កីឡា

កីឡាកម្ពុជា ២ ប្រភេទ ឈ្នះមេដាយមាស ប្រាក់ សំរឹទ្ធ រៀងៗខ្លួន ពីការប្រកួតលើឆាកអន្តរជាតិ

បានផុស

៣ years មុន

នៅ

ថ្ងៃចន្ទ ៥ កញ្ញា ២០២២

ដោយ

នៅដើមខែកញ្ញា ឆ្នាំ ២០២២ នេះ កីឡារបស់កម្ពុជា ២ ប្រភេទ កាយសម្ព័ន្ធ និងហែលទឹកពាក់ជើងទា បានចេញទៅប្រកួតនៅក្រៅប្រទេសក្នុងព្រឹត្តិការណ៍ ២ ផ្សេងគ្នាកម្រិតទ្វីប និងពិភពលោក ហើយបានទទួលលទ្ធផលជាផ្លែផ្កា ឈ្នះមេដាយទាំង ៣ មាស ប្រាក់ និងសំរឹទ្ធ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាហែលទឹកពាក់ជើងទា បានចេញទៅប្រកួតមុនគេ ពោលគឺក្នុងព្រឹត្តិការណ៍ Finswimming’s World Cup Round Swimming Pool 2022 ធ្វើឡើងនៅប្រទេសថៃ ដោយអត្តពលិក ៨ រូបចូលរួម ប្រកួតចាប់ពីថ្ងៃទី ០១ ដល់ថ្ងៃទី ០៥ ខែកញ្ញា ឆ្នាំ ២០២២ នៅខេត្តភូកេត ប្រទេសថៃ។

ជាលទ្ធផលអត្តពលិកកម្ពុជា រកបានមេដាយ ៤ គ្រឿង ក្នុងនោះមាស ៣ គ្រឿង និងសំរឹទ្ធ ១ គ្រឿង ដោយកីឡាការិនីតែម្នាក់គត់ គឺកីឡាការិនី កាំង មុយនីន លើ ៤វិញ្ញសាផ្សេងៗគ្នា រួមមាន លើវិញ្ញាសា Women 200m Bifins, Women 100m Bifins និងវិញ្ញាសា Women 400m Bifins ខណៈទទួលបានមេដាយសំរឹទ្ធ ១ គ្រឿងគឺលើវិញ្ញាសា Women 50m Bifins។

ដោយឡែកចំពោះកីឡាកាយសម្ព័ន្ធវិញ ដែលកម្ពុជាចូលរួមក្នុងព្រឹត្តិការណ៍កីឡាកាយសម្ព័ន្ធជើងឯកអាស៊ី លើកទី ៧ (7th Aerobic Gymnastic ASIAN Championships) ដែលធ្វើឡើងនៅប្រទេសថៃ ដូចគ្នា ប្រកួតចាប់ពីថ្ងៃទី ០៣ ដល់ថ្ងៃទី ០៥ ខែកញ្ញា ឆ្នាំ ២០២២ នៅខេត្តប៉ាតាយ៉ា ប្រទេសថៃ។

ជាការកត់សម្គាល់ផងដែរថាអត្តពលិកកាយសម្ព័ន្ធកម្ពុជា ក៏រកមេដាយបាន ៣ គ្រឿងផងដែរត្រឹមថ្ងៃទី ០៤ ម្សិលមិញមុននឹងបន្តការប្រកួតទៀតនៅថ្ងៃនេះ ដែលជាថ្ងៃចុងក្រោយ។ មេដាយដែលរកបានរួមមាន ប្រភេទអាយុក្រោម ១៥ ឆ្នាំ វិញ្ញាសាជាគូ មេដាយប្រាក់ ១ គ្រឿង កីឡាករ ស្រ៊ាន វួចទ្រី និងកីឡាការិនី ឈួន ស្រីនាត ។ ខណៈមេដាយប្រាក់ ១ ទៀតលើវិញ្ញាសានារីអាយុក្រោម ១៨ ឆ្នាំ ជាក្រុម ដោយកីឡាការិនី ឌឹម អ៊នធីតា, ណេម សុខហេង, ស៊ីវ ចន្ថា, សួស ស្រីពៅ និងឈួន សុណ្ណបញ្ញា។ ដោយឡែកមេដាយសំរឹទ្ធ ធ្វើបានក្នុងវិញ្ញាសាទ្រីយ៉ូ ដោយកីឡាករ ស្រ៊ាន វួចទ្រី, កីឡាការិនី ឈួន ស្រីនាត និងកីឡាការិនី ច្រឹង ចាន់ត្រា។

សូមបញ្ជាក់ថា កីឡាទាំង ២ ប្រភេទនេះ សុទ្ធតែត្រូវបានបញ្ចូលទៅក្នុងការប្រកួតកីឡាស៊ីហ្គេម លើកទី ៣២ ឆ្នាំ ២០២៣ នៅកម្ពុជា ផងដែរ៕

អត្ថបទ៖ មន្នីរ័ត្ន