កីឡាករ កីឡាការិនី​ថៃ ខក​ចិត្ត​រឿង​ប្រាក់​រង្វាន់ ក្រោយ​រដ្ឋាភិបាល​របស់​ខ្លួនមិន​គោរព​តាម​ការ​សន្យា

សហព័ន្ធ​កីឡានីមួយៗ រួមជាមួយកីឡាករ កីឡាការិនី​ថៃ ជាច្រើន បាននាំគ្នាតវ៉ា និងសម្តែងការខកចិត្ត បន្ទាប់ពីរដ្ឋាភិបាលក្បត់ពាក្យសន្យាពីការផ្តល់ប្រាក់រង្វាន់ តាមរយៈការដណ្តើមមេដាយនៅក្នុងព្រឹត្តិការណ៍កីឡាស៊ីហ្គេម លើកទី ៣៣។

យោងតាមសារព័ត៌មាន វៀតណាម Thap Cam TV បានឱ្យដឹង ថា មុនព្រឹត្តិការណ៍ស៊ីហ្គេម លើកទី ៣៣ រដ្ឋាភិបាល ថៃ បានសន្យានឹងផ្តល់ប្រាក់រង្វាន់លើកទឹកចិត្តជាទឹកប្រាក់ សម្រាប់មេដាយមាស ចំនួន ១៦,០០០ ដុល្លារអាមេរិក, មេដាយប្រាក់ ចំនួន ៦,៤០០ ដុល្លារអាមេរិក និងមេដាយសំរឹទ្ធ ចំនួន ៤៨០០ ដុល្លារអាមេរិក។

ទោះបីជាយ៉ាងណា ក្រោយព្រឹត្តិការណ៍ស៊ីហ្គេម លើកទី ៣៣ បាន​បញ្ចប់ អត្តពលិក ថៃ ទាំងអស់មិនបានទទួលប្រាក់រង្វាន់ដូចការសន្យានោះទេ ដោយថយចុះជិត ៤០%។ អ្នកដណ្តើមបានមេដាយមាស ទទួលបានទឹកប្រាក់ត្រឹម ៩,៦៥៥ ដុល្លារអាមេរិក, មេដាយប្រាក់ ទទួលបានទឹកប្រាក់ ៤,៨០០ ដុល្លារអាមេរិក និងសំរឹទ្ធ ទទួលបានទឹកប្រាក់ ២,៤០០ ដុល្លារអាមេរិក។

ចំពោះការបន្ថយប្រាក់រង្វាន់នេះ មូលនិធិអភិវឌ្ឍកីឡាជាតិថៃ (NSDF) បានពន្យល់ ថា តាមស្ថានភាពបច្ចុប្បន្ន ម្ចាស់មេដាយមាសអាចទទួលបានប្រាក់រង្វាន់អតិប្បរមាត្រឹម ៩,៦៥៥ ដុល្លារអាមេរិកប៉ុណ្ណោះ ដោយសាររដ្ឋាភិបាលកំពុងផ្តោតអាទិភាពលើការគាំទ្រប្រជាពលរដ្ឋ ដែលរងផលប៉ះពាល់ពីគ្រោះមហន្តរាយធម្មជាតិ ជាពិសេសគ្រោះទឹកជំនន់។

យ៉ាងណាមិញ បើក្រឡេកមកមើលសហព័ន្ធកីឡានីមួយ រួមជាមួយអត្តពលិក​ថៃ ទាំងអស់ គឺមិនសុខចិត្តនោះទេ ហើយពួកគេក៏បានធ្វើការតវ៉ាផងដែរ។ ជុំវិញរឿងនេះ ប្រធានក្រុមបាល់ទះជម្រើសជាតិ ថៃ Kissada Nilsawai បានសារភាពត្រង់ៗ ថា «រូបគេពិតជាខកចិត្តខ្លាំង»៕

អត្ថបទ៖ សេម កុសល