កីឡា

លោកគ្រូ Nestor ថា រាល់ពេលទៅលេងទឹកដីគិរីវង់សុខសែនជ័យគឺពិបាកយកឈ្នះ

បានផុស

៤ years មុន

នៅ

ថ្ងៃសៅរ៍ ២៥ មិថុនា ២០២២

ដោយ

ព្រះខន័រាជស្វាយរៀងធ្វើដំណើរទៅទឹកដី គិរីវង់សុខសែនជ័យដើម្បីប្រកួតជុំទី២ ត្រូវនឹងសប្តាហ៍ទី៨នៃជម្រើសជើងឯកខេមបូឌានព្រីមៀរលីគ ឆ្នាំ២០២២ វេលាម៉ោង៣:៤៥នាទីរៀលនេះ ដែលផ្សាយផ្ទាល់តាមរយៈផេក កម្ពុជាថ្មី។

សម្រាប់ការប្រកួតនេះលោក Conor Nestor គ្រូបង្វឹករបស់ ព្រះខ័នរាជស្វាយរៀងចាត់ទុកជាការប្រកួតដែលពិបាកយកឈ្នះម្ចាស់ផ្ទះ ពីព្រោះកន្លងមក រាល់ពេលការប្រកួតនៅទឹកដីគិរីសុខសែនជ័យគឺពិបាក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានប្រាប់ថា ៖«ពិតណាស់ ការប្រកួតនេះនៅកីឡដ្ឋានរបស់ពួកគេ។ តាមទម្លាប់ គិរីវង់សុខសែនជ័យ ពិបាកយកឈ្នះរាល់ពេលដែលយើងដំណើរទៅទឹកដីខេត្តតាកែវ។ យើងដឹងថា ការប្រកួតនេះនឹងពិបាកខ្លាំង»។

បន្ទាប់ពីចប់ជុំទី១នៃជម្រើសជើងឯកខេមបូឌានព្រីមៀរលីគ ក្លិបនីមួយៗមានពេលវេលាដើម្បីរៀបចំក្រុមជាថ្មីទាំងការប្រកួតមិត្តភាពកម្តៅសាច់ដុំ និងដោះដូរសមាជិកជាដើម។ ចំណែកព្រះខ័នរាជស្វាយរៀងក៏បានចេញទៅប្រកួតមិត្តភាពអន្តរជាតិនៅប្រទេសម៉ាឡេស៊ី និងនាំចូលសមាជិកថ្មីដើម្បីពង្រឹងក្រុមដែរ។

លោកគ្រូបង្វឹកជនជាតិអៀរឡង់បានឲ្យដឹងថា ៖«ការត្រៀមខ្លួនពិបាកខ្លាំង ពីព្រោះពេលវេលាដោះដូរកីឡាករបើកមុនការប្រកួតនេះមួយថ្ងៃប៉ុណ្ណោះ ដូច្នេះពិបាកក្នុងការចុះបញ្ជីឈ្មោះកីឡាករថ្មីសម្រាប់ការប្រកួតថ្ងៃនេះ។ ខ្ញុំសង្ឃឹមថា ឆ្នាំក្រោយ CPL អាចរៀបចំផែនការឲ្យប្រសើរជាងនេះ»។

លោកបានសង្កត់ធ្ងន់ថា ៖«៤ក្រុមផ្សេងទៀតអត់ប្រកួតថ្ងៃនេះទេ ដូច្នេះពួកគេមានពេលវេលាច្រើនសម្រាប់ចុះបញ្ជីកីឡាករថ្មី។ ប្រការនេះធ្វើឲ្យពួកគេមានប្រៀប។ វាជាអ្វីម្យ៉ាងដែលគួរតែជៀសវាងនៅពេលលីគអាជីពកំពុងដំណើរការ»។

ព្រះខ័នរាជស្វាយរៀង បានប្រកាសចុះកុងត្រាសមាជិកថ្មី សញ្ជាតិអេស្ប៉ាញ កីឡាករ Víctor Blasco លេងក្នុងតំណែងជាខ្សែបម្រើស្លាប។

សូមបញ្ជាក់ថា ព្រះខ័នរាជស្វាយរៀង ឈរលេខ១ កំពូលតារាង ត្រឹមជុំទី១ ជម្រើសជើងឯកខេមបូឌានព្រីមៀរលីគ ឆ្នាំ២០២២ បន្ទាប់ពីឆ្លងកាត់៧ប្រកួតគឺ ឈ្នះ៦ដង ស្មើ១ដង មិនដែលចាញ់ មាន១៩ពិន្ទុ ដាច់ក្រុមលេខ ២ បឹងកេត ៦ពិន្ទុ៕