កីឡា

កម្ពុជាបង្កើតសហព័ន្ធកីឡាបញ្ចស៊ីឡាត់ផ្លូវការក្រោយជោគជ័យនៅស៊ីហ្គេម

បានផុស

២ years មុន

នៅ

ថ្ងៃចន្ទ ១៩ កុម្ភៈ ២០២៤

ដោយ

សហព័ន្ធកីឡាបញ្ចស៊ីឡាត់កម្ពុជាត្រូវបានប្រកាសបង្កើតជាផ្លូវការសម្រាប់អាណត្តិទី១ ឆ្នាំ២០២៤-២០២៨ បន្ទាប់ពីទទួលបានជោគជ័យក្នុងការប្រកួតកីឡាស៊ីហ្គេម លើកទី៣២ ឆ្នាំ២០២៣ ទាំងដែលមិនទាន់មានសហព័ន្ធផ្លូវការ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបង្កើតឲ្យមានសហព័ន្ធកីឡាបញ្ចស៊ីឡាត់ជាផ្លូវការនេះឡើង បន្ទាប់ពីប្រមុខថ្នាក់ដឹកនាំកម្ពុជាបានជួបភាគីឥណ្ឌូណេស៊ីដែលជាម្ចាស់ក្បាច់គុនប្រពៃណីឥណ្ឌូណេស៊ីគឺបញ្ចស៊ីឡាត់កាលពីចុងឆ្នាំ២០២២។ នៅពេលនោះ សហព័ន្ធកីឡាល្បុក្កតោកម្ពុជាបានបញ្ជូនកីឡាករ កីឡាការិនីចំនួន២៨រូបទៅបង្ហាត់បង្រៀនក្បាច់គុនល្បុក្កតោ និងបានហ្វឹកហាត់ក្បាច់គុនបញ្ចស៊ីឡាត់នៅប្រទេសឥណ្ឌូណេស៊ីដើម្បីត្រៀមប្រកួតកីឡាស៊ីហ្គេមលើកទី៣២ នៅប្រទេសកម្ពុជា។

ការហ្វឹកហាត់អស់រយៈពេលជាច្រើនខែ កម្ពុជាមានអត្តពលិកបញ្ចស៊ីឡាត់ ហើយឥណ្ឌូណេស៊ីមានអត្តពលិកល្បុក្កតោសម្រាប់ប្រកួតកីឡាស៊ីហ្គេម។ ជាលទ្ធផល កម្ពុជាទទួលបានមេដាយចំនួន១២គ្រឿងគឺមាស២ និងសំរិទ្ធ១០ពីការប្រកួតកីឡាបញ្ចស៊ីឡាត់ក្នុងកីឡាស៊ីហ្គេម។

ដោយមើលឃើញពីសមិទ្ធផល និងសក្តានុពលដែលកម្ពុជាមានសមត្ថភាពសម្រាប់ការប្រកួតលើឆាកអន្តរជាតិ ពេលនេះកម្ពុជាបានបង្កើតសហព័ន្ធកីឡាបញ្ចស៊ីឡាត់ជាផ្លូវការដើម្បីអភិវឌ្ឍ បណ្តុះបណ្តាល និងជំរុញកីឡានេះឲ្យរីកចម្រើនកាន់តែខ្លាំងឡើងនៅក្នុងប្រទេសកម្ពុជា។ ជាពិសេសសម្រាប់ការប្រកួតលើឆាកអន្តរជាតិដូចជាកីឡាស៊ីហ្គេម ឆ្នាំ២០២៥នៅប្រទេសថៃ។

ក្នុងមហាសន្និបាតកាលពីរសៀលថ្ងៃអាទិត្យ ទី១៨ ខែកុម្ភៈ ឆ្នាំ២០២៤ លោក ណយ ផាណា អគ្គលេខាធិការរងនៃគណៈកម្មាធិការជាតិអូឡាំពិកកម្ពុជា (NOCC) បានអបអរចំពោះការបង្កើតឲ្យមានសហព័ន្ធកីឡាបញ្ចស៊ីឡាត់ជាផ្លូវការ ពីព្រោះកីឡាមួយនេះមានសក្តានុពលសម្រាប់ការរស្វែងរកមេដាយលើឆាកអន្តរជាតិ។ ជាពិសេសកីឡានេះទទួលបានមេដាយជូនជាតិពីកីឡាស៊ីហ្គេមកាលពីឆ្នាំ២០២៣រួចទៅហើយ បើទោះបីជាមិនទាន់មានសហព័ន្ធជាផ្លូវការក៏ដោយ។

លោក សេង ធារិន មេបញ្ជាការរងយោធភូមិភាគពិសេសទី៥ដែលជាប្រធានសហព័ន្ធអាណត្តិថ្មីបានឲ្យដឹងថា ថ្នាក់ដឹកនាំដែលជាប្រធាន និងអនុប្រធានសុទ្ធតែមកពីកងកម្លាំងយោធា ដូច្នេះបានក្លាយជាធនធានដ៏សំខាន់ ពីព្រោះកងកម្លាំងយោធាសុទ្ធតែជាអ្នកហ្វឹកហាត់កីឡាល្បុក្កតោ និងបានរួមចំណែកសម្តែងក្នុងព្រឹត្តិការណ៍ធំៗជាច្រើនដូចជាកីឡាជាតិ កីឡាស៊ីហ្គេម និងព្រឹត្តិការណ៍អង្គរសង្គ្រាន្តជាដើម។ កងកម្លាំងយោធាទាំងនោះនឹងក្លាយជាកីឡាករ កីឡាការិនីអាជីព នៅពេលបានហ្វឹកហាត់បន្ថែមទៀតលើកីឡាបញ្ចស៊ីឡាត់។

លោកប្រធានមានប្រសាសន៍ថា ៖«បើយើងធ្វើ យើងទទួលភារកិច្ច យើងត្រូវតែធ្វើឲ្យទទួលបានជោគជ័យ»។

គណៈកម្មការប្រតិបត្តិអាណត្តិទី១សម្រាប់ការដឹកនាំសហព័ន្ធកីឡាបញ្ចស៊ីឡាត់កម្ពុជាពីឆ្នាំ២០២៤ដល់២០២៨មានប្រធាន១រូប អនុប្រធាន៨រូប អគ្គលេខាធិការ១រូប អគ្គលេខាធិការរង២រូប អគ្គហិរញ្ញិក១រូប និងសមាជិក១៤រូប។