កីឡា

ជោគជ័យមួយជំហានទៀត! គុនខ្មែរមាន៧ប្រទេសចុះឈ្មោះចូលរួមប្រកួតស៊ីហ្គេម

បានផុស

២ years មុន

នៅ

ថ្ងៃព្រហស្បតិ៍ ១៣ មេសា ២០២៣

ដោយ

ប្រទេសនៅក្នុងតំបន់អាស៊ានចំនួន៦ បូកទាំងម្ចាស់ផ្ទះកម្ពុជាមានចំនួន៧បានចុះឈ្មោះជាផ្លូវការដើម្បីចូលរួមប្រកួតកីឡាអត្តសញ្ញាណជាតិ«គុនខ្មែរ»ក្នុងព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រទេសទាំង៧នោះមានម្ចាស់ផ្ទះកម្ពុជា ឡាវ ហ្វីលីពីន ម៉ាឡេស៊ី ឥណ្ឌូណេស៊ី មីយ៉ាន់ម៉ា និងវៀតណាម។

លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរបានប្រាប់សារព័ត៌មានកម្ពុជាថ្មីថា ៖«ការពិត បណ្តាប្រទេសដែលធ្វើម្ចាស់ផ្ទះដាក់ប្រភេទកីឡាប្រដាល់នេះជាទូទៅមិនលើសពី៨ប្រទេសទេ ដូច្នេះសម្រាប់គុនខ្មែររបស់យើងមានប្រទេសចុះឈ្មោះចូលរួមប្រកួតដល់ទៅ៧ប្រទេសគឺចាត់ទុកជាជោគជ័យមួយទៀត។ សូមអរគុណដល់សារព័ត៌មានកម្ពុជាថ្មីដែលបានចូលរួមផ្សព្វផ្សាយ ហើយសូមជួយផ្សព្វផ្សាយឲ្យបានច្រើនទូលំទូលាយដើម្បីឲ្យប្រជាពលរដ្ឋជ្រាបច្បាស់»។

លោកបានបញ្ជាក់ថា អត្តពលិកគុនខ្មែរបានកំពុងយកចិត្តទុកដាក់យ៉ាងខ្លាំងដើម្បីបង្កើនសមត្ថភាព និងសម្រួចអាវុធក្នុងការត្រៀមប្រកួតក្នុងកីឡាស៊ីហ្គេម ដែលជាព្រឹត្តិការណ៍ប្រវត្តិសាស្ត្រដំបូងនៅក្នុងប្រទេសកម្ពុជា។

សូមបញ្ជាក់ថា ក្នុងនាមជាម្ចាស់ផ្ទះ និងជាម្ចាស់ក្បាច់គុនអត្តសញ្ញាណជាតិ កម្ពុជាបានដាក់គុនខ្មែរ ក្នុងកីឡាស៊ីហ្គេម លើកទី៣២ ឆ្នាំ២០២៣ ដែលមាន១៩វិញ្ញាសា (១៩មេដាយមាស) ក្នុងនោះ១១វិញ្ញាសាសម្រាប់បុរស, ៦វិញ្ញាសាសម្រាប់នារី និងវិញ្ញាសាសម្តែងឯកត្តជនមាន២ គឺសម្តែងបុរស និងសម្តែងនារី។ កម្ពុជារំពឹងទទួលបានមេដាយមាសច្រើនគ្រឿង៕