កីឡា

Jota តស៊ូជម្នះជំងឺបេះដូង និងខ្វះការលូតលាស់ រហូតជោគជ័យទាំងវ័យក្មេង

បានផុស

១០ ខែ មុន

នៅ

ថ្ងៃសុក្រ ៤ កក្កដា ២០២៥

ដោយ

កាលពីថ្ងៃ ព្រហស្បតិ៍ ទី ៣ ខែ កក្កដា ឆ្នាំ ២០២៥ អ្នកគាំទ្របាល់ទាត់ទូទាំងពិភពលោក បានទទួលដំណឹងដ៏ក្រៀមក្រំ និងយ៉ាងរន្ធត់ពន់ពេក អំពីមរណភាពរបស់ខ្សែប្រយុទ្ធក្រុមហង្សក្រហម Liverpool កីឡាករ Diogo Jota ដោយសារគ្រោះថ្នាក់ចរាចរណ៍នៅប្រទេស អេស្ប៉ាញ។

Jota ដែលមានវ័យ ២៨ ឆ្នាំ ត្រូវបានគេចាត់ទុកជាកីឡាករដ៏ជោគជ័យម្នាក់រួចទៅហើយ ចំពោះការប្រកបអាជីពជាកីឡាករបាល់ទាត់ក្នុងរយៈពេលជាង ១០ ឆ្នាំ។ ជាពិសេសនៅឆ្នាំ ២០២៥ គឺជាពេលដែលរូបគេជោគជ័យបំផុត ទាំងនៅលើវិថីបាល់ទាត់ និងជិវិតឯកជនផ្ទាល់ខ្លួន។

ខ្សែប្រយុទ្ធសញ្ជាតិ ព័រទុយហ្គាល់ រូបនេះទើបតែជួយឱ្យ Liverpool ឈ្នះជើងឯកលីគកំពូល អង់គ្លេស Premier League នៅរដូវកាល ២០២៤-២០២៥។ ចំណែកនៅជម្រើសជាតិ រូបគេទើបតែបានជួយឱ្យក្រុមបញ្ចខែល ព័រទុយហ្គាល់ ឈ្នះពាន UEFA Nations League។ ដោយឡែកជីវិតឯកជនវិញ គឺរូបគេទើបតែបានរៀបការជាមួយភរិយារបស់ខ្លួនកាលពីថ្ងៃទី ២២ ខែ មិថុនា ឆ្នាំ ២០២៥ ជាមួយកូនតូច ៣ នាក់ ។ ប៉ុន្តែចុងក្រោយអ្វីៗបានបញ្ចប់ត្រឹមមួយប៉ព្រិចភ្នែក បន្ទាប់ពីមានសោកសាដកម្មដ៏រន្ធត់ ដោយ Jota បានអស់ជីវិតភ្លាមៗ ដោយសារគ្រោះថ្នាក់ចរាចរណ៍។

យ៉ាងណា បើមើលថយក្រោយបន្ថែមទៀតអំពីជីវិតរបស់ Jota គឺមានការតស៊ូខ្លាំងតាំងពីក្មេង។ Jota ជាក្មេងម្នាក់ ដែលបានធំដឹងក្តីឡើងនៅតំបន់ Massarelos ក្នុងទីក្រុង Porto ប្រទេស ព័រទុយហ្គាល់។ រូបគេជាកូនទី ១ ក្នុងចំណោមបងប្អូនទាំង ៩ នាក់។ អំឡុងពេលចាប់ផ្តើមលេងបាល់ទាត់ដំបូងជាថ្នាលយុវជនរបស់ក្រុម Gondomar រូបគេបានមានបញ្ហាបេះដូង ដែលប៊ិះនឹងធ្វើគាត់ត្រូវបោះបង់អាជីពនេះ។

អំឡុងពេលជាកីឡាករយុវជនរបស់ក្រុម Gondomar និង Pacos Ferreira កីឡាករ Jota ហាក់មានភាពឯកោបន្តិច ដោយសារគេជាមនុស្សម្នាក់ចូលចិត្តស្ងៀមស្ងាត់។ នៅក្នុងក្រុមវិញ រូបគេមិនសូវគ្រូបង្វឹកជ្រើសរើសឱ្យចូលលេងដែរ ដោយសារពេលនោះគេជាក្មេងម្នាក់ ដែលខ្វះការលូតលាស់ផ្នែកកាយសម្បទា។ ទោះបីបែបនេះក្តី Jota គឺមិនបោះបង់ក្តីស្រមៃរបស់ខ្លួននោះទេ ដោយរូបគេបានបន្តដើរនៅលើវិថីនេះ និងប្រឹងប្រែងជំនះរាល់ឧបសគ្គ រហូតទទួលបានជោគជ័យគួរឱ្យកត់សម្គាល់។

គួរបញ្ជាក់ជាថ្មីថា Jota បច្ចុប្បន្នមានវ័យ ២៨ ឆ្នាំ។ រូបគេគឺជាខ្សែប្រយុទ្ធដ៏សំខាន់ម្នាក់របស់ក្រុមជម្រើសជាតិ ព័រទុយហ្គាល់ និង Liverpool។ ការបាត់បង់ខ្សែប្រយុទ្ធរូបនេះ គឺជាការបាត់បង់ធន់ធានកីឡាករបាល់ទាត់ដ៏ឆ្នើមម្នាក់របស់ពិភពលោក។ ក្នុងនោះនៅក្នុងអាជីពរបស់គេកន្លងមក គេធ្លាប់ឈ្នះពាន Premier League ១ លើក, ពាន FA Cup ១ លើក, League Cup ២ លើក។ ចំណែកនៅជម្រើសជាតិ គេធ្លាប់ឈ្នះពាន UEFA Nations League ២ លើក៕