ក្រុមស្ទាក់ប្លន់ម៉ូតូនៅជាយក្រុងដូនកែវ ត្រូវបានសមត្ថកិច្ចបង្ក្រាបបានម្នាក់ ខណៈបក្ខពួកកំពុងគេចខ្លួន

ជនស្ស័យម្នាក់ក្នុងចំណោមបក្ខពួកផ្សេងទៀតត្រូវបានកម្លាំងសមត្ថកិច្ចជំនាញនៃស្នងការដ្ឋាននគរបាលខេត្តតាកែវ សហការណ៍ជាមួយសមត្ថកិច្ចស្រុកបាទីចាប់ខ្លួនបាន ក្រោយធ្វើសកម្មភាពស្ទាក់ប្លន់ម៉ូតូមួយគ្រឿងពីជនរងគ្រោះម្នាក់បានសម្រេច នៅផ្លូវជាយក្រុងដូនកែវ។

តាមការបញ្ជាក់ពីសមត្ថកិច្ចនៃស្នងការដ្ឋាននគរបាលខេត្តតាកែវ ក្រោយកើតហេតុភ្លាមៗ ម្ចាស់ម៉ូតូបានមកដាក់ពាក្យបណ្តឹងនៅអធិការដ្ឋាននគរបាលក្រុងដូនកែវ ឲ្យជួយអន្តរាគមន៍។ ក្រោយទទួលបានពាក្យបណ្តឹងពីម្ចាស់ម៉ូតូ និងទទួលបានបទបញ្ជាពីលោកឧត្តមសេនីយ៍ទោ ម៉ែន លី ស្នងការនៃស្នងការដ្ឋាននគរបាលខេត្តតាកែវ កម្លាំងជំនាញនៃស្នងការដ្ឋាន សហការណ៍គ្រប់បណ្តាញសមត្ថកិច្ចនគរបាលតាមបណ្តាស្រុក រហូតកំណត់មុខសញ្ញា និងទិសដៅជនសង្ស័យកំពុងរត់គេច។

សមត្ថកិច្ចបញ្ជាក់បន្ថែមថា ជនសង្ស័យក្រោយធ្វើសកម្មភាពបានសម្រេច គឺជិះម៉ូតូដែលប្លន់បានតាមបណ្តោយផ្លូវជាតិលេខ២ ដល់ផ្សារសំរោងយ៉ោង បត់ទៅផ្លូវជាតិលេខ៣ ឆ្លងកាត់ប៉ុស្តិ៍រដ្ឋបាលត្រពាំងសាប ក៏ត្រូវសមត្ថកិច្ចសង្ស័យ ស្ទាក់ហៅសួរនាំ និងឃាត់ខ្លួនតែម្ដង ចំណែកបក្ខពួកផ្សេងទៀតដឹងខ្លួន ក៏បាននាំគ្នាជិះម៉ូតូរត់គេចខ្លួនបាត់អស់ គឺចាប់បានតែជនសង្ស័យម្នាក់ ជាមួយវត្ថុតាងម៉ូតូជនរងគ្រោះមួយគ្រឿងមកវិញ។

បច្ចុប្បន្នជនសង្ស័យដែលបង្ក្រាបបាន សមត្ថកិច្ចជំនាញនៃស្នងការដ្ឋាននគរបាលខេត្តតាកែវ កំពុងសួរនាំបន្ថែមទៀត ដើម្បីឈានទៅវែកមុខរកបក្ខពួកយកមកផ្តន្ទាទោសតាមផ្លូវច្បាប់ ដោយឡែកវត្ថុតាងម៉ូតូរបស់ជនរងគ្រោះត្រូវបានសមត្ថកិច្ចប្រគល់ជូនម្ចាស់វិញហើយ ក្រោយត្រួតពិនិត្យឯកសារគ្រប់គ្រាន់៕

អត្ថបទ៖ វីរៈ