បង្ក្រាបករណីគ្រឿងញៀនដកហូតអាវុធខ្លីមួយដើម និងសម្ភារៈប្រើប្រាស់មួយចំនួន

ជនសង្ស័យចំនួន ៥នាក់ ដែលជាមុខសញ្ញាកាន់កាប់ រក្សាទុក និងចែកចាយនូវសារធាតុញៀនត្រូវបានកម្លាំងសមត្ថកិច្ចធ្វើការបង្ក្រាបព្រមទាំងបានរកឃើញអាវុធខ្លីម៉ាកK54 មួយដើមថែមទៀតផង។

គួរបញ្ជាក់ថា កិច្ចប្រតិបត្តិការនេះបានធ្វើឡើងកាលពីថ្ងៃទី៥ ខែវិច្ឆិកា ឆ្នាំ២០២៤ នៅចំណុចភូមិបាក់អំរែក ឃុំព្រែកហ្លួង ស្រុកឯកភ្នំ ខេត្តបាត់ដំបង ក្រោមការបញ្ជារ​បស់​លោកឧត្តមសេនី​យ៍ទោ ​ដាញ់​ អេង​ប៊ុន​ចាន់​ ស្នងការនៃស្នងការដ្ឋាននគរបាលខេត្តបាត់ដំបង​ និងចេញប្រតិបត្តិការដោយលោ​កវរ​សេនីយ៍ឯក​ ឡុង​ យោធាវីរៈ​ អធិ​ការនគរបាលស្រុកឯកភ្នំ​ បានដឹកនាំកម្លាំងបង្ក្រាប ករ​ណីរក្សា​ទុកដោយខុសច្បាប់នូវសារធាតុ​ញៀនចំនួន​០១ករណី ក្នុងបទល្មេីសជាក់ស្ដែង ព្រមទាំងបានឃាត់ខ្លួនជន​សង្ស័​យ​ចំនួន៥នាក់គឺ ១-ឈ្មោះ សុិន វាសនា ហៅឈ្លេីម ភេទប្រុស  អាយុ​២៧ឆ្នាំ រស់នៅភូមិបាក់អំរែក ឃុំព្រែកហ្លួង ខេត្តបាត់​ដំបង។ ២-ឈ្មោះ គា លាងគ្រី ហៅម៉ៅ ភេទប្រុស ៣៧ឆ្នាំ រស់នៅភូមិព្រែកហ្លួង ឃុំព្រែកហ្លួង ស្រុកឯកភ្នំ ខេត្តបាត់​ដំបង ។ ៣-ឈ្មោះ ម៉ាប់ មឿត ភេទប្រុស អាយុ ២៣ឆ្នាំ រស់​នៅភូមិបាក់រទេះ ឃុំព្រែកហ្លួង ស្រុកឯកភ្នំ ខេត្តបាត់​ដំបង ។ ៤-ឈ្មោះ វ៉ៃ លឹមពៀវ ភេទប្រុស អាយុ២៦ ឆ្នាំ រស់​នៅភូមិស្ដីលេី ឃុំព្រែកហ្លួង ស្រុកឯកភ្នំ ខេត្តបាត់ ដំបង។ ៥-ឈ្មោះ ឡុង ធីតា ភេទស្រី អាយុ២៧ឆ្នាំ រស់នៅភូមិកំពង់សីម៉ា សង្កាត់វត្តគរ ក្រុងបាត់ដំបង ខេត្តបាត់​ដំបង។

នៅក្នុងកិច្ចប្រតិបត្តិការនេះ សមត្ថកិច្ចបានធ្វើការដកហូតវត្ថុតាងរួមមាន៖ ថ្នាំញៀនប្រភេទម៉ាទឹកកកចំនួន​០៩ថង់ ថង់សម្រាប់ច្រកថ្នាំញៀនមួយចំនួន សម្ភារៈសម្រាប់ប្រេីប្រាស់ថ្នាំញៀនមួយចំនួ ទូរស័ព្ទដៃចំនួន៣គ្រឿង កាំភ្លេីងខ្លីចំនួន១ដេីម ម៉ាក k54 បង់ចំនួន០១ គ្រាប់ចំនួន០៨គ្រាប់។

ទាក់ទងរឿងកាំភ្លើងខ្លីនេះ លោកអធិការនគរ​បាលស្រុកបានឱ្យដឹងថា​ មុខសញ្ញានេះសារភាពថា បានទិញ​មកទុកជាប់ខ្លួន តែមិនទាន់បានប្រព្រឹត្តិនូវសកម្មភាពណា​មួយដោយប្រេីប្រាស់កាំភ្លើង​នេះនៅឡេីយទេ​ ហេីយនៅថ្ងៃនេះសមត្ថកិច្ចបង្រ្កាបឃាត់ខ្លួនអនុវត្តតាមច្បាប់៕

អត្ថបទ៖ សោ និយមរ័ត្ន