អភិបាលខេត្តប៉ៃលិន ជំរុញដល់សមត្ថកិច្ចពាក់ព័ន្ធទប់ស្កាត់ និងបង្ក្រាបសកម្មភាពឆបោកតាម Online Scams ឲ្យមានប្រសិទ្ធិភាព

លោកស្រី បាន ស្រីមុំ អភិបាលខេត្តប៉ៃលិន និងជាប្រធានគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប) បានដាក់ចេញនូវការណែនាំ និងជំរុញដល់សមត្ថកិច្ចពាក់ព័ន្ធ និងមន្ត្រីមូលដ្ឋានទាំងអស់ ឲ្យពង្រឹងកិច្ចការទប់ស្កាត់ និងបង្ក្រាបសកម្មភាពឆបោកតាមប្រព័ន្ធបច្ចេកវិទ្យា (Online Scams) ក្នុងភូមិសាស្ត្រ ឲ្យកាន់តែមានប្រសិទ្ធភាព។

ការជំរុញនេះ ធ្វើឡើងក្នុងកិច្ចប្រជុំយុទ្ធនាការបោសសម្អាតការឆបោក តាមប្រព័ន្ធបច្ចេកវិទ្យា នៅខេត្តប៉ៃលិន នារសៀលថ្ងៃទី១៧ ខែកក្កដា ឆ្នាំ២០២៥ ដោយមាការអញ្ជើញចូលរួមពីព្រះរាជអាជ្ញា នៃអយ្យការអមសាលាដំបូងខេត្ត អភិបាលរងខេត្ត នាយករដ្ឋបាលខេត្ត ស្នងការនគរបាលខេត្ត មេបញ្ជាការអាវុធហត្ថខេត្ត មេបញ្ជាការសឹករងខេត្ត អភិបាលក្រុង/ស្រុក និងមន្ត្រីពាក់ព័ន្ធមួយចំនួនទៀត។

ដោយយល់ឃើញពីភាពស្មុគស្មាញ និងការគំរាមកំហែង នៃការឆបោកតាមអនឡាញ ដែលតែងតែផ្លាស់ប្តូរទម្រង់ថ្មីៗ លោកស្រីអភិបាលខេត្ត បានជំរុញ ឲ្យគ្រប់ភាគីពាក់ព័ន្ធអនុវត្ត នូវចំណុចគន្លឹះមួយចំនួន រួមមាន៖ សមត្ថកិច្ច និងមន្ត្រីមូលដ្ឋាន ត្រូវតែបន្តចុះអប់រំ និងផ្សព្វផ្សាយព័ត៌មាន ដល់ប្រជាពលរដ្ឋអំពីទម្រង់ថ្មីៗ នៃការឆបោក ដូចជាការឆបោក តាមរយៈការងារតាមអនឡាញ ការវិនិយោគក្លែងក្លាយ ល្បែងស៊ីសងអនឡាញ និងការបោកបញ្ឆោត តាមរយៈការបន្លំធ្វើជាសមត្ថកិច្ច ឬស្ថាប័នរដ្ឋ។

លោកស្រីអភិបាលខេត្ត ណែនាំឲ្យបង្កើនកិច្ចសហការជិតស្និទ្ធ រវាងកងកម្លាំងនគរបាល កងរាជអាវុធហត្ថ រដ្ឋបាលខេត្ត-ក្រុង-ស្រុក-ឃុំ-សង្កាត់ និងស្ថាប័នពាក់ព័ន្ធផ្សេងទៀត ដើម្បីចែករំលែកព័ត៌មាន ស៊ើបអង្កេត និងបង្ក្រាបបណ្តាញឆបោក ប្រកបដោយប្រសិទ្ធភាព។ រាល់ករណីឆបោក ដែលរកឃើញ ត្រូវតែចាត់វិធានការផ្លូវច្បាប់ យ៉ាងតឹងរ៉ឹងដោយគ្មានការលើកលែង ដើម្បីនាំខ្លួនជនល្មើសមកផ្តន្ទាទោសតាមច្បាប់ និងជាការព្រមានដល់អ្នកផ្សេងទៀត។

ជាមួយគ្នានេះ ត្រូវបង្កើតយន្តការងាយស្រួល សម្រាប់ប្រជាពលរដ្ឋ ក្នុងការរាយការណ៍ករណីសង្ស័យ ឬករណីដែលខ្លួនបានក្លាយជាជនរងគ្រោះ នៃការឆបោក។ នេះអាចរាប់បញ្ចូលទាំងខ្សែទូរស័ព្ទបន្ទាន់ ប្រព័ន្ធរាយការណ៍អនឡាញ ឬការដាក់ពាក្យបណ្តឹង ដោយផ្ទាល់ នៅតាមប៉ុស្តិ៍នគរបាល ឬសាលាឃុំ-សង្កាត់។

លោកស្រី បាន ស្រីមុំ បានសង្កត់ធ្ងន់ថា ការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា គឺជាការងារអាទិភាពមួយ របស់រាជរដ្ឋាភិបាលកម្ពុជា ក៏ដូចជារដ្ឋបាលខេត្តប៉ៃលិន ដើម្បីធានាបាននូវសន្តិសុខ សុវត្ថិភាព និងភាពសុខដុមរមនា របស់ប្រជាពលរដ្ឋ នៅក្នុងប្រទេស និងភូមិសាស្ត្រខេត្តប៉ៃលិនទាំងមូលផងដែរ៕

អត្ថបទ៖ សេង សុវណ្ណារិទ្ធ