ក្រសួង​អប់រំ ប្រកាសគោលការណ៍​ ៧ ចំណុចត្រៀមចូលរួម​ប្រកួត​កីឡាស៊ីហ្គេម នៅថៃ

អគ្គនាយកដ្ឋានកីឡា របស់ក្រសួងអប់រំ យុវជន និងកីឡា បានប្រកាសគោលការណ៍​ ៧ ចំណុច ពី​ការត្រៀមលក្ខណៈរបស់ប្រតិភូ និង​អត្តពលិក​កម្ពុជា សម្រាប់​ការ​ចូលរួម​ប្រកួតព្រឹត្តិការណ៍កីឡាស៊ីហ្គេម លើកទី៣៣ នៅប្រទេសថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសរបស់ អគ្គនាយកដ្ឋានកីឡា បានធ្វើឡើងនៅថ្ងៃ អង្គារ៍ ទី ២៥ ខែ វិច្ឆិកា ឆ្នាំ ២០២៥ បន្ទាប់ពីប្រជាជនកម្ពុជាជាច្រើន បង្ហាញការព្រួយបារម្ភខ្លាំងអំពីសុវត្ថិភាពរបស់អត្តពលិក កម្ពុជា ដែលនឹងទៅចូលរួមការប្រកួតកីឡាស៊ីហ្គេមនៅ ថៃ នាខែ ធ្នូ ស្របពេលស្ថានភាពព្រំដែនរវាងប្រទេសទាំង ២ កំពុងនៅបន្តមានភាពតានតឹងនៅឡើយ។

ឆ្លើយតបនឹងការព្រួយបារម្ភរបស់ប្រជាជន កម្ពុជា អគ្គនាយកដ្ឋានកីឡាបានប្រកាសពីលក្ខខណ្ឌ ៧ ចំណុច ស្តីពីការត្រៀមលក្ខណៈរបស់ប្រតិភូកីឡាកម្ពុជាដូចតទៅ។

១. ការប្រកួតកីឡាស៊ីហ្គេមស្ថិតនៅក្រោមបទបញ្ញាត្តិរបស់សហព័ន្ធកីឡាស៊ីហ្គេម អនុលោមតាមធម្មនុញ្ញកីឡាអាស៊ីអាគ្នេយ៍សម្រាប់ប្រទេសសមាជិក មិនមែនជាព្រឹត្តការណ៍របស់ប្រទេសណាមួយផ្តាច់មុខឡើយ។

២. អនុវត្តទៅតាមគោលការណ៍កីឡាអន្តរជាតិ និងធម្មនុញ្ញកីឡាអាស៊ីអាគ្នេយ៍ ក្រុមប្រឹក្សាកីឡាអាស៊ីអាគ្នេយ៍ បានរៀបចំសកម្មភាពចំពោះកិច្ចដោះស្រាយ វិវាទ ដោយមានអគ្គលេខាធិការ គណៈកម្មាធិការជាតិអូឡាំពិក ឬនាយបេសកកម្ម និងតំណាងអូឡាំពិកប្រចាំការ។

៣. ថ្នាក់ដឹកនាំប្រតិភូកីឡាស៊ីហ្គេមកម្ពុជាបានរៀបចំក្រុមអន្តាគមន៍ពិសេសពិនិត្យតាមដាន វាយតម្លៃសភាពការណ៍ និងទំនាក់ទំនងភ្លាមៗជាមួយក្រុមការងារទទួលបន្ទុករបស់ភាគីថៃ និងបានរៀបចំផែនការគ្រប់ជ្រុងជ្រោយចំពោះសុវត្តិភាពអត្តពលិក និងការគ្រងគ្រងពេលមានវិបត្តិ។

៤. ក្រុមអន្តាគមន៍ពិសេស បានដាក់អនុវត្តគោលការណ៍ណែនាំតឹងរឹង និងយន្តការសន្តិសុខ ចំពោះប្រតិភូនិងក្រុមកីឡា ដើម្បីធានាសន្តិសុខក្នុងពេលស្នាក់នៅ-ធ្វើដំណើរ និងសុវត្ថិភាពក្នុងពេលប្រកួត។

៥. ក្រុមការងារចុះត្រួតពិនិត្យគ្រប់ការប្រកួតទាំងអស់ ករណីមានបញ្ហាកើតឡើង ភាពមិនប្រក្រតី និងពិនិត្យនីតិវិធីប្ដឹងនៅនឹងកន្លែង។ ចំពោះ ករណីកម្រិតធ្ងន់ធ្ងរ ក្រុមការងារនឹងពិនិត្យនីតិវិធីបញ្ចូនប្រតិភូកីឡាត្រលប់មកកម្ពុជាវិញ។

៦. ក្រុមកីឡា ដែលប្រកួតចប់ភ្លាម ត្រូវរៀបចំធ្វើដំណើរត្រលប់មកកម្ពុជាវិញ។

៧. ការចូលរួមរបស់ប្រតិភូកីឡាកម្ពុជាជាយុទ្ធនាការការទូតដើម្បីកិត្សានុភាពជាតិលើឆាកអន្តរជាតិ និងបញ្ជូនសារទៅកាន់ពិភពលោកថាកម្ពុជាគឺជាប្រទេសស្រលាញ់សន្តិភាព និងការអភិវឌ្ឍ៕

អត្ថបទ៖ សេម កុសល