កីឡា

ព្រះខ័នរាជស្វាយរៀង ឈ្នះក្រុម Petaling Jaya ក្នុងជំនួបមិត្តភាពអន្តរជាតិនៅម៉ាឡេស៊ី

បានផុស

៤ years មុន

នៅ

ថ្ងៃសុក្រ ១០ មិថុនា ២០២២

ដោយ

ក្លិបបាល់ទាត់ព្រះខ័នរាជស្វាយរៀង បានយកឈ្នះ ក្លិប Petaling Jaya City FC ដោយលទ្ធផល ១-០ នៅក្នុងជំនួបមិត្តភាពអន្តរជាតិកម្ដៅសាច់ដុំ នាប្រទេសម៉ាឡេស៊ី។

ក្នុងការប្រកួតនេះ កីឡាករ ១១នាក់របស់ព្រះខ័នរាជស្វាយរៀង ចាប់ផ្ដើមដំបូងមាន អ្នកចាំទី អាំ សុវណ្ណារ៉ាត ខ្សែការពារ ៤រូប គឹម សុខយុទ្ធ, O’Connell, Odawara និងសារ៉េត គ្រីយ៉ា។ ខណៈនៅតំបន់បម្រើមានកីឡាករ សួន សុវណ្ណ, ជា សំណាង និង Mizuno Hikaru។ ចំពោះតំបន់ខាងលើ មិន រតនៈ ចាប់ដៃគូនៅតំបន់ស្លាបសងខាងជាមួយ ប្រាក់ មុន្នីឧត្តម ខណៈ Marcus Haber ឈរជាខ្សែប្រយុទ្ធទោលម្នាក់ឯង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅវគ្គទី១ ក្រុមដែលមានមូលដ្ឋាននៅខេត្តស្វាយរៀង បានបើកការនាំមុខមុននៅនាទី២០ លើក្រុមដែលកំពុងឈរនៅលេខ៨ នៃលីគកំពូលម៉ាឡេស៊ី ដោយកីឡាករ សួន សុវណ្ណ ហើយបានរក្សាលទ្ធផល ១-០ ដល់ចប់វគ្គទី១។ លុះចូលដល់វគ្គទី២ គ្រាប់បាល់ពុំមានកើតឡើងឡើយ ធ្វើឱ្យព្រះខ័នរាជស្វាយរៀង យកឈ្នះ Petaling Jaya City FC ដោយលទ្ធផល ១-០។

គួរឱ្យចាប់អារម្មណ៍ទៅទៀតនោះ កីឡាករកូតាបរទេសថ្មី សញ្ជាតិអេស្ប៉ាញឈ្មោះ Víctor Blasco លេងក្នុងតំណែងជាខ្សែបម្រើស្លាប ក៏បានបង្ហាញខ្លួនក្នុងការប្រកួតនេះផងដែរ។

ព្រះខ័នរាជស្វាយរៀង នឹងនៅសល់ការប្រកួតមួយប្រកួតទៀត គ្រោងធ្វើនៅថ្ងៃទី១៣ ខែមិថុនា ឆ្នាំ២០២២ ដោយត្រូវជួបជាមួយក្រុម UiTM FC នៃលីគទី២ ម៉ាឡេស៊ី នាវេលាម៉ោង ៤:០០ល្ងាច (ម៉ោងនៅកម្ពុជា)៕

អត្ថបទ ៖ មន្នីរ័ត្ន