កីឡា

គូល្អមិនគួររំលង បឹងកេត ប៉ះ ព្រះខ័នរាជស្វាយរៀង ថ្ងៃសៅរ៍នេះ

បានផុស

២ years មុន

នៅ

ថ្ងៃសុក្រ ១៩ មេសា ២០២៤

ដោយ

បឹងកេត នឹងបើកទ្វារពហុកីឡដ្ឋានជាតិអូឡាំពិក ទទួលភ្ញៀវល្អ ព្រះខ័នរាជស្វាយរៀង វេលាម៉ោង៦ល្ងាច ថ្ងៃសៅរ៍ ទី២០ ខែមេសា ឆ្នាំ២០២៤ សម្រាប់ការប្រកួតសប្តាហ៍ចុងក្រោយ (ទី២៧) ជុំទី៣ ខេមបូឌានព្រីមៀរលីគរដូវកាលនេះ។

ឆ្លងកាត់២៦ប្រកួត ព្រះខ័នរាជស្វាយរៀង រកបាន៦៨ពិន្ទុ ពីការឈ្នះ២២ប្រកួត ស្មើ២ប្រកួត និងចាញ់២ប្រកួត។ ចំណែកបឹងកេត រកបាន៤០ពិន្ទុ ពីការឈ្នះ១១លើក ស្មើ៧លើក និងចាញ់៨លើក។ និយាយពី ព្រះខ័នរាជស្វាយរៀងរក្សាកំណត់ត្រាជ័យជម្នះទាំង៩ប្រកួតក្នុងជុំទី១ ប៉ុន្តែនៅជុំទី២ ពួកគេបានចាញ់២ប្រកួត ស្មើ២ប្រកួត និងឈ្នះ៥ប្រកួត។

ឈានចូលជុំទី៣ ព្រះខ័នរាជស្វាយរៀង កំពុងធ្វើដំណើរបានយ៉ាងល្អឥតខ្ចោះទៀតដោយមិនទាន់ស្គាល់បរាជ័យឡើយ។ ៨ប្រកួតកន្លងទៅ ពួកគេឈ្នះទាំងអស់ ហើយត្រូវបញ្ចប់សប្តាហ៍ចុងក្រោយជាមួយ បឹងកេត មុនពេលបន្តភារកិច្ចនៅជុំទី៤ (Top 4)។ បើព្រះខ័នរាជស្វាយរៀងទទួលបានជ័យជម្នះគឺបង្កើតកំណត់ត្រាជុំទី៣ដោយមិនស្គាល់បរាជ័យសោះ។

ទោះបីជាយ៉ាងណា ម្ចាស់ផ្ទះបឹងកេតអាចនឹងបង្កគ្រោះថ្នាក់ខ្លាំងដល់ភ្ញៀវ បន្ទាប់ពីពួកគេបានយកឈ្នះ ១-២ ក្នុងពានរង្វាន់សម្តេចតេជោ ហ៊ុន សែន វគ្គពាក់កណ្តាលផ្តាច់ព្រ័ត្រនៅកីឡដ្ឋានខេត្តស្វាយរៀង។ ការប្រកួតក្នុងពានរង្វាន់សម្តេចតេជោនេះ បឹងកេត ធ្វើបានល្អខ្លាំងមែនទែនដោយបានកាត់ផ្តាច់ចង្វាក់ប្រយុទ្ធកណ្តាល បម្រើឆ្វេងស្តាំរបស់ព្រះខ័នរាជស្វាយរៀង ហើយរកបាន២គ្រាប់មុន ប៉ុន្តែម្ចាស់ផ្ទះរកបាន១គ្រាប់ចុងក្រោយម៉ោងដើម្បីបានឡើងទៅកាន់វគ្គផ្តាច់ព្រ័ត្រដោយសរុបគ្រាប់បាល់ពីរជើង ៤-៣។

ប្រវត្តិជួបគ្នា១១លើកក្នុងលីគកំពូលកម្ពុជាគិតចាប់តាំងពីឆ្នាំ២០២០មក ព្រះខ័នរាជស្វាយរៀង ឈ្នះ៤លើក បឹងកេត ឈ្នះ៣លើក និងស្មើគ្នា៤លើក។

ព្រះខ័នរាជស្វាយរៀង (៦៨ពិន្ទុ) ត្រូវការតែ៦ពិន្ទុទៀតប៉ុណ្ណោះដើម្បីក្លាយជាជើងឯកក្នុងរដូវកាលនេះ បន្ទាប់ពីនាំមុខ៧ពិន្ទុ លើគូប្រជែងចំណាត់ថ្នាក់លេខ២ ភ្នំពេញក្រោន (៦១ពិន្ទុ) ខណៈការប្រកួតគិតទាំងថ្ងៃអាទិត្យនេះគឺនៅសល់៤ប្រកួតទៀតប៉ុណ្ណោះ។