អ្នកនាំពាក្យ៖​ ករណីមនុស្សស្លាប់៣នាក់នៅខេត្តរតនគីរី​មិនមែនបណ្តាលមកពីការ ពុលស្រា ស ទេ

លោកវេជ្ជបណ្ឌិត លី សូវ៉ាន់ អ្នកនាំពាក្យក្រសួងសុខាភិបាល និងជាប្រធាននាយកដ្ឋានប្រយុទ្ធនឹងជំងឺឆ្លង បានមាន
ប្រសាសន៍នៅរសៀលថ្ងៃទី៣១មករានេះថា ករណីមនុស្សស្លាប់៣នាក់ និងសង្គ្រោះបន្ទាន់២នាក់នៅឃុំស៊ើង ស្រុកបរកែវ
ខេត្តរតនគិរី មិនមែនបណ្តាលមកពីពុលស្រា ស ដូចការសង្ស័យនៅដំណាក់កាលដំបូងនោះទេ។

កាលពីរសៀលថ្ងៃទី២៩ ខែមករា ឆ្នាំ២០២៥ វេលាម៉ោង១២និង០៦នាទី មានករណីមនុស្ស ៥នាក់រងគ្រោះ ក្នុងនោះមាន ៣នាក់បានស្លាប់ និង២នាក់ ផ្សេងទៀតសម្រាកនៅមន្ទីរពេទ្យ ដោយសង្ស័យបណ្តាលមកពីការពុលស្រា ស​ដោយសារជនរងគ្រោះមានអាការៈឈឺពោះ ក្អួត ថប់ដង្ហើម និងស្រវាំងភ្នែក។ ក្រុមការងារនៃមន្ទីរសុខាភិបាលខេត្តរតនគីរីបានប្រមូលសំណាកម្ហូបអាហារ (ស្រាស) និងលាមកអ្នកជំងឺបញ្ជូនមកមន្ទីរពិសោធន៍ដើម្បីត្រួតពិនិត្យឱ្យដឹងច្បាស់លាស់។ ភ្លាមៗបន្ទាប់ពីទទួលបានព័ត៌មាននេះ លោក ញ៉ែម សំអឿន អភិបាលខេត្តរតនគិរីបានបញ្ជាឲ្យអាជ្ញាធរក្រុង ស្រុក ទាំង៩ ចុះធ្វើការបិទ ទីតាំងផលិត ស្រា ស បណ្តោះអាសន្នរង់ចាំលទ្ធផល ធ្វើសំណាកពីក្រុមគ្រូពេទ្យថា
តើមូលហេតុអ្វីឲ្យពិតប្រាកដបណ្តាលឲ្យមានអ្នកស្លាប់ និងអ្នករងគ្រោះក្នុងករណីនេះ។

ជាមួយគ្នានេះផងដែរ ក្រុមការងារខេត្តបានផ្តល់សារ អប់រំដល់អ្នកជំងឺ និងអ្នកកំដរអំពីសុវត្ថិភាពម្ហូបអាហារ និងបន្តតាមដាន អ្នកដែលបានបរិភោគហើយតែមិនទាន់ចេញរោគសញ្ញា។

លោក វេជ្ជបណ្ឌិត លី សូវ៉ាន់ បានបន្តថា តាមលទ្ធផលមន្ទីរពិសោធន៍បានបញ្ជាក់ថា ករណីស្លាប់មនុស្សនៅខេត្តរតនគិរីមិនមែនបណ្តាលមកពីស្រា ស នោះទេ ព្រោះលទ្ធផលតេស្តទៅលើស្រាសអវិជ្ជមាន។ ចំណែកមូលហេតុពិតប្រាកដនៃការស្លាប់យើងក៏​កំពុង​រង់ចាំលទ្ធផលអង្កេតស្រាវជ្រាវដែរ​៕

អត្ថបទ៖ សំអឿន