Haaland ឈ្នះពានកីឡាករឆ្នើមប្រចាំអឺរ៉ុប ក្រោយសំឡេងគាំទ្រច្រើនជាង Messi

ខ្សែប្រយុទ្ធក្លិប Manchester City កីឡាករ Erling Haaland ឈ្នះពានរង្វាន់កីឡាករឆ្នើមប្រចាំទ្វីបអឺរ៉ុបជាលើកដំបូងក្នុងអាជីព ត្រឹមវ័យ ២៣ឆ្នាំ ក្រោយជួយក្លិបឈ្នះពានរង្វាន់ ៣កាលពីរដូវកាលមុន។

សមិទ្ធផលរបស់កីឡាករ Haaland បានកើតមានជាបន្តបន្ទាប់ ក្រោយ​ពេល​រូប​គេ​​បាន​ចូលរួមជាមួយក្លិប Manchester City កាលពីឆ្នាំ ២០២២។ រូប​គេ​ទទួលបានការបោះឆ្នោតគាំទ្រច្រើនបំផុត​រហូត​​៣៥២ពិន្ទុ តាមពីក្រោយ ដោយកីឡាករ Lionel Messi មាន ២២៧ពិន្ទុ និងមិត្តរួមក្រុមកីឡាករ Kevin De Bruyne មាន ២២៥ពិន្ទុ។

មូលហេតុដែលនាំឲ្យកីឡាករ Haaland ទទួលបានពិន្ទុច្រើនជាងគេដោយរូបគេជួយឲ្យក្លិប Manchester City ឈ្នះពាន៣កាលពីរដូវកាលមុន ក្នុងនោះមានពានរង្វាន់ UEFA Champion League, Premier League, និង FA Cup។ រូប​គេ​ក៏បានឈ្នះពានរង្វាន់កីឡាករឆ្នើមរបស់ក្លិបមេឃខៀវ Manchester City ប្រចាំរដូវកាលឆ្នាំ ២០២២-២០២៣ ផងដែរ។

មុនបើករដូវកាលថ្មី កីឡាករ Haaland ជួយឲ្យក្លិប Manchester City ឈ្នះពានរង្វាន់ UEFA Super Cup ដោយយកឈ្នះក្លិប Sevilla របស់អេស្ប៉ាញ ក្នុងវគ្គទាត់បាល់ពិន័យ ១១ម៉ែត្រ ដោយលទ្ធផល ៥-៤ ក្រោយស្មើគ្នា ១-១។

Haaland បានផ្លាស់ទៅ​ក្លិប Manchester City ក្នុងតម្លៃ ៦០លានអឺរ៉ូ កាលពីឆ្នាំ ២០២២ ដែល​បាន​ក្លាយជា​ម៉ាស៊ីនរកគ្រាប់បាល់ ខណៈ​ពេល​នេះ​ស៊ុតបញ្ចូលទីបាន៥២គ្រាប់ក្នុងការបង្ហាញខ្លួន ៥៣លើក។

Haaland ក៏ជាម្ចាស់ស្បែកជើងមាស ក្នុងក្របខណ្ឌ UEFA Champion League និងក្របខណ្ឌ Premier League ដោយស៊ុតបញ្ចូលទីបាន ១២គ្រាប់ក្នុងក្របខណ្ឌ UEFA Champion League និង ៣៦គ្រាប់ នៅ Premier League។

ជាមួយគ្នានោះលោក Pep Guardiola គ្រូបង្វឹកក្លិប Manchester City ក៏ឈ្នះពានគ្រូបង្វឹកឆ្នើមប្រចាំឆ្នាំផងដែរ៕

អត្ថបទ៖ ផា រតនា