ឆេះផ្ទះមួយល្វែងនៅសង្កាត់កំបូល ខូចខាតរថយន្ត​មួយគ្រឿង និងម៉ូតូ៤គ្រឿង

រថយន្តមួយគ្រឿង និងម៉ូតូចំនួន៤គ្រឿង រួមទាំងសម្ភារៈមួយចំនួនត្រូវបានរងការខូចខាតក្នុងហេតុការណ៍គ្រោះអគ្គិភ័យឆាបឆេះផ្ទះប្រជាពលរដ្ឋមួយល្វែងក្នុងបុរីសុខចំរេីន សង្កាត់កំបូល។

ករណីអគ្គិភ័យនេះបានបង្កការភ្ញាក់ផ្អើលកាលពីវេលាម៉ោង៣និង១៥នាទីទៀបភ្លឺ ថ្ងៃទី១៣ ខែមិថុនា ឆ្នាំ២០២៤ ចំណុចក្នុងបុរីសុខចំរើន ក្នុងភូមិទួលតាឡាត់ សង្កាត់កំបូល ខណ្ឌកំបូលរាជធានីភ្នំពេញ។

បើតាមការបញ្ជាក់ពីម្ចាស់ផ្ទះបានឲ្យដឹងថា មុនពេលកើតហេតុដោយពួកគាត់កំពុងសម្រាកលង់លក់ស្រាប់តែឮស្នូសំឡេងផ្ទុះ ចេញពីក្នុងផ្ទះ រួចបង្កទៅជាអណ្តាតភ្លើងឆេះរាលដាលយ៉ាងសន្ធោសន្ធៅ ពេលនោះដែរពួកគាត់ និងនាក់ក្បែរខាងនាំគ្នាទាញទុយោទឹក និងបំពង់ពន្លត់អគ្គិភ័យបាញ់ទប់ស្កាត់បឋម រួចនាំគ្នាទាក់ទងទៅសមត្ថកិច្ចមូលដ្ឋានសុំរថយន្តពន្លត់អគ្គិភ័យឲ្យមកជួយអន្តរាគមន៍បាញ់ពន្លត់ជាបន្ទាន់។ ភ្លាមៗនោះដែរខាងកម្លាំងជំនាញបង្ការពន្លត់អគ្គិភ័យ និងសង្រ្គោះ របស់ស្នងការដ្ឋាននគបាលរាជធានីភ្នំពេញ រួមសហការជាមួយខាងរថយន្តពន្លត់អគ្គិភ័យរបស់អង្គភាព ៧១១ កងពលតូចលេខ៧០ បានចេញរថយន្តពន្លត់អគ្គិភ័យចុះមកជួយអន្តរាគមន៍បាញ់ពន្លត់ភ្លាមៗផងដែរ។

ក្រោយពីខាងជំនាញបាញ់ពន្លត់ចប់អស់រយះពេលជាង៣ម៉ោងឃើញថា រលត់ទៅវិញជាស្ថាពរ តែត្រូវបានខូចខាតផ្ទះមួយល្វែងសម្ភារះមួយចំនួន រួមមានម៉ូតូចំនួន៤គ្រឿង និងរថយន្តមួយគ្រឿងឆេះអស់ទាំងស្រុង តែមិនបណ្ដាលឲ្យមានអ្នករងរបួស ឬបាត់បង់ជីវិតនោះទេ។ ចំពោះមូលហេតុ សមត្ថកិច្ចកំពុងស្រាវជ្រាវបន្ត៕

អត្ថបទ៖ សុខា