អាជ្ញាធរខណ្ឌសែនសុខ ដាក់រថយន្តបូមស្ដារប្រព័ន្ធ​លូនៅភូមិចុងថ្នល់ខាងលិច ក្រោយពលរដ្ឋស្នើសុំ

លោក ធាម ច័ន្ទសេរីវុឌ្ឍ ប្រធានការិយាល័យសាធារណៈការខណ្ឌសែនសុខ នារសៀលថ្ងៃទី២៤ ខែមិថុនា ឆ្នាំ២០២៤​នេះ បានដឹកនាំក្រុមការងារ និងរថយន្ដបូមស្ដារប្រព័ន្ធលូមួយកន្លែងនៅក្នុងភូមិចុងថ្នល់ខាងលិច សង្កាត់ទឹកថ្លា ដើម្បីបញ្ចៀសការជន់លិច និងជះក្លិនស្អុយដល់ពលរដ្ឋ។ ការនាំយករថយន្ដបូមស្ដារប្រព័ន្ធលូរបស់សាលារាជធានីភ្នំពេញមកបូមស្ដារនេះ គឺបន្ទាប់ពីទទួលបានការស្នើសុំពីប្រជាពលរដ្ឋជាច្រើនគ្រួសារនៅតំបន់នោះ ពីការស្ទះចរន្ដទឹកបណ្ដាលឲ្យហៀរទឹកស្អុយចេញមកលើដងផ្លូវ។

ប្រធានការិយាល័យសាធារណការខណ្ឌសែនសុខ បានឲ្យដឹងថា បន្ទាប់ពីទទួលបានព័ត៌មាន និងមានការណែនាំពីលោក ម៉ូវ ម៉ានិត អភិបាលខណ្ឌសែនសុខ អាជ្ញាធរខណ្ឌបានសហការជាមួយសាលារាជធានីភ្នំពេញ ដាក់រថយន្តបូមស្ដារប្រព័ន្ធលូ ស្តារយកកាកសំណល់ដែលបង្កឲ្យកកស្ទះប្រព័ន្ធបង្ហូរ ដើម្បីបញ្ចៀសការដក់ទឹក និងជះក្លិនមិនល្អប៉ះពាល់ដល់សុខុមាលភាព និងការរស់នៅប្រចាំថ្ងៃរបស់ពលរដ្ឋ។

លោកស្រី ទន់ សុខលាង ជាអាជីវករលក់ដូរនៅចំណុចទីតាំងខាងលើបានសំដែងការសប្បាយរីករាយ ខណៈដែលអាជ្ញាធរបានយកចិត្តទុកដាក់ពីសុខទុក្ខប្រជាពលរដ្ឋក្នុងមូលដ្ឋាន។ លោកស្រីបានបញ្ជាក់ថា ទើបតែឆ្នាំនេះទេ ដែលប្រព័ន្ធលូនេះកកស្ទះ។ លោកស្រីថា អាចមកពីសំរាមហូរចូលច្រើន ណាមួយប្រព័ន្ធលូនេះចាស់ខូចច្រើនផងដែរ។ លោក ទន់ សុខលាង ក៏សូមសំណូមពរដល់អាជ្ញាធរបើអាចជួយស្ថាបនាប្រព័ន្ធលូនេះថ្មីទៀតកាន់តែប្រសើរ ជៀសជាងការស្តារពេលកកស្ទះ៕

អត្ថបទ៖ សំណាង