លោកហែម គីរី សុំអ្នកគាំទ្រអធ្យាស្រ័យកីឡាករ សុវណ្ណអារុន ខណៈគេនៅក្មេង អនាគតវែងឆ្ងាយ

លោកហែម គិរី អគ្គលេខាធិការសហព័ន្ធកីឡាហែលទឹក កម្ពុជា បានស្នើសុំការអធ្យាស្រ័យពីសំណាក់អ្នកគាំទ្រ កម្ពុជា ចំពោះកំហុសឆ្គងរបស់កីឡាករហែលទឹក កម្ពុជា វ័យក្មេង មនត្រស ផានសុវណ្ណអារុន។

កីឡាករហែលទឹក មនត្រស ផានសុវណ្ណអារុន បានរងការរិះគន់យ៉ាងខ្លាំងពីសំណាក់អ្នកគាំទ្រ ក៏ដូចជាប្រជាជន កម្ពុជា ទាំងមូល បន្ទាប់ពីរូបគេបង្ហោះសារ ដោយអារម្មណ៍ខកចិត្ត ដែលមិនបានចូលរួមប្រកួតក្នុងព្រឹត្តិការណ៍កីឡាស៊ីហ្គេមលើកទី ៣៣ នៅ ថៃ ក្រោយ កម្ពុជា ប្រកាសដកខ្លួនចេញ ដោយសារបារម្ភអំពីសុខសុវត្ថិភាព។

ផានសុវណ្ណអារុន បានបង្ហោះសារនៅលើបណ្តាញសង្គម IG របស់ខ្លួនដូច្នេះ ថា៖ «ខ្ញុំមកក្នុងព្រឹត្តិការណ៍ទាំងនេះ ដើម្បីប្រកួតប្រជែង ហើយនិងជួបគ្រូបង្វឹកចាស់របស់ខ្ញុំ និងមិត្តភក្តិរបស់ខ្ញុំ។ ប៉ុន្តែជាអកុសល ខ្ញុំមិនទទួលបានឱកាសនេះនោះទេ។ ទោះបីជាយ៉ាងណា គ្រប់យ៉ាងបានកើតឡើងរួចទៅហើយ។ ខ្ញុំចង់អរគុណទៅកាន់អ្នកស្មគ្រចិត្ត និងបុគ្គលិករបស់ ថៃ ទាំងអស់គ្នា សម្រាប់ការរាក់ទាក់ និងធានាសុវត្ថិភាពជូនពួកយើង»។

លោកហែម គិរី អគ្គលេខាធិការសហព័ន្ធកីឡាហែលទឹក កម្ពុជា បានចេញមុខសូមទោសជំនួសកីឡាករហែលទឹកវ័យ ២២ ឆ្នាំខាងលើ ក្រោយសំណេររបស់គេ បានរងការរិះគន់ខ្លាំងពីសំណាក់ប្រជាជន កម្ពុជា។ លោកបានទទូចឱ្យអ្នកគាំទ្រយោគយល់អធ្យាស្រ័យចំពោះកីឡាកររូបនេះ ព្រោះនេះជាកំហុសដោយអចេតនា ហើយកីឡាករកំពុងស្ថិតក្នុងវ័យក្មេង ដោយរូបគេនៅមានអនាគតវែងឆ្ងាយទៀត ដើម្បីតំណាងឱ្យ កម្ពុជា។ យ៉ាងណា លោកក៏បានបញ្ជាក់ផងដែរ ថាលោកជាចាស់ទុំបានណែនាំកីឡាកររួចហើយ ដើម្បីកុំឱ្យមានកំហុសឆ្គងលើកក្រោយទៀត។

ជុំវិញរឿងខាងលើ លោក ហែម គិរី បានសរសេរនៅលើបណ្តាញសង្គម Facebook ថា៖ «ខ្ញុំសូមអធ្យាស្រ័យជំនួសក្មេងៗដែលមានកំហុសឆ្គងដោយអចេតនា ពួកគាត់ពិតជាមិនចង់អោយមានបញ្ហាកើតឡើងបែបនេះទេ គ្នានៅក្មេងៗណាស់អនាគតវែងឆ្ងាយ សូមចិត្តបងប្អូនបន្ធូបន្ថយអោយគ្នាផង ក្នុងនាមជាចាស់ទុំបានណែនាំពួកគាត់ហើយដើម្បីកុំអោយមានការខុសឆ្គងបន្តទៀត ពេលនេះប្រជាជនយើងកំពុងតែពិបាកណាស់ទៅហើយយើងត្រូវសាមគ្គីគ្នា ខ្មែរជួយគ្នា សង្ឃឹមបងប្អូនខ្មែរយោគយល់»៕

អត្ថបទ៖ សេម កុសល