ពលរដ្ឋភ្ញាក់ផ្អើលពេលឃើញសត្វក្រពើងាប់ច្រើនក្បាលអណ្ដែតក្នុងស្ទឹងសង្កែ

មានការភ្ញាក់ផ្អើលយ៉ាងខ្លាំង បន្ទាប់ពីមានប្រជាពលរដ្ឋប្រទះឃើញក្រពើងាប់អណ្ដែតក្នុងស្ទឹងសង្កែជាច្រើនក្បាល ហើយសុទ្ធតែក្រពើធំៗ ដែលប្រជាពលរដ្ឋម្នាក់ៗមានការព្រួយបារម្ភព្រោះគិតថា ក្នុងស្ទឹងសង្កែមានសត្វក្រពើច្រើនក្បាលកំពុងរស់នៅ។

នៅវេលាម៉ោងប្រមាណជា៨ព្រឹក ថ្ងៃទី២០ ខែមករា ឆ្នាំ២០២៥នេះ មានការភ្ញាក់ផ្អើលយ៉ាងខ្លាំង ពីសំណាក់ប្រជាពលរដ្ឋក៏ដូចជាសមត្ថកិច្ច និងអាជ្ញាធរមូលដ្ឋានដោយសារតែគេប្រទះឃើញមានសត្វក្រពើងាប់អណ្ដែតទឹកចំនួន៤ក្បាល នៅត្រើយខាងកើតស្ទឹង ស្ថិតក្នុងភូមិខ្វិត ឃុំព្រែកខ្ពប ស្រុកឯកភ្នំ ខេត្តបាត់ដំបង។

បើតាមការបញ្ជាក់ពីលោក ណាប់ ស៊ីថា មេបញ្ជាការមូលដ្ឋានកងរាជអាវុធហត្ថស្រុកឯកភ្នំ បានអោយដឹងថា ព័ត៌មាននេះ គឺលោកទទួលបានប្រហែលម៉ោង ៨និង៣០នាទីព្រឹកមិញ ប៉ុន្តែតាមភិនភាគរបស់សត្វក្រពើ គឺពុំមែនជាក្រពើដែលមានរស់នៅក្នុងទឹកស្ទឹងសង្កែនោះទេ គឺក្រពើនេះអាចងាប់ស្រាប់ហើយត្រូវបានគេយកមកបោះចោលក្នុងទឹកស្ទឹង ដែលឥឡូវនេះសមត្ថកិច្ចកំពុងពិនិត្យ និងអាចសុំគោលការណ៍ដើម្បីយកទៅកប់ចោល ហើយនៅប៉ែកខាងលើស្ទឹងគឺម្ដុំផ្សារប្រហុកក៏មានទីតាំងចិញ្ចឹមក្រពើជាច្រើនកន្លែងផងដែរ។

ដោយឡែកលោក មុិល សុផល អភិបាលស្រុកឯកភ្នំ បានបញ្ជាក់យ៉ាងខ្លីថា លោកទើបបានទទួលសេចក្តីរាយការណ៍ពីសមត្ថកិច្ចដោយសារថ្ងៃនេះ លោកមានធុរៈ និងបានច្បាប់ដោយមិនបានធ្វើការនោះឡើយ។ ប៉ុន្តែសម្រាប់លោក ឡុង យោធាវីរៈ អធិការនគរបាលស្រុកឯកភ្នំ បានបញ្ជាក់ថា ការងារនេះ គឺលោកទទួលបានព័ត៌មានមកថា គឺមានរទេះមួយបានដឹកសត្វក្រពើងាប់ទាំងនេះ យកមកចាក់ចោលក្នុងស្ទឹងសង្កែ ដែលពេលនេះលោកកំពុងចាត់កម្លាំងឲ្យចុះស្រាវជ្រាវរកអ្នកដែលដឹកខ្មោចក្រពើនេះឲ្យឃើញ៕

អត្ថបទ៖ សោ និយមរ័ត្ន