កីឡា

សាលី អូម៉ើត ទិញម៉ូតូទឹកថ្មី រំពឹងឈ្នះជើងឯកម៉ូតូទឹកពិភពលោក World Series

បានផុស

២ years មុន

នៅ

ថ្ងៃសុក្រ ១ កក្កដា ២០២២

ដោយ

កីឡាករម៉ូតូទឹកកម្ពុជា សាលី អូម៉ើត បានចេញដំណើរទៅប្រទេសប៉ូឡូញកាលពីថ្ងៃទី៣០ ខែមិថុនា ឆ្នាំ២០២២ដើម្បីចូលរួមប្រកួតជើងឯកម៉ូតូទឹកពិភពលោក 2022 World Series ដែលមាន៣ដំណាក់កាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ម្ចាស់មេដាយមាសកីឡាទ្វីបអាស៊ីឆ្នាំ២០១៨ កីឡាករ សាលី អូម៉ើត បានប្រាប់ថា ការប្រកួតជើងឯកម៉ូតូទឹកពិភពលោកនេះកីឡាករមកពី៣ទ្វីបផ្សេងគ្នាគឺអឺរ៉ុប អាមេរិក និងអាស៊ី ហើយការប្រកួតមាន៣ដំណាក់កាល។ ដំណាក់កាលទី១ប្រកួតនៅប្រទេសប៉ូឡូញចាប់ពីថ្ងៃទី១៩ ដល់២៤ ខែកក្កដា ឆ្នាំ២០២២។ ដំណាក់កាលទី២ ប្រកួតនៅសហរដ្ឋអាមេរិក និងដំណាក់កាលទី៣ជាជុំផ្តាច់ព្រ័ត្រប្រកួតនៅប្រទេសថៃ។

សាលី អូម៉ើត នឹងប្រកួត៣វិញ្ញាសា គឺ Pro-Am Ski Modify ដែលជាវិញ្ញាសារូបគេធ្លាប់ឈ្នះមេដាយមាសកីឡាអាស៊ី នៅប្រទេសឥណ្ឌូនេស៊ី កាលពីឆ្នាំ២០១៨ និងវិញ្ញាសា Pro-Am Ski Lites Stock ព្រមទាំង Pro-Am Ski 4 Strokes Stock។ កីឡាករបានប្រាប់ថា ការប្រកួតជើងឯកម៉ូតូទឹកពិភពលោកនេះ ខ្លួនអត់បានចូលរួមប្រកួតរយៈពេល២ឆ្នាំមកហើយដោយសារបញ្ហារបួសឆ្អឹងខ្នង ដូច្នេះសម្រាប់ឆ្នាំ២០២២នេះ ត្រូវតែដណ្តើមពានរង្វាន់មួយនេះ មកជូនកម្ពុជាឲ្យខាងតែបាន។ ការប្តេជ្ញាចិត្តខ្ពស់បែបនេះដោយសាររូបគេបានត្រៀមខ្លួនល្អ ទាំងការហ្វឹកហាត់ និងបានទិញម៉ូតូទឹកថ្មី។

«ខ្ញុំទៅលើកនេះសង្ឃឹមខ្ពស់មែនទែន ពីព្រោះយើងបានត្រៀមខ្លួន និងទិញម៉ូតូថ្មី។ យើងត្រៀមខ្លួនបានល្អមែនទែន។ ឆ្នាំនេះខ្ញុំសង្ឃឹមថា នឹងយកពានរង្វាន់ពិភពលោក World Series មកជូនកម្ពុជាឲ្យទាល់តែបាន»។ អូម៉ើត បានប្តេជ្ញាចិត្ត។

ប្រទេសដែលខ្លាំងមិនអាចមើលស្រាលបាន គឺកីឡាករសហរដ្ឋអាមេរិក ដោយសារពួកគេមានការប្រកួតច្រើនជារៀងរាល់ខែ ដូច្នេះធ្វើឲ្យសមត្ថភាពរបស់ពួកគេកើនឡើងខ្ពស់ដែលខុសពីការប្រកួតនៅអាស៊ី២ខែម្តង។

សម្រាប់កម្ពុជាបញ្ជូនកីឡាករ៧រូប មាន សាលី អូម៉ើត, មីន ម៉ូស្តាន, កៃ វ៉ាន់ស៊ីដែន, មីន អូស្មាន់, សាលី ហ្វីលីន, ស៊ីម សាក់រនី និងប្រតិភូគ្រូបង្វឹក៦នាក់ ដឹកនាំដោយឯកឧត្តម ណុះ ស្លេះ ប្រធានសហប័ន្ធកីឡាម៉ូតូទឹកកម្ពុជា៕

អត្ថបទ៖ វីរបុត្រ

Related Topics:កីឡាម៉ូតូទឹក