សន្តិសុខសង្គម

អគ្គនគរបាលជាតិបញ្ជូនក្រុមការងារទៅស្រាវជ្រាវករណីបាត់វត្ថុតាងនៅខេត្តកោះកុង

បានផុស

១២ ខែ មុន

នៅ

ថ្ងៃសៅរ៍ ១៩ កក្កដា ២០២៥

ដោយ

អគ្គស្នងការនគរបាលជាតិ នាយឧត្តមសេនីយ៍ ស ថេត កាលពីថ្ងៃទី១៨ ខែកក្កដា បានសម្រេចបង្កើតក្រុមការងារចុះស្រាវជ្រាវករណីបង្ក្រាបបទល្មើសនៅសហគ្រាសមួយស្ថិតនៅស្រុកគិរីសាគរ ខេត្តកោះកុង។ ការបង្កើតក្រុមការងារនេះគឺបន្ទាប់ពីករណីបាត់វត្ថុតាងជាកុំព្យូទ័រ និងទូរស័ព្ទជាង៣០គ្រឿងបន្ទាប់ពីអាជ្ញាធរខេត្តបានចុះបង្ក្រាបបទល្មើសកន្លងទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបង្កើតក្រុមការងារនេះគឺបន្ទាប់ពីលោកបានដាក់បទបញ្ជាដល់ស្នងការខេត្តកោះកុង លោកឧត្តមសេនីយ៍ទោ គង់ មនោ ត្រូវស្រាវជ្រាវបន្ទាន់លើករណីបាត់ទូរស័ព្ទ និងកុំព្យូទ័រ ទាំង៣៥គ្រឿងដែលជាវត្ថុតាង កាលពីថ្ងៃទី១៧ ខែកក្កដាកន្លងទៅ។

យោងតាមការចុះផ្សាយរបស់សារព័ត៌មានក្នុងស្រុកបានដកស្រងសំដីរបស់លោក ស ថេត ក្នុងកិច្ចប្រជុំបូកសរុបលទ្ធផលការងារប្រចាំឆមាសទី១ ឆ្នាំ២០២៥ របស់អគ្គស្នងការដ្ឋាននគរបាលជាតិថា៖ «យើងទៅធ្វើតែបទល្មើសបានហើយ មិចបានបាត់របស់គេ។ ឥលូវបាត់ទូរស័ព្ទ និងកុំព្យូទ័ររបស់គេទិន្នន័យនៅក្នុងណុង កុំព្យូទ័រ៣៥គ្រឿង ហើយឆ្លើយដាក់គ្នាទៅវិញទៅមក។ ស្នងការកោះកុង មើលកូនចៅបន្ដិចមើល បើមិនអ៊ីចឹងទេឲ្យក្រុមស៉ើបអង្កេតទៅ គេឃើញកម្លាំងស្លៀកឈុតយួររបស់ទាំងហ្នឹង»។

គួរឱ្យដឹងផងដែរថាក្រុមការងារដែលត្រូវបានបង្កើតនេះមានតួនាទីស្រាវជ្រាវការបង្ក្រាបបទល្មើសនៅក្នុងសហគ្រាស LYP មានទីតាំងនៅឃុំព្រែកខ្សាច់ ស្រុកគិរីសាគរ ខេត្តកោះកុង ពីដំណើររឿង សកម្មភាពក្រុមការងារដែលចុះបង្ក្រាប ដំណើរការស៊ើបអង្កេត និងធ្វើរបាយការណ៍ជូនអគ្គស្នងការនគរបាលជាតិដើម្បីមានវិធានការបន្ត៕