កីឡា

អាជីពកីឡាបាល់ទះរបស់ ឡាង រាសីកែវ ផ្ដើមចេញពីការលេងតំណាងខេត្តក្នុងកីឡាជាតិលើកទី១

បានផុស

៤ ខែ មុន

នៅ

ថ្ងៃពុធ ១ មេសា ២០២៦

ដោយ

ដៃប៉ះសេឆ្នើមរបស់ក្រុមបាល់ទះស្នងការ ន.ប រាជធានីភ្នំពេញ ឡាង រាសីកែវ ថាអាជីពកីឡារបស់ខ្លួនផ្ដើមចេញពីការលេងតំណាងឲ្យខេត្តត្បូងឃ្មុំក្នុងព្រឹត្តិការណ៍កីឡាជាតិ លើកទី១ អំឡុងឆ្នាំ២០១៦ បន្ទាប់ពីគ្រូៗមើលឃើញសមត្ថភាពអាចបណ្ដុះបណ្ដាលបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឡាង រាសីកែវ និងអ្នកគាំទ្រ

កីឡាករ ឡាង រាសីកែវ បានឲ្យដឹងថា មុនឈានចូលក្នុងក្លឹបអាជីពរូបគេគ្រាន់តែជាអ្នកប៉ះសេក្នុងភូមិ និងលេងតាមសាលា និងតំណាងខេត្តប៉ុណ្ណោះ។ ចំពោះសមត្ថភាពលេងវិញគឺមិនជាខ្លាំង ឬលេចធ្លោដូចកីឡាករដទៃនោះឡើយ ពោលគ្រាន់តែជាអ្នកលេងសាមញ្ញមួយរូបប៉ះសេឲ្យស្មាត់ក្នុងភូមិតែប៉ុណ្ណោះ។

ឡាង រាសីកែវ និងពានក្រឡាហោម

ដៃប៉ះសេឆ្នើមរបស់ក្រុមស្នងការរូបនេះបន្ថែមទៀតថា ដោយមានការមើលឃើញពីរៀមច្បងចាស់ៗ និងគ្រូផងនោះក្លឹបបាល់ទះវិសាខាក៏បានហៅឲ្យធ្វើតេស្តសមត្ថភាព និងមានឱកាសបានចូលហ្វឹកហាត់ជាអាជីពតាំងពីអំឡុងចុងឆ្នាំ២០១៦ នោះរហូតដល់ ឆ្នាំ២០២៣។ ចូលជំរុំហ្វឹកហាត់ និងមានការបង្ហាត់តាមបែបស្ដង់ដានៅទីនោះបានធ្វើឲ្យរូបគេទទួលបានបទពិសោធ និងចំណេះដឹង សមត្ថភាពលេងបាល់ទះជាអាជីពរហូតមកដល់ពេលនេះ។

ឡាង រាសីកែវ និងមិត្តរួមក្រុម

បញ្ជាក់ដែរថា ឡាង រាសីកែវ ជាអតីតកីឡាកររបស់ក្លឹបបាល់ទះវិសាខាអំឡុងចុងឆ្នាំ២០១៦ រហូតដល់ ២០២៣ ទើបបានចែកផ្លូវគ្នាជាមួយក្លឹប។ រូបគេជាកីឡាករប៉ះសេឆ្នើមមួយរូបដែរនៅកម្ពុជា និងកំពុងប្រកបអាជីពជាមួយក្រុមបាល់ទះស្នងការ ន.ប រាជធានីភ្នំពេញ។ អំឡុងដើមខែមីនា ឆ្នាំ២០២៦ នេះរូបគេរួមជាមួយមិត្តរួមក្រុមដណ្ដើមបានពានរង្វាន់សម្ដេច ក្រឡាហោម លើកទី៤ ជូនក្លឹបផងដែរ៕

អត្ថបទដោយ៖ នួន ស៊ីណា