បារាំង​​ហាល​អាវវគ្គ​១៦ក្រុម​​ តារា​ឆ្នើម Mbappé​ ស៊ុត​ប៉េណាល់ទី​អត់ចូល

ក្រុមជម្រើសជាតិបារាំងដែលមនុស្សភាគច្រើនរំពឹងឈានដល់វគ្គផ្តាច់ព្រ័ត្រជើងឯកទ្វីបអឺរ៉ុប Euro 2020 បានធ្លាក់ចេញត្រឹមវគ្គ១៦ក្រុមចុងក្រោយ បន្ទាប់ពីចាញ់ប៉េណាល់ទីកាត់សេចក្តីជាមួយស្វីសដោយលទ្ធផល ៤-៥។

សមរភូមិលើទីលានបៃតងរវាងជម្រើសជាតិបារាំង និងស្វីសនៅវគ្គ១៦ក្រុមក្រោយយប់មិញនេះពិតជាជក់ចិត្តខ្លាំងណាស់ បន្ទាប់ពីមាន់គកបារាំងនាំមុខ ៣-១ទៅហើយ ប៉ុន្តែស្វីសបានវាយ​បក​តាមស្មើ ៣-៣។

មែនទែនទៅ ស្វីសបានបើកការនាំមុខ ១-០ មុនដោយកីឡាករ Haris Seferovic នៅនាទីទី១៥ ប៉ុន្តែនៅវគ្គទី២ បារាំងរកបាន៣គ្រាប់ដែលជាធ្វើបានសម្រេចដោយ Karim Benzema ២គ្រាប់នៅនាទីទី៥៧ និង៥៩ ហើយតារាឆ្នើម Pual Pogba ១គ្រាប់នៅនាទី៧៥ ខណៈ​ស្វីស​រក​បាន​១​គ្រាប់ទៀត​ដោយSeferovic ដដែល​នៅ​នាទី​៨១។

យ៉ាងណា ការប្រកួតស្ទើរតែបញ្ចប់៩០នាទីដោយលទ្ធផល ៣-២ទៅហើយ ប៉ុន្តែការព្យាយាមរបស់ស្វីសពិតជាមិនខកបំណងឡើយ។ នៅ​នាទី៩០ ស្វីស​បាន​តាមស្មើ ៣-៣ ដោយកីឡាករ Mario Gavarnovic។

ចប់៩០នាទី ក្រុមទាំងពីរស្មើគ្នា ៣-៣ និងត្រូវបន្ថែមម៉ោង១៥នាទីពីរដង។ យ៉ាងណា រយៈពេលបន្ថែម៣០នាទីនេះ គ្មានគ្រាប់បាល់កើតឡើងឡើយ ហើយតម្រូវឲ្យទាត់ប៉េណាល់ទីកាត់សេចក្តីរកអ្នកឈ្នះ។

សម្រាប់ការទាត់ប៉េណាល់ទី ស្វីសស៊ុតបានជោគជ័យទាំង៥គ្រាប់ ខណៈបារាំងស៊ុតបានជោគជ័យតែ៤គ្រាប់ប៉ុណ្ណោះ ដោយសារតារាឆ្នើមវ័យក្មេងរបស់ PSG កីឡាករ Kylian Mbappe ស៊ុតត្រូវបានអ្នកចាំទីស្វីសជួយសង្គ្រោះបាន។

អ្នកចាំទីជម្រើសជាតិស្វីស Yann Sommer បានក្លាយជាវីរបុរសជួយសង្គោះការស៊ុតរបស់ Mbappe ហើយនាំជម្រើសជាតិរបស់ខ្លួនឡើងទៅវគ្គ៨ក្រុមចុងក្រោយ។

ចំណែកមួយគូទៀតយប់មិញក៏ស្វិតស្វាញខ្លាំងដែររវាងជម្រើសជាតិអេស្ប៉ាញ និងក្រូអាស៊ី។ ក្រុមទាំងពីរប្រើពេល​១២០​នាទី​ទើប​រកឃើញអ្នកឈ្នះ។ សម្រាប់៩០នាទីដំបូង ក្រុមទាំងពីរស្មើគ្នា ៣-៣ ប៉ុន្តែក្នុងនាទីបន្ថែម១៥នាទីពីរដង អេស្ប៉ាញរកបាន២គ្រាប់ដើម្បីឡើងទៅកាន់វគ្គ៨ក្រុមចុងក្រោយ។

ពេល​នេះ​រក​ឃើញ​ក្រុម​ឡើង​វគ្គ​៨​ក្រុម​ចុង​ក្រោយ​ចំនួន​៦​ក្រុម​ហើយ​គឺ

• ដាណឺម៉ាក់
• អ៉ីតាលី
• ឆែក
• បែលហ្ស៊ិក
• អេស្ប៉ាញ
• ស្វីស

អត្ថបទ៖ វីរបុត្រ
ប្រភពរូបថត៖ Dailymail