ព្រះខ័នរាជស្វាយរៀង ចែកផ្លូវជាមួយ Emmanuel Junior Mbarga ជាផ្លូវការហើយ

បន្ទាប់ពីមានភាពស្ងប់ស្ងាត់អំពីរឿងរ៉ាវចាកចេញ និងស្នាក់នៅបន្ត រវាង ក្លិបព្រះខ័នរាជស្វាយរៀង ជាមួយកីឡាករសញ្ជាតិកាម៉េរូន Emmanuel Junior Mbarga ពេលនេះភាគីទាំងពីរបានព្រមព្រៀងគ្នាបញ្ចប់កិច្ចសន្យាជាផ្លូវការ ក្រោយរង់ចាំអស់រយៈពេលជាង ២ខែ។

ទីផ្សារដោះដូរកីឡាករលីគកំពូលកម្ពុជា ជើងទី២ បានបើកតាំងពីថ្ងៃទី២៤ ខែមិថុនា ឆ្នាំ២០២២ និងបានបិទនៅថ្ងៃទី២២ ខែកក្កដា ស្របពេលដែលកីឡាករ Emmanuel Junior Mbarga ទទូចចង់ចាកចេញពីក្លិប ប៉ុន្តែត្រូវបានក្លិបបដិសេធ និងឈានទៅដល់ក្លិបបន្ថែមកីឡាករថ្មី គឺកីឡាករ Victor Blasco ជំនួសរូបគេ។ និងធ្វើឱ្យរូបគេបានត្រឹមតែហ្វឹកហាត់ជាមួយក្លិប ប៉ុន្តែការប្រកួតនៅជើងទី២ ពុំអាចចូលរួមប្រកួតបានឡើយ ដោយសារពុំត្រូវបានចុះឈ្មោះ ដ្បិតមានកីឡាករបរទេស ៥ នាក់។

Emmanuel Junior Mbarga បានចូលរួមជាមួយ ព្រះខ័នរាជស្វាយរៀង កាលពីពាក់កណ្ដាលរដូវកាល ឆ្នាំ២០២១ ហើយរកបាន ៤ គ្រាប់ផងដែរ ក្នុងរដូវកាល២០២១។ ចូលដល់រដូវកាល២០២២ រូបគេបានរកគ្រាប់បាល់បាន ៣ គ្រាប់ ជាពិសេសបញ្ចូនបាល់ឱ្យមិត្តរួមក្រុមបញ្ចប់ (assist) ៧ ដងផងដែរ និងរួមចំណែកជួយឱ្យក្លិបឈរកំពូលតារាងនៃលីគ ដល់បច្ចុប្បន្ន៕

អត្ថបទ៖ មន្នីរ័ត្ន