដេញកាប់គ្នាយ៉ាងអនាធិបតេយ្យ នៅចំណុចខាងមុខផ្សារអង្គតាសោម លើបណ្ដោយផ្លូវជាតិលេខ៣ ស្ថិតនៅភូមិអង្គតាសោម ឃុំអង្គតាសោម ស្រុកត្រាំកក់ ខេត្តតាកែវ កាលពីថ្ងៃទី២៨ ខែឧសភា ឆ្នាំ២០២៤៕

អត្ថបទ៖ វីរៈ