សន្តិសុខសង្គម

អាវុធហត្ថសៀមរាប ឃាត់ខ្លួនក្មេងទំនើង ២ នាក់ ដកហូតម៉ូតូ ២ គ្រឿង កែច្នៃខុសបច្ចេកទេស រក្សាទុក ៣ ខែ

បានផុស

៨ ខែ មុន

នៅ

ថ្ងៃសុក្រ ២២ សីហា ២០២៥

ដោយ

ក្មេងទំនើងចំនួន ២ នាក់ ដែលកែច្នៃម៉ូតូខុសបច្ចេកទេស ត្រូវបានកងរាជអាវុធហត្ថខេត្តសៀមរាប ធ្វើការឃាត់ខ្លួន និងដកហូតម៉ូតូ ២ គ្រឿង រក្សាទុករយៈពេល ៣ ខែ។

កាលពីវេលាម៉ោង ២០ និង ៣៩ នាទី ថ្ងៃទី ២០ ខែសីហា ឆ្នាំ ២០២៥ ថ្មីៗ នេះ កម្លាំងមូលដ្ឋានកងរាជអាវុធហត្ថក្រុងសៀមរាប បានធ្វើការល្បាតក្នុងភូមិសាស្ត្រក្រុងសៀមរាប ក៏ប្រទះឃើញក្មេងទំនើងចំនួន ២ នាក់ កំពុងធ្វើសកម្មភាពជិះម៉ូតូកែច្នៃខុសបច្ចេកទេស ដោយស៊ីម៉ាំងឮខ្លាំង បង្កការរំខានតាមផ្លូវសាធារណៈ ធ្វើឱ្យខូចសណ្ដាប់ធ្នាប់សង្គម នៅចំណុចស្ពានរោករាក ស្ថិតនៅភូមិមណ្ឌល ៣ សង្កាត់ស្លក្រាម ក្រុងសៀមរាប ខេត្តសៀមរាប។ ភ្លាមៗ នោះ កម្លាំងល្បាតកងរាជអាវុធហត្ថក្រុងសៀមរាប បានឃាត់ខ្លួនក្មេងទំនើងទាំង ២ នាក់ នោះ នាំយកទៅការិយាល័យជំនាញកងរាជអាវុធហត្ថខេត្តសៀមរាប ដើម្បីធ្វើការអប់រំ និងដាក់វិន័យរដ្ឋបាល ព្រមទាំងដកហូតម៉ូតូ ២ គ្រឿង រក្សាទុករយៈពេល ៣ ខែ ផងដែរ។

សូមរម្លឹកផងដែរថា កន្លងមក សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានដាក់បទបញ្ជាដ៏ម៉ឺងម៉ាត់ ពាក់ព័ន្ធនឹងក្មេងទំនើង ដោយត្រូវអនុវត្តគ្រប់វិធានការឱ្យបានតឹងរ៉ឹងបំផុត ទាំងវិធានការរដ្ឋបាល និងវិធានការច្បាប់។ ដោយឡែកចំពោះក្មេងទំនើងជិះម៉ូតូកែច្នៃខុសបច្ចេកទេសស៊ីម៉ាំងឮខ្លាំងនៅតាមផ្លូវសាធារណៈ ត្រូវឃាត់ម៉ូតូរក្សាទុករយៈពេល ៣ ខែ ចំពោះការប្រព្រឹត្តលើកទី ១ និង ៦ ខែ ប្រសិនបើមិនរាងចាល នៅតែប្រព្រឹត្តលើកទី ២ បន្តទៀត៕

អត្ថបទ ៖ ជុន កុសល