កីឡា

ក្រុមបាល់ទះជប៉ុន ប៉ះ អាមេរិក ប្រជែងកំពូលតារាង នៅកីឡាអូឡាំពិក

បានផុស

៨ ខែ មុន

នៅ

ថ្ងៃព្រហស្បតិ៍ ១ សីហា ២០២៤

ដោយ

ការប៉ះគ្នារវាងក្រុមបាល់ទះជប៉ុន និងសហរដ្ឋអាមេរិក វគ្គសន្សំពិន្ទុក្នុងពូល ថ្ងៃសុក្រ ទី២ ខែសីហា ឆ្នាំ២០២៤ គឺជាជំនួបដ៏តានតឹងបំផុតក្នុងព្រឹត្តិការណ៍កីឡាអូឡាំពិក នៅប្រទេសបារាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជប៉ុនត្រូវបានគេរំពឹងនឹងទទួលបានជ័យជម្នះទាំងអស់សម្រាប់ការប្រកួតសន្សំពិន្ទុក្នុងពូល C ក្នុងព្រឹត្តិការណ៍អូឡាំពិក ដោយសារក្រុមក្នុងពូលជាមួយគ្នាសុទ្ធតែធ្លាប់ចាញ់ជប៉ុនកាលប្រកួតពានរង្វាន់ពិភពលោក Nations League កាលពីខែមិថុនាកន្លងទៅ។

ទោះបីជាយ៉ាងណា បើកឆាកក្នុងពូល ពួកគេធ្វើមិនបានល្អដោយចាញ់អាល្លឺម៉ង់ ២-៣ ប៉ុន្តែការប្រកួតសន្សំពិន្ទុលើកទី២ ក្រុមខ្លាំងអាស៊ីមួយនេះបានយកឈ្នះ អាហ្សង់ទីន ៣-១ ដែលរុញច្រានពួកគេឲ្យឡើងទៅឈរចំណាត់ថ្នាក់លេខ២ ខណៈសហរដ្ឋអាមេរិក ឈរលេខ១ បានកក់កៅអីវគ្គ៨ក្រុមចុងក្រោយហើយ បន្ទាប់ពីឈ្នះ អាហ្សង់ទីន ៣-០ និងឈ្នះ អាល្លឺម៉ង់ ៣-២។

ក្រុមបាល់ទះអាមេរិកពិតជាធ្វើល្អមែនទែនក្នុងព្រឹត្តិការណ៍អូឡាំពិកនេះ បើប្រៀបធៀបនឹងការប្រកួតជើងឯកពិភពលោក Nations League ដែលពេលនោះពួកគេបានចាញ់ ជប៉ុន ដោយលទ្ធផល 0-៣។ ដូច្នេះការជួបគ្នាថ្ងៃទី២ ខែសីហា រវាង អាមេរិក និង ជប៉ុន គឺពិតជាគួរឲ្យចាប់អារម្មណ៍បំផុត។

ជប៉ុន ត្រូវរក្សាកំណត់ត្រាជ័យជម្នះរបស់ខ្លួនលើអាមេរិក និងដើម្បីយកចំណាត់ថ្នាក់លេខ១ក្នុងពូល C។ ផ្ទុយទៅវិញ អាមេរិក ត្រូវការសងសឹកជប៉ុន បន្ទាប់ពីពួកគេបានចាញ់កាលពីខែមិថុនា ហើយពួកគេក៏ចង់រក្សាកំណត់ត្រាជ័យជម្នះ៣លើកជាប់គ្នានៅវគ្គសន្សំពិន្ទុក្នុងពូល ដើម្បីឈរចំណាត់ថ្នាក់លេខ១។

វិញ្ញាសាបាល់ទះក្នុងសាលនៅកីឡាអូឡាំពិក ឆ្នាំ២០២៤ ពេលនេះរកឃើញក្រុម៥ហើយបានឡើងវគ្គ៨ក្រុមចុងក្រោយគឺ ស្លូវេនី និង បារាំង នៅពូល A, អ៉ីតាលី និង ប៉ូឡូញ នៅពូល B និង សហរដ្ឋអាមេរិក នៅពូល C៕