សន្តិសុខសង្គម

នគរបាលរាជធានីភ្នំពេញ អំពាវនាវម្ចាស់កង់បីម្នាក់ ចូលបំភ្លឺ ក្រោយបង្ហោះឃ្លីបវីដេអូតាមបណ្ដាញសង្គម

បានផុស

១១ ខែ មុន

នៅ

ថ្ងៃអាទិត្យ ២៥ សីហា ២០២៤

ដោយ

ស្នងការដ្ឋាននគរបាលរាជធានីភ្នំពេញ អំពាវនាវឲ្យអ្នកបើកបរម៉ូតូកង់បី (ផាស់អាប់) ម្នាក់ ចូលមកសហការបំភ្លឺនៅការិយាល័យនគរបាលចរាចរណ៍ផ្លូវគោក ដើម្បីដោះស្រាយ ក្រោយមានការផ្សព្វផ្សាយឃ្លីបវីដេអូតាមបណ្ដាញសង្គមចោទប្រកាន់ចំពោះមន្ត្រីនគរបាលចរាចរណ៍គោលដៅស្តុបបុរីអង្គរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងនៅរសៀលថ្ងៃទី ២៥ ខែសីហា ឆ្នាំ ២០២៤ នេះ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ បានឲ្យដឹងថា ដោយអនុវត្តតាមបទបញ្ជារបស់ លោកឧត្ដមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ កាលពីល្ងាចថ្ងៃទី ២៤ ខែសីហា ឆ្នាំ ២០២៤ ប្រធានគោលដៅអនុវត្តច្បាប់ចរាចរណ៍ផ្លូវគោក ០១ នាក់ នៅគោលដៅស្តុបបុរីអង្គរ ត្រូវបានការិយាល័យនគរបាលចរាចរណ៍ផ្លូវគោកកោះហៅមកសួរនាំបំភ្លឺ ដើម្បីរង់ចាំការស្រាវជ្រាវបន្ថែមទៀត។

ទន្ទឹមនោះ ស្នងការដ្ឋាននគរបាលរាជធានីភ្នំពេញ ក៏បានអំពាវនាវឲ្យអ្នកបើកបរម៉ូតូកង់បី (ផាស់អាប់) ម្នាក់ ចូលមកសហការបំភ្លឺនៅការិយាល័យនគរបាលចរាចរណ៍ផ្លូវគោក ដើម្បីដោះស្រាយផងដែរ។

គួរបញ្ជាក់ថា កាលពីថ្ងៃទី ២៤ ខែសីហា ឆ្នាំ ២០២៤ ម្សិលមិញ នេះផងដែរ ក្រោយមានការផ្សព្វផ្សាយឃ្លីបវីដេអូតាមបណ្ដាញសង្គមពីការចោទប្រកាន់របស់បុរសម្នាក់ជាអ្នកបើកបរម៉ូតូកង់បី (ផាស់អាប់) ចំពោះមន្ត្រីនគរបាលចរាចរណ៍នៅគោលដៅស្តុបបុរីអង្គរ ថាបានចាប់ឃាត់ម៉ូតូកង់បីរបស់គាត់បម្រុងផាកពិន័យដោយមិនបានល្មើសច្បាប់ចរាចរណ៍ផ្លូវគោក នៅពេលនោះ គាត់បានតវ៉ាបង្ហាញកាមេរ៉ាទើបមន្ត្រីនគរបាលចរាចរណ៍មិនផាកពិន័យ និងបានអនុញ្ញាតឲ្យគាត់បន្តដំណើរ។

ក្រុមការងារព័ត៌មានប្រតិកម្មរហ័ស ក៏បានណែនាំដល់អ្នកធ្វើដំណើរក្នុងភូមិសាស្ត្ររាជធានីភ្នំពេញ មុននឹងផុសព័ត៌មានតាមបណ្ដាញសង្គម ករណីមន្ត្រីនគរបាលចរាចរណ៍ឈរជើងនៅគោលដៅណាមួយចុះអនុវត្តច្បាប់ចរាចរណ៍ផ្លូវគោកមានកំហុសឆ្គងចំពោះប្រជាពលរដ្ឋដោយប្រការណាមួយ ហើយពលរដ្ឋកើតទុក្ខមិនសុខចិត្ត សូមមកដាក់ពាក្យបណ្ដឹងនៅស្នងការដ្ឋាននគរបាលរាជធានីភ្នំពេញ លោកឧត្ដមសេនីយ៍ឯក ជួន ណារិន្ទ នឹងដោះស្រាយជូន៕

អត្ថបទ ៖ សុភា