ការវាយប្រហារនៅកាស្មៀរធ្វើឲ្យទំនាក់ទំនងឥណ្ឌា-ប៉ាគីស្ថានកាន់តែ​​ធ្លាក់​ដុន​ដាបខ្លាំង​​

នាយករដ្ឋមន្ត្រីឥណ្ឌា លោក Narendra Modi បានប្រកាសពន្យាពេលលើសន្ធិសញ្ញារំហូរផ្លូវទឹកទន្លេ (Indus Water Treaties) ជាមួយ​រដ្ឋាភិបាល​ប៉ាគីស្ថានកាលពីថ្ងៃទី២៤ ខែមេសា ឆ្នាំ២០២៥ ដោយហេតុផលការវាយប្រហារភេរកម្មនៅ Pahalgam តំបន់​កាស្មៀរ ដែលជាដែនដីគ្រប់គ្រងដោយឥណ្ឌា។ នេះបើយោងតាមការចេញផ្សាយរបស់សារព័ត៌មាន ​CNA នៅថ្ងៃទី២៥ខែមេសានេះ។

ក្រោយការវាយប្រហារកាលពីថ្ងៃទី២៣ដែលបានសម្លាប់អ្នកទេសចរ២៦នាក់នៅកាស្មៀរ ប្រទេសឥណ្ឌា និងប៉ាគីស្ថានបានផ្លាស់ប្តូរវិធានការការទូតជាបន្តបន្ទាប់រួមទាំងការប្រកាសរបស់​នាយករដ្ឋមន្ត្រីឥណ្ឌា លោក Narendra Modi ​អំពី​ការ​ពន្យាពេលលើសន្ធិសញ្ញារំហូរផ្លូវទឹកទន្លេ (Indus Water Treaties) ជាមួយប្រទេស​ប៉ាគីស្ថាន។

ក្រៅពីនេះក៏មាន ការ​ប្រកាសបិទច្រកព្រំដែនដីគោកជាមួយប៉ាគីស្ថាន ទម្លាក់កម្រិតទំនាក់ទំនងការទូត និងដកទិដ្ឋាការសម្រាប់ប៉ាគីស្ថានតាំងពីយប់ថ្ងៃពុធ។

លោក Modi ​ប្តេជ្ញា​តាម​ចាប់​អ្នក​វាយប្រហារ​នៅ​តំបន់​កាស្មៀរ​ដែលបានបាញ់សម្លាប់អ្នកទេសចរយ៉ាងសាហាវទាំងនោះដល់​ជើងមេឃ និងចោទប្រកាន់ប៉ាគីស្ថានថាគាំទ្រការវាយប្រហារឆ្លងដែនទៀតផង។

ជាការឆ្លើយតបនឹងការចោទប្រកាន់ និងវិធានការរបស់ឥណ្ឌា កាលពីថ្ងៃព្រហស្បតិ៍ នាយករដ្ឋមន្ត្រីប៉ាគីស្ថានលោក Shehbaz Sharif បានធ្វើការកោះប្រជុំដ៏កម្រជាមួយគណៈកម្មាធិការសន្តិសុខជាតិ (NSC) ជាមួយមន្ត្រីយោធាកំពូល រួមទាំងអគ្គសេនាធិការកងទ័ពដ៏មានឥទ្ធិពល Asim Munir នៅរដ្ឋធានី Islamabad ។

សេចក្តីថ្លែងការណ៍ដែលចេញផ្សាយដោយការិយាល័យរបស់លោក Sharif បាននិយាយបន្ទាប់ពីកិច្ចប្រជុំ NSC ថា «ការគំរាមកំហែងណាមួយចំពោះអធិបតេយ្យភាពរបស់ប្រទេសប៉ាគីស្ថាន និងដល់សន្តិសុខរបស់ប្រជាជនខ្លួន នឹងត្រូវបានឆ្លើយតបជាមួយនឹងវិធានការទៅវិញទៅមកយ៉ាងរឹងមាំនៅក្នុងគ្រប់វិស័យ» ។

ប៉ាគីស្ថានក៏បានព្រមានផងដែរថា ខ្លួននឹងចាត់ទុកការប៉ុនប៉ងណាមួយរបស់ឥណ្ឌាក្នុងការបញ្ឈប់ការផ្គត់ផ្គង់ទឹកពីទន្លេ Indus ជា «ទង្វើបង្កសង្គ្រាម»។

លើសពីនេះប៉ាគីស្ថានបានចេញវិធានការភ្លាមៗ​ រួមមានការបណ្តេញអ្នកការទូតឥណ្ឌា និងការលុបចោលទិដ្ឋាការសម្រាប់ជនជាតិឥណ្ឌា លើកលែងតែអ្នកធម្មយាត្រា Sikh។ ច្រកព្រំដែន Attari-Wagah សំខាន់នៅ Punjab នឹងបិទទាំងសងខាង ដោយពលរដ្ឋប៉ាគីស្ថានក៏បានចាប់ផ្តើមចាកចេញបណ្ដើរៗហើយ។

សូមបញ្ជាក់ជាងថ្មីថាកាលពីថ្ងៃពុធទី២៣ខែមេសាឆ្នាំ២០២៥ ខ្មាន់កាំភ្លើងបានបើកការវាយឆ្មក់ បាញ់ប្រហារយ៉ាងរន្ធត់ទៅលើទេសចរដែលនាំគ្នាទៅលេងក្រុង Pahalgam នៃតំបន់កាស្មៀរខាងគ្រប់គ្រងដោយប្រទេសឥណ្ឌា បណ្តាលឲ្យស្លាប់ចំនួន២៦នាក់។

ដ្បិតមិនទាន់មានក្រុមណាចេញមុខអះអាងទទួលខុសត្រូវ ប៉ុន្តែប៉ូលិសឥណ្ឌាហ៊ានអះអាថា ខ្មាន់កាំភ្លើងមានគ្នា៣នាក់ ជាសមាជិកនៃក្រុមសកម្មប្រយុទ្ធ Lashkar-e-Taiba (LeT) ដែលមានមូលដ្ឋាននៅប្រទេសប៉ាគីស្ថាន។

គួរបញ្ជាក់ថាពួកក្រុមឧទ្ទាមបានធ្វើសកម្មភាពបះបោរនៅតំបន់កាស្មៀរដែលគ្រប់គ្រងដោយឥណ្ឌាចាប់តាំងពីឆ្នាំ១៩៨៩ មកម្លេះដោយទាមទារឯករាជ្យ ឬការរួមបញ្ចូលគ្នាជាមួយប៉ាគីស្ថាន។

កាលពីឆ្នាំ២០១៩ ក៏មានការវាយប្រហារសម្លាប់ទាហានឥណ្ឌាចំនួន ៤១ នាក់នៅតំបន់កាស្មៀរ និងបានបង្កឱ្យមានការវាយប្រហារតាមអាកាសរបស់ឥណ្ឌានៅខាងក្នុងប៉ាគីស្ថាន៕

សូមបញ្ជាក់ថា