គ្រូបង្វឹក​វ័យ​ក្មេង​៥​រូប​កំពុង​ដឹក​នាំ​ក្លិប​ធំ​ៗ​នៅអឺរ៉ុប

ក្នុងពិភពបាល់ទាត់ដើម្បីក្លាយជាគ្រូបង្វឹកអាជីពគឺត្រូវតែឆ្លងកាត់វគ្គបណ្ដុះបណ្ដាល​ត្រឹម​ត្រូវ​ និងទាមទារបទពិសោធ​ច្រើន​ទើប​ទទួល​បាន​ឱកាស​ដឹក​នាំ​ក្លិប​​​លីគ​កំពូល​បាន។ ខាង​ក្រោម​ ជា​គ្រូ​បង្វឹក​វ័យ​ក្មេងទាំង៥រូបដែល​កំពុង​ដឹកនាំក្លិបបាល់ទាត់​ធំ​ៗ​នៅអឺរ៉ុប។

១. លោក Mikel Arteta

លោក Mikel Arteta វ័យ ៤១ ឆ្នាំសញ្ជាតិ អេស្ប៉ាញ បានចូលដឹកនាំក្លិប Arsenal កាលពីឆ្នាំ ២០១៩ ហើយជួយឲ្យក្លិបឈ្នះ​ពានរង្វាន់ FA Cup និង Community Shield ។ លោកចាប់ផ្ដើមការងារដំបូងជាជំនួយ​ការ​របស់លោក Pep Guardiola គ្រូបង្វឹកក្លិប Manchester City។

២. លោក Julian Nagelsmann

លោក Julian Nagelsmann វ័យ ៣៥ ឆ្នាំសញ្ជាតិ អាឡឺម៉ង់ បានជាប់ឈ្មោះ​ជាគ្រូបង្វឹកវ័យក្មេងក្នុងប្រវត្តិសាស្រ្ដក្របខ័ណ្ឌបាល់ទាត់ Bundesliga ដោយដឹកនាំក្លិប Hoffenheim ត្រឹមវ័យ ២៨ ឆ្នាំ។ លោកក៏បានបន្ត​អាជីពជាគ្រូបង្វឹក​សម្រាប់​ការ​ដឹកនាំក្លិប RB Leipzig និងក្លិប Bayern Munich។

៣. លោក Rúben Amorim

លោក Rúben Amorim វ័យ ៣៨ ឆ្នាំសញ្ជាតិ ព័រទុយហ្គាល់ ជាគ្រូបង្វឹកក្លិប Sporting Lisbon នៅប្រទេសព័រទុយហ្គាល់។ កាលពីឆ្នាំ ២០១៩ លោក Rúben Amorim បានដឹកនាំក្លិប SC Braga ប៉ុន្ដែរឿងដែលធ្វើឲ្យអ្នកគាំទ្របាល់ទាត់ភា្ញក់ផ្អើលគឺលោកបានទម្លាក់ក្លិប Arsenal ក្នុងពានរង្វាន់ UEFA Europa League។

៤. លោក Matthias Jaissle

លោក Matthias Jaissle វ័យ ៣៥ ឆ្នាំសញ្ជាតិ អាឡឺម៉ង់ ជាគ្រូបង្វឹករបស់ក្លិប FC Red Bull Salzburg របស់ប្រទេស អូទ្រីស។ លោកបានបញ្ចប់អាជីពជាកីឡាករ​បាល់​ទាត់ទាំងវ័យក្មេងដោយសារបញ្ហារបួសជង្គង់។

៥. លោក William Still 

លោក William Still  វ័យ ៣០ ឆ្នាំសញ្ជាតិ បែលហ្ស៊ិក ជាគ្រូបង្វឹកក្លិប Stade de Reims (Reims) នៅក្របខ័ណ្ឌ Ligue1 ប្រទេសបារាំង។ លោកជាគ្រូបង្វឹក​វ័យ​ក្មេងបំផុតក្នុងលីគកំពូលអឺរ៉ុប។ អ្នកចាត់​ការ​វ័យក្មេងរូបនេះបានដឹកនាំក្លិប Reims ១៧ប្រកួតដោយមិនស្គាល់ពាក្យថាចាញ់៕

ប្រែ​សម្រួល៖ ផា រតនា