អត្ត​ព​លិ​ក​ជិត​២០០​នាក់ នឹង​ចូល​រួម​ការ​ប្រកួត​កីឡា​ទោចក្រយាន​ជើងឯក​ថ្នាក់​ជាតិ​ប្រចាំ ឆ្នាំ​២០២១ នៅ​ខេត្តសៀមរាប

ព្រឹត្តិការណ៍​ប្រកួត​កីឡា​ទោចក្រយាន​ជ្រើសរើស​ជើងឯក​ថ្នាក់​ជាតិ ប្រចាំឆ្នាំ ២០២១ នឹងមាន​អត្តពលិក​ប្រមាណ​ជិត ២០០ នាក់ ចូលរួម​ក្នុងការ​ប្រកួត​នេះ ដែល​នឹងត្រូវ​ចាប់ផ្តើម​នា​ថ្ងៃទី​១១​ដល់ ១៣ ខែ មករា​ឆ្នាំ​២០២២​នេះ នៅលើ​ទឹកដី​ខេត្ត សៀមរាប។

លោក នូ ចំរើន អគ្គលេខាធិការ​សហព័ន្ធ​ខ្មែរ​កីឡា​ទោចក្រយាន និយាយ​នៅក្នុង​សន្និសីទ​សារព័ត៌មាន នា​រសៀល​ថ្ងៃទី ០៦ មករា ២០២២​នេះ ឱ្យ​ដឹង​ថា សហព័ន្ធ​ខ្មែរ​កីឡា​ទោចក្រយាន គ្រោង​រៀបចំ​ការប្រកួត​កីឡា​ទោចក្រយាន​ជ្រើសរើស​ជើងឯក​ថ្នាក់​ជាតិ ឆ្នាំ​២០២១ ម្តង​រួច​មក​ហើយ កាលពី ដើមខែ​ធ្នូ ឆ្នាំ​២០២១ ប៉ុន្តែ​ត្រូវ​ពន្យារពេល​ការប្រកួត​វិញ​ដោយសារ​បញ្ហា​ជំងឺ​កូ​វីដ១៩​។

ក្រោយពី​ស្ថានការណ៍​មាន​ភាព​ល្អប្រសើរ​ឡើងវិញ សហព័ន្ធ​ក៏បាន​ត្រៀម​រៀបចំ​ការប្រកួត​ឡើងវិញ​នា​ថ្ងៃទី ១១ ដល់​ថ្ងៃទី​១៣ ខែមករា ឆ្នាំ​២០២២ នៅ​លើក​ទឹកដី​ខេត្តសៀមរាប​។

អគ្គលេខាធិការ​រូបនេះ បញ្ជាក់​ឲ្យ​ដឹង​ទៀតថា ការប្រកួត​ថ្នាក់ជាតិ​នេះ មាន​ប្រតិភូ គ្រូ បង្វឹក កីឡាករ កីឡាការិនី ចុះឈ្មោះ​ចូលរួម​ប្រកួត​សរុប​មាន​ចំនួន ២៥២​នាក់​(​អត្ត​ព លិ​ក​១៨៣​នាក់​) មកពី ១៨​សមាគម ក្លិប រាជធានី​-​ខេត្ត បើ​បូក​រួមទាំង​មន្ត្រី​គណៈ​កម្ម ការ​បច្ចេកទេស និង​មន្ត្រី​ស្ម័គ្រចិត្ត​មាន​ចំនួន​សរុប​៦០០​នាក់​។ ក្នុង​ព្រឹត្តិ​ការណ៍​ប្រកួត​នេះដែរ សហព័ន្ធ​ក៏មាន​រៀបចំ​ការ សម្ដែង​កង់​ក្បាច់​(BMX Free Style) ការសម្ដែង​ស្គី​ក្ដារ និង​ស្គី​កង់​ផងដែរ។

ឆ្នាំនេះ សហព័ន្ធ​ក៏បាន​ធ្វើការ​អញ្ជើញ ក្រុម​ក្លិប​ម៉ូតូ​ធំ អឹម​ដាប់​ប៊​ល​យូ (BMW) ដើម្បី​ចូលរួម​ក្នុងការ ជួយ​សម្របសម្រួល នាំ​ផ្លូវ​ការប្រកួត​លើ​វិញ្ញាសា​កង់​គួ​ក ដែល​ពួកគាត់​សុទ្ធតែជា​កីឡាករ​ប្រណាំង​ម៉ូតូ ដែលមាន​សមត្ថភាព និង​កម្រិត​ជំនាញ​ខ្លាំង ព្រមទាំង​បទពិសោធន៍​ខ្ពស់ ធ្លាប់​ចូល រួម​រៀបចំ​ព្រឹត្តិការណ៍​ប្រណាំង​កង់​ពិភព លោក ដែល​កម្ពុជា​ធ្វើជា​ម្ចាស់ផ្ទះ កាលពី ដើមឆ្នាំ​២០២០ និង​ការប្រកួត​ថ្នាក់ជាតិ កាលពីដើមឆ្នាំ​២០២១ រួចមកហើយ​។

អគ្គលេខាធិការ​រូបនេះ​អះអាង​ថា សម្រាប់​សហព័ន្ធ​ខ្មែរ​កីឡា​ទោចក្រយាន​យើង​កំពុង តែ​ស្វែងរក​ធនធាន​កីឡាករ​-​កីឡាការិនី ដែលមាន សមត្ថភាព ដើម្បី​បញ្ចូល​ក្នុង​ក្រុម​ជម្រើសជាតិ ហេតុដូចនេះ មន្ត្រី​បច្ចេកទេស​របស់​សហព័ន្ធ តែងតែ​សំឡឹងមើល​លើ​ទេពកោសល្យ​របស់​ពួកគាត់​ជា​រៀងរាល់ឆ្នាំ តាមរយៈ​ការប្រកួត​ជើងឯក​ថ្នាក់ជាតិ​ប្រចាំឆ្នាំ ដែលជា​ព្រឹត្តិការណ៍​ប្រកួត​កម្រិត​ជាតិ​ខ្ពស់ និង​ធំជាងគេ​ប្រចាំឆ្នាំ​ដើម្បី​ត្រៀម​ប​ញ្ជូ​ល​ឈ្មោះ​កីឡាករ ក្នុង​បញ្ជី ដែល​ត្រូវ​ទៅ​ចូលរួម​ការប្រកួត​កីឡា​ស៊ី​ហ្គេ ម លើក​ទី​៣១​ឆ្នាំ​២០២២ នៅ​ប្រទេស​វៀតណាម និង​ការធ្វើជា​ម្ចាស់ផ្ទះ ការប្រកួត​កីឡា​ស៊ី​ហ្គេម លើក​ទឹ ៣២ ឆ្នាំ​២០២៣ នៅ​កម្ពុជា​ផងដែរ​។

ជាមួយគ្នា​នោះ សហព័ន្ធ​នឹង​រៀបចំ​វិធាន ការ​អនាម័យ វាស់​កម្តៅ បាញ់​អាល់កុល និង​រក្សា​គម្លាត​សុវត្ថិភាព​ឲ្យ​បាន​ហ្មត់ចត់ ដើម្បី​ចូលរួម​ទប់ស្កាត់​ការឆ្លង​ជំងឺ​កូ​វីដ​-១៩ តាម​គោលការណ៍​ណែនាំ​របស់​ក្រសួងសុខាភិបាល​ផងដែរ​។

សូម​បញ្ជាក់​ថា ក្នុងការ​ប្រកួត​ជើងឯក​ជាតិ​កីឡា​ប្រណាំង​ទោចក្រយាន​នេះ ក្រៅពី​ការឧបត្ថម្ភ​របស់​រដ្ឋ សហព័ន្ធ​ក៏បាន​ទទួល ការជួយ​ពី​ក្រុមហ៊ុន​មួយចំនួន ក្នុងនោះ​ក្រុមហ៊ុន Herbalife បាន​ក្លាយជា​ក្រុម ហ៊ុន​ឧបត្ថម្ភ​ធំ ហើយ​បន្ថែម​ពីលើ​នេះ​ក៍មាន បណ្តា​ក្រុមហ៊ុន​ជាច្រើន​ទៀត​ដែល​បាន​ចូលរួមចំណែក​ជួយឧបត្ថម្ភ​គាំទ្រ​ដល់​ព្រឹ​ត្តិ​ការណ៍​ប្រកួត​ជ្រើសរើស​ជើងឯក​ថ្នាក់ជាតិ​ប្រចាំឆ្នាំ មានដូចជា ក្រុមហ៊ុនស្រា​បៀ​ហ្គេ​ន​សឺត ក្រុមហ៊ុន​ធានារ៉ាប់រង AIA Cambodia Life Insurance, ក្រុម ហ៊ុន​ទឹក​ពិសារ Eragold Corporation Co., Ltd, សណ្ឋាគារ​សុខា​សៀមរាប និង​ក្រុមហ៊ុន wonderpass៕

ដោយ ៖ វិ​សិទ្ធ