វ័យកៀក៦០ឆ្នាំ​ទៅ​ហើយ​ តារាហុងកុង​ លោក Aaron ​នៅតែខ្លាំង​ ហក់​លោត​រង្គើឆាក ដូច​យុវវ័យ​

តារាសម្តែង​និង​តារាចម្រៀង​ជើង​ចាស់​របស់​ហុងកុង លោក​ Aaron Kwok បានក្លាយជាប្រធានបទជជែកវែកញែកអំពី​កាយសម្បទា​ដ៏រឹងមាំ​ប្រកប​ដោយ​​សុខភាពល្អ និងសាច់ដុំកង់ៗដូចបុរសអាយុ២០ស្ដើង បើទោះបីជាលោកមានវ័យកៀក៦០ឆ្នាំក្ដី។ នៅលើបណ្ដាញសង្គម​ដ៏ពេញ​និយមចិន «Weibo» វីដេអូរបស់តារាប្រុសជើង​ចាស់​​រូប​នេះ​ដែល​បានចូលរួមក្នុងព្រឹត្តិការណ៍មួយ ត្រូវបានចែករំលែកដោយអ្នកទស្សនារាប់ម៉ឺននាក់ កាលពីថ្ងៃទី២៣ខែមេសាកន្លងទៅនេះ។

តាមរយៈវីដេអូដែលអ្នកគាំទ្របាន​បង្ហោះ​នូវទិដ្ធភាព​តារា​ចម្រៀងហុងកុងកំពុងរាំទន្ទ្រាំជើង​លើឆាក​តន្ត្រី និង​ដោះអាវ ​ក្នុង​កម្មវិធី​ផ្សាយ​ផ្ទាល់មួយ ដោយ​បង្ហាញ​សាច់​ដុំ​កង់ៗ និងបង្ហាញឲ្យឃើញនូវមាឌធំក្រអាញមានថាមពលខ្លាំងក្លា នៅចំពោះមុខមហាជនរាប់រយអ្នក។ អ្វីដែលសំខាន់នោះ សូម្បីតែ​គេហទំព័រ U Lifestyle ក៏បានចូលទៅបញ្ចេញមតិថា តួ​ហុងកុង​រូបនេះនៅតែផ្ទុះការចាប់អារម្មណ៍ និងមានភាពទាក់ទាញនៅលើឆាក ពេលសម្តែងក្បាច់រាំដ៏ប៉ិនប្រសប់​។

ការបោះពុម្ភផ្សាយបានសន្មតថា គាត់រក្សាកាយសម្បទា​ឱ្យ​នៅ​រឹងមាំ ជាពិសេស​មាន​សាច់​ដុំ​កង់ៗ ដូចមនុស្សវ័យក្មេង តាមរយៈរបបអាហារដែលមានវិន័យ និងលំហាត់ប្រាណជាទៀងទាត់ ដែលបានរក្សាអស់រយៈពេលជាច្រើនទសវត្សរ៍មកហើយ។

ដោយឡែក យោងទៅតាម​គេ​ហទំព័រ​​នៃ​ទស្សនាវដ្តី​បែបកម្សាន្ត​ដ៏ល្បី​របស់​ប្រទេសបារាំង​ ​​Marie Claire ធ្លាប់បានចេញផ្សាយដែរថា អស់រយៈពេល៣០ ឆ្នាំមកហើយ លោក​ Aaron Kwok បានរក្សាទម្ងន់ថេរ ក្រោម៦៥គីឡូក្រាម ស្រប​​នឹង​កម្ពស់ប្រហែល​១មែត្រនិង ៧១សង់ទីម៉ែត្រ។ តារា​រូប​នេះ​ទទួល​ស្គាល់​ថា​ លោកត្រូវតែរក្សាស្តង់ដារ​ខ្ពស់​សម្រាប់​ខ្លួន​ឯង ហើយក៏មិន​អនុញ្ញាត​ឲ្យ​ខ្លួន​ឯង​លើស​ពីសមាមាត្រដែលគ្រោងទុកដាច់​ខាត​។

​លោក​ ធ្លាប់​​បាន​និយាយ​ថា «ខ្ញុំ​ត្រូវ​ច្រៀង និង​រាំ ហើយ​ខ្ញុំ​ត្រូវ​រក្សា​រាង​កាយ​ឲ្យ​បាន​ល្អ​ដើម្បី​សម្ដែង​រាប់​ម៉ោង​ជាប់ៗ​គ្នា»។ សូម្បីតែ តារាសម្តែង Tony Leung Ka-hwi ក៏ធ្លាប់បង្ហើបថា ពេលធ្វើការជាមួយ Aaron Kwok ក្នុងភាពយន្ត «Cold War» ឆ្នាំ ២០១២ វេលាម៉ោង៤ទៀបភ្លឺ គាត់បានឮតារាប្រុសរត់នៅលើម៉ាស៊ីនហាត់ប្រាណក្នុងបន្ទប់ជាប់គ្នា។ រាល់​សប្តាហ៍ លោកតែង​ធ្វើ​លំ​ហាត់ប្រាណដល់ទៅ​៥​ដង​ឯណោះ។

ទោះ​បី​ជា​គាត់​មាន​អាយុ​ច្រើន​ក៏​ដោយ តារា​ចម្រៀង​រូប​នេះ​និយាយ​ថា គាត់​នៅ​តែ​មាន​អារម្មណ៍​ថា​ខ្លួន​មាន​អាយុ​ខ្ទង់៤០ ពេល​​សម្តែងម្ដងៗ។ ក្នុងរយៈពេលប៉ុន្មានឆ្នាំចុងក្រោយនេះ គាត់បានចាប់យកការសរសេរអក្សរផ្ចង់ និងការគូរគំនូរ ដែលជាការស្វែងរកដែលគាត់និយាយថា បានពង្រីកទស្សនៈថ្មីៗ។ ជាពិសេស គាត់ជឿជាក់លើការកែលម្អខ្លួនឯងឥតឈប់ឈរ គ្មានដែនកំណត់លើការរៀនសូត្រ និងការរីកចម្រើននោះទេ។

លើសពីនេះ លោកក៏​បាន​ឆ្លៀត​បន្ថែមទៀត​ថា គ្រួសារ​​នាំ​មក​នូវ​អារម្មណ៍​ដ៏​ជ្រាលជ្រៅ​នៃ​ការ​បំពេញ​ចិត្ត​របស់​គាត់ ព្រោះ​ការ​ធ្វើ​ជា​ស្វាមី និង​ជា​ឪពុកដែល​ផ្តល់​នូវភាព​កក់ក្តៅ ភាព​រីករាយ និង​ស្ថិរភាព។

លោក Aaron Kwok បានចាប់​ផ្ដើម​អាជីព​សិល្បៈ​ជា​អ្នក​រាំ មុន​នឹង​សាង​កេរ្តិ៍ឈ្មោះ​ជា​តារា​ចម្រៀង និង​សម្ដែង។ លោកក៏មាន​រហ័សនាម​​ទេវបុត្ត​ម្នាក់​ក្នុង​ចំណោម​បួននៃទីក្រុងហុងកុង (Four Heavenly Kings) ដែលរួមជាមួយ លោក Andy Lau, លោក Jacky Cheung និង លោក Leon Lai ហើយត្រូវបានគេដាក់រហ័សនាមថា ស្តេចនៃរបាំ ដោយសារតែគាត់មានជំនាញរាំ ដោយអាចរាំបានច្រើនប្រភេទ​ក្បាច់រាំង​​ក្នុងសម័យ​កាល​ផ្សេងៗគ្នា ដូចជា សម័យទំនើប, ជនជាតិភាគតិច, ចង្វាក់ jazz និង Popping។

នៅក្នុងឧស្សាហកម្មភាពយន្ត លោកបានបន្សល់ទុកនូវភាពល្បីល្បាញជាមួយនឹងខ្សែភាពយន្តដូចជា៖ «Lee Rock II, Wind and Cloud 2, Cold Wa​r និង The Monkey King 2»។ នៅឆ្នាំ ២០២១ កាសែត South China Morning Post បានប៉ាន់ប្រមាណទ្រព្យសម្បត្តិរបស់គាត់ប្រហែល ២០លានដុល្លារ៕

អត្ថបទ៖ សាង ស្រីល័ក្ខ

ចុចអាន៖តួឯកស្រីក្នុង​រឿង «ក្រមុំឡិកឡក់កំលោះទុយ​មុយ​»​ នៅតែរក្សាមុខក្មេង ទោះបី​កន្លង​១៩ឆ្នាំ