ព័ត៌មានអន្ដរជាតិ

ក្រោយបញ្ចប់ទស្សនកិច្ចនៅកម្ពុជា២ថ្ងៃ នាយករដ្ឋមន្ត្រីថៃ ផែថងថាន ចូលសម្រាកពេទ្យ

បានផុស

១ ខែ មុន

នៅ

ថ្ងៃសុក្រ ២៥ មេសា ២០២៥

ដោយ

ក្រោយការវិលត្រឡប់ទៅដល់ប្រទេសវិញ និងការធ្វើសន្និសីទសារព័ត៌មានអំពីលទ្ធផលនៃទស្សនកិច្ចពីរថ្ងៃនៅប្រទេសកម្ពុជា២ថ្ងៃដែលខ្លួនប្រកាសថា «ជោគជ័យ» នោះ នាយករដ្ឋមន្ត្រីថៃ លោកស្រី ផែថងថាន ស៊ីណាវ៉ាត្រ បានចូលសំរាកនៅមន្ទីរពេទ្យ ដោយសារតែកម្តៅក្នុងខ្លួនបានកើនឡើង។ នេះយោងការចេញផ្សាយរបស់សារព័ត៌មានថៃ Khaosod English។

នាយករដ្ឋមន្ត្រីថៃ ផែថងថាន ស៊ីណាវ៉ាត្រ ចូលសម្រាកពេទ្យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មាននោះ បានដកស្រង់សម្តីអ្នកនាំពាក្យរដ្ឋាភិបាល លោក Jirayu Houngsub ដែលបាននិយាយនៅព្រឹកថ្ងៃសុក្រថា នាយករដ្ឋមន្ត្រី ផែថងថាន ស៊ីណាវ៉ាត្រ (Paetongtarn Shinawatra) ត្រូវបានបញ្ជូនទៅកាន់មន្ទីរពេទ្យទីក្រុងបាងកកកាលពីយប់ថ្ងៃព្រហស្បតិ៍ បន្ទាប់ពីមានគ្រុនក្តៅខ្លាំងនៅពេលត្រឡប់មកពីទស្សនកិច្ចផ្លូវការនៅកម្ពុជា។

យោងទីភ្នាក់ងារព័ត៌មានរ៉យទ័រ លោកស្រីត្រូវបានគេបញ្ជូនទៅមន្ទីរពេទ្យដើម្បីតាមដាន ហើយនឹងទទួលការធ្វើតេស្តត្រួតពិនិត្យបន្ថែម។

សារព័ត៌មានថៃ បានអះអាងថា ស្វាមីនាយករដ្ឋមន្ត្រីផែថងថាន គឹលោក Pitaka Suksawat បានបង្ហោះសារលើ IG រូបភរិយារបស់គាត់នៅលើគ្រែក្នុងមន្ទីរពេទ្យដោយមានពាក្យថា PM មិនស្តាប់អ្នកណាព្រមាននាងអំពីសុខភាពរបស់នាងឡើយ ប៉ុន្តែរាងកាយរបស់នាងនៅទីបំផុតរំលឹកនាងថា «នាងមិនអាចបន្តទៅមុខទៀតទេ»៕

ដោយ រ៉ាន់ រើយ