យប់មិញ មាន​អគ្គិភ័យឆេះឃ្លាំងស្តុកបារីក្រុមហ៊ុនចិនដ៏ធំមួយក្នុងខណ្ឌដង្កោ

អគ្គិភ័យឆាបឆេះឃ្លាំងស្ដុកបារីរបស់ក្រុមហ៊ុនចិនដ៏ធំមួយកន្លែងយ៉ាងសន្ធោសន្ធៅ​ បង្កការភ្ញាក់ផ្អេីលដល់ប្រជាពលរដ្ឋនិងសមត្ថកិច្ចចុះអន្តរាគមន៍​ កាលពីវេលាម៉ោង ៣ និង ១០ នាទីរំលងអាធ្រាត្រ ឈានចូលថ្ងៃទី ១៥ ខែមិថុនា ឆ្នាំ ២០២៤​ ស្ថិតនៅផ្លូវចូលវត្តព្រះធាតុ ក្បែររង្វង់មូលគួរស្រូវ ភូមិព្រះធាតុ សង្កាត់រលួស ខណ្ឌដង្កោ រាជធានីភ្នំពេញ។

ក្នុងប្រតិបត្តិការ អាជ្ញាធរមូលដ្ឋានខណ្ឌដង្កោ បានសហការជាមួយក្រុមជំនាញរបស់​ការិយាល័យបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលដ្ឋានរាជធានីភ្នំពេញ ដឹកនាំផ្ទាល់ដោយ លោកវរសេនីយ៍ឯក ព្រហ្ម យ៉ន នាយការិយាល័យ បានចុះអន្តរាគមន៍បាញ់ពន្លត់យ៉ាងញាប់ដៃជេីងផងដែរ ។

ក្នុង​ប្រតិបត្តិនេះដែរ ក៏​មាន​ប្រើប្រាស់​រថយន្តពន្លត់អគ្គិភ័យក្រុមហ៊ុន ខ្មែរ ប៊ីវេីរីជីស (ស្រាបៀរកម្ពុជា), រថយន្តពន្លត់អគ្គិភ័យ បុរីប៉េងហួត , រថយន្តពន្លត់អគ្គិភ័យទីក្រុងកោះនរា, និងរថយន្តពន្លត់អគ្គិភ័យរបស់អង្គភាព ៧១១ RRC711 នៃកងពលតូចលេខ៧០ បានចេញជួយសហការក្នុង ការពន្លត់ករណីអគ្គិភ័យខាងលេីនេះ ដេីម្បីឲ្យរលត់ទៅវិញផងដែរ។

ជុំវិញករណីខាងលេី មិនទាន់មានការបញ្ជាក់អំពីមូលហេតុនិងខូចខាតសម្ភារៈអស់ប៉ុន្មាននោះទេ ដោយកម្លាំងជំនាញកំពុងបន្តអន្តរាគមន៍៕

អត្ថបទ៖ សុខា