បុរសម្នាក់កាន់កាំភ្លើងAK ដើររកគូទំនាស់ដើម្បីសងសឹក

បុរសម្នាក់ត្រូវបានកម្លាំងនគរបាលក្រុងតាខ្មៅ ឃាត់ខ្លួនភ្លាមៗ បន្ទាប់ពីកាន់អាវុធAK មួយដើមដើរតាមផ្លូវស្វែងរកគូទំនាស់ដើម្បីបាញ់សងសឹក។ ករណីនេះបានកើតឡើងកាលពីម៉ោង១២រំលងអធ្រាត្រ ឈានចូលថ្ងៃទី៩ ខែមេសា ឆ្នាំ២០២៥ នៅចំណុចបឹងជំនីក ភូមិក្រពើហាកើត សង្កាត់ព្រែកឫស្សី ក្រុងតាខ្មៅ ខេត្តកណ្តាល។ ជនសង្ស័យមានឈ្មោះ លុយ សុស អាយុ ៤៥ឆ្នាំ។

សមត្ថកិច្ចបានឲ្យដឹងទៀតថា នៅមុនពេលកេីតហេតុ​ កម្លាំងសមត្ថកិច្ចកំពុងល្បាតតាមភូមិសាស្ត្ររបស់ខ្លួនដេីម្បីទប់ស្កាត់បទល្មេីស​ លុះមកដល់ចំណុចកេីតហេតុក៏បានប្រទះឃើញជនសង្ស័យម្នាក់កំពុងដើរតាមផ្លូវ ដោយមានកាន់កាំភ្លើង AK នៅនឹងដៃ។ ភ្លាមៗនោះសមត្ថកិច្ចបានឃាត់ខ្លួនជនសង្ស័យរួមទាំងវត្ថុតាងមួយចំនួនដើម្បីសួរនាំ។

នៅចំពោះមុខសមត្ថកិច្ច ជនសង្ស័យបានសារភាពថា កាំភ្លើង AK នេះខ្លួនរើសបាននៅក្រោមស្ពានក្រពើហារ ភូមិក្រពើហារ សង្កាត់ព្រែកឫស្សី ក្រុងតាខ្មៅ ខេត្តកណ្តាល ហើយមានបំណងយកទៅបាញ់សងសឹកពួកដែលធ្លាប់រករឿងជាមួយខ្លួន។

ជនសង្ស័យត្រូវបានឃាត់ខ្លួនបណ្តោះអាសន្ននៅអធិការដ្ឋាននគរបាលក្រុងតាខ្មៅ បន្តស៊ើបអង្កេតបន្ថែម ដើម្បីសួរនាំបន្ថែម តើមានការពាក់ព័ន្ធជាមួយករណីផ្សេងទៀតដែរឬទេ ដើម្បីកសាងសំណសំណុំរឿងបញ្ជូនទៅសាលាដំបូងខេត្តកណ្តាលដើម្បីចាត់ការបន្តតាមនីតិវិធី៕

អត្ថបទ៖ សុខា